ادەبيەت • 11 تامىز، 2022

اۋەزوۆتىڭ شىڭجاڭداعى شاكىرتتەرى

246 رەت كورسەتىلدى

قازاق ادەبيەتىن ايدىندى كولگە، تولقىنى جاعانى ۇرعان تەڭىزگە تەڭەسەك، وندا شەتەلدەگى قازاق ادەبيەتىن سول تەڭىزگە قۇيار بۇلاق دەپ تۇسىنگەن ءجون سياقتى. تابيعات زاڭدىلىعى بويىنشا تەڭىز بەن بۇلاقتار ءبىر-ءبىرىن تولىقتىرىپ وتىرادى. ال قازاق ادەبيەتى مەن شەتەلدەگى قازاق ادەبيەتى دە انە سونداي ءبىر تۇتاس زاڭدىلىققا يە. بىرىنەن ءبىرى ءنار الىپ، كەمەلدەنىپ، بىرىنە ءبىرى يەك ارتادى، سۇيەنەدى. شىنى كەرەك، شەكارا سىرتىنداعى قازاق ادەبيەتىنە ابايدىڭ، الاش ارىستارىنىڭ اسەرى بولعانىن ماقتانىشپەن ايتا الامىز. نە جازسا دا، كوركەمدىكتەن اينىماي، قازاق ءتىلىنىڭ شۇرايلىلىعىن ساقتاپ، وقىرمانىنا ءسوز مايەگىن سىيلاعان قانداس جازۋشىلاردىڭ جازعان توم-توم كىتاپتارىنىڭ كەيبىرى قازاق وقىرماندارىنا جەتپەي جاتقانى دا شىندىق. سول ءۇشىن قانى ءبىر قازاق بالاسى سىزىقتىڭ ار جاعىنداعى اعايىننىڭ نە جازىپ، نە تولعانعانىنان كەيدە حابارسىز قالىپ جاتاتىن جايى بار. شىڭجاڭداعى قازاق قالامگەرلەرىنە پوەزيادا ابايدىڭ، مۇقاعالي، جۇمەكەن، ايبەرگەنوۆتەردىڭ اسەرى بولسا، ال پروزادا ولار مۇحتار اۋەزوۆتىڭ ءستيلىن ودان ءارى جاڭعىرتتى، شاكىرتتىك جولىن ۇستاندى. سول ءتىزىمنىڭ باسىندا ماعاز رازدان، ورازحان احمەت، جۇماباي ءبىلال سياقتى قالامى جۇيرىك، ويى ۇشقىر پروزاشىلار بار.

كوللاجدى جاساعان امانگەلدى قياس، «EQ»

تاريحي رومانعا ۇستا

بىلايعى جۇرتقا «التايدىڭ اقيىق­تارى»، «اتا زامان سويلەيدى» اتتى كەسەك تۋىندىلارىمەن اتى تانىس جازۋ­شى ماعاز رازدان ۇلى ارعى بەتتەگى اعايىن­داردىڭ اراسىنان شىققان شوق­تىعى بيىك قالامگەر. ونىڭ پروزاداعى پاس­پورتى – «التايدىڭ اقيىقتارى» اتتى تاريحي رومانى 1998 جىلى ۇرىمجىدە جارىق كوردى. ۇلكەن اڭگىمەنىڭ مايىن تامىزىپ جازعان ماعاز رازدان ۇلى وسى رومانىندا التاي بەتىن جايلاعان قازاق حالقىنىڭ تۇرمىس-تىرشىلىگىن، ۇلت بولىپ قالىپتاسۋ جولىنداعى تايتالاستارى مەن كۇرەسىن، سول كەزدەگى اۋمالى-توكپەلى قوعامنىڭ كەلبەتىن جازادى. اتالعان رومان تۋرالى اكادەميك رىمعالي نۇرعالي بىلاي تۇسىنىك بەرەدى: «التايدىڭ اقيىق­تارىندا» اۆتور 1860-1930 جىلدار ارالىعىندا بولعان التايداعى اققاپتال شەجىرەلەردى شەرتە وتىرىپ، اقتايلاقتىڭ باۋىرىن ارقان كەسىپ اۋا كوشكەن ەلدىڭ ەجەلگى تاريحىنا قالام تىرەيدى. «قىزىل اياقتار قىرعىنى» دەپ اتالعان كۇنگىل جالسىننىڭ توبىقتارىنا قىزىل ماتالار ورانىپ الىپ، قازاقتاردى قىناداي قىرعان قاندى وقيعاسىنان باستالادى. ەلدىڭ ەكى تىزگىن، ءبىر شىلبىرىن قولىنا العان شاعان كەگەن مان ءچىڭنىڭ مۋزىڭ تۇڭجى حانىنان التايدىڭ ءبىر جەرىنەن عيباداتحانا سالۋعا رۇقسات قاعاز الادى. عيباداتحانا شىعىنىن بولى­سۋگە اتىرابىنداعى الاشتىڭ ازۋلىلا­رىن شاقىرادى، ونىڭ ىرگە تاسىن كەرەيدىڭ اتا-بابالارى كوڭ توككەن كونە جۇرتتارىنا قالايدى». تاريحي رومان وسىلاي تاريح­تىڭ ارعى-بەرگى اقتاڭداقتارىن، سىرلارىن وقىرمانعا شىنايى بولعان وقيعا رەتىندە جەتكىزەدى. قاي عاسىردا دا، قاي زاماندا دا قازاقتىڭ ەسەسى كەتپەگەن كەزەڭ بولماعان. التاي بەتىندەگى اۋىر تاعدىرلار انە سونى ايعاقتايدى.

ماعاز رازدان ۇلى رومانمەن قاتار قىسقا اڭگىمەلەر جازۋدىڭ دا قاس شەبەرى. ونىڭ «اتا زامان سويلەيدى» اتتى كىتابى دا ءساتتى تۋىندىلارمەن تولىققان. قالام­گەردىڭ «كەبەنەك كيگەننىڭ تويى» اتتى اڭگىمەسى كىشكەنتاي ادامنىڭ سولشىل ساياساتقا، تەرىس پيعىلدى قوعامعا دەگەن زاپىرانىنان تۋعان شىعارما. تەرگەۋدە وتىرعان كەيىپكەر بايدار تۋعان جىلىن ايتقىسى كەلمەي: «جىلىم جىلقى، اپام قايىڭ بۇرلەگەن قىزىل تاسقىندا تۋعانسىڭ دەگەن» دەپ قىرسىعادى. ءتىپتى بۇل اڭگىمەدەگى اششى ساركازم دا وقىعان ادامنىڭ ساي-سۇيەگىن سىرقىراتادى.

– ء«سىزدى نەشە جىلعا سوتتاعان ەدى؟»

– مەن سوتتاعان دەگەندى بىلمەيمىن، ايتەۋىر، قار ءۇش جاۋعاندا قايتاسىڭ، دەگەن بولاتىن».

بايدار دا، قوعام دا تونىن تەرىس كيگەن قىرسىقتاردىڭ ءوزى بولىپ شىعادى. اۆتور جالامەن سوتتالعان بايدار قارتتىڭ تۋعان اۋىلىنا ورالعان ءساتىن دە ءساتتى بەرەدى. ول وسى اڭگىمەسى ارقىلى قازاقتىڭ «كەبىن كيگەن كەلمەيدى، كەبەنەك كيگەن كەلەدى» دەگەن دانالىق ءسوزىنىڭ ءمانىن، ونىڭ شىندىعىن العا تارتادى. ياعني اققا قۇدايدىڭ جاق بولاتىنىن ايتقىسى كەلگەن.

«قارت اسىقپاستان ودان:

– ۇيلەرىڭە كىم كەلدى؟ مىناۋ كوپ ادام نە؟ نە ىستەپ جاتىرسىڭدار؟ – دەپ تاپتىشتەپ سۇراي باستادى. ەركەلەي كۇل­گەن بولاتتىڭ ەكى بەتىنەن ەكى كىشكەنە شۇڭ­قىر پايدا بولدى دا، باسىن قيسايتا تۇرىپ:

– كەبەنەك كيگەننىڭ تويىن جاساپ جاتىرمىز، – دەپ تاق-تاق ەتە ءتۇستى. قاباعات رازى بولعان قارت عاسىردىڭ الاقانى جاڭا ءومىردىڭ كەكىلىن باپپەن عانا سيپاپ ءوتتى». «كەبەنەك كيگەننىڭ تويى» وسىلاي اياقتالادى. كەبەنەك كيگەن قانشاما ازامات ءۇمىت دۇنيەسىندە ءومىر ءسۇردى ەكەن؟!

قارا ءسوزدىڭ قاينارىن قانىپ ىشكەن...

قانداس اعايىننىڭ تۇشىنىپ وقيتىن جازۋشىسىنىڭ ءبىرى ورازحان احمەت.  ول دا اۋەزوۆ سالعان دارا جولدا تىنباي ەڭبەكتەنىپ كەلە جاتقان قالامگەر. ونىڭ قالامىنان تۋعان «وزگەرگەن ءوڭىر»، «قۇمداعى ىزدەر»، «كوك بەلەس» روماندارى، «امانات» تريلوگياسى، «كوكتەمگى ويلار»، «سونبەيتىن شىراق»، «ەڭ سوڭعى كوز جاس»، «جاسىل باقشا»، «تۇلپاردىڭ سوڭعى تۇياعى» سەكىلدى اڭگىمە-حيكاياتتارى جازۋشىنىڭ ىزدەنىسىنىڭ قانداي دەڭگەي­دە ەكەنىن ايعاقتايدى. ورازحان اح­مەت­تىڭ مەيلى قاي شىعارماسى بولسىن ۇلتىنىڭ تاعدىرىن، ءۇمىتىن، ار-نا­مى­سىن جوقتاۋعا جول ىزدەيدى. بىردە وراز­حان احمەتتەن ءبىر ادەبي جۋرنالدىڭ ءتىلشىسى:ء«سىزدىڭ شىعارمالارىڭىزدا قاراپايىم، كىشكەنتاي ادامدار تۋرا­لى وي تولعاتاتىنىڭىزدى بىلەمىز. پافوس پەن ايعاي-اتتان از. بىراق مەنى ءبىر تاڭعالدىرعان دۇنيە بار. ءسىزدىڭ شىعارمالارىڭىزدا حانزۋ (قىتاي) كەيىپ­كەرلەر جوقتىڭ قاسى ەكەن. مۇنىڭ سەبەبى نە؟» دەپ سۇراعاندا، ول: ء«بىزدىڭ مەكەنگە بۇرىنىراقتا حانزۋ ۇلتىنىڭ كوبى ءبىزدى باسقارۋعا، ەركىن جۇرگەن حالىق­­تى نوقتالاۋعا باردى. ولاردىڭ مە­نىڭ حالقىما جاساعان جاقسىلىعىنان گورى قياناتى كوبىرەك بولدى. ولاردى شىعارمالارىما كەيىپكەر ەتىپ، تەك جاقسى مىنەزدەرىن جازار بولسام – حال­قىم­نان ۇيات، ال جامان قىلىقتارىن تىزبە­لەپ، ونى جەرىنە جەتكىزە تۇيىندەر بولسام – جۇرتشىلىق مۇنىمدى دا قۇپ كورمەۋى مۇمكىن…» دەپ جاۋاپ بەرىپتى دەگەندى ەستىگەن ەدىك.  جازۋشىنىڭ بۇل اشىق پىكىرىن سول جۋرنال وزگەرتۋسىز باسىپتى. قالامگەردىڭ بىزگە باتىلدىعى مەن شىندىققا عانا جۇمىس ىستەۋى ۇلگى بولماق. 

ورازحان احمەتتىڭ «تۇلپاردىڭ سوڭ­عى تۇياعى» اتتى حيكاياتى ونىڭ ماڭ­داي­الدى شىعارمالارىنىڭ ءبىرى. كەيىپ­كەرلەر اۋىل ادامدارى، ولاردىڭ ارا­سىنداعى باقاستىق، باقتالاستىق، ءبىر-بىرىمەن كۇرەس سول قوعامنىڭ بەت-بەينەسىن ەرىكسىز كوز الدىڭا اكەلەدى. ء«بىزدىڭ كوز الدىمىزدا قوڭىر تاي دا، داۋلەتباي دا تەز ەسەيدى. ءتىپتى انە-مىنە دەگەندەي بولعان جوق، قوڭىر تاي كەرىسكەدەي قۇنان بوپ شىقتى. جىلقىمەن بىرگە جاساسقان قازاق بەكەر ايتسىن با، شىنىندا دا ول ەلدى جالت قاراتار جۇيرىك بولدى. ۇلكەندى-كىشىلى توي مەن توپتا بايگەنىڭ الدىن بەرمەيدى. قاشان بولسىن، توپتان شىعانداپ شىعىپ، جالعىز قارا بوپ كەلەدى دە تۇرادى. وندايدا ءبىز ونى سوناۋ كوز ۇشىنان، داۋلەتبايدىڭ بەلگى رەتىندە ادەيىلەپ تارتىپ العان قىزىل شىتىنان تانىپ، الاقايلايمىز كەپ. نەتكەن مەرەي، نەتكەن قۋانىش، شىركىن!» قازاق پەن جىلقىنىڭ ەتەنە ءومىر ءسۇرۋىن ايتقىسى كەلگەنىمەن، ادام مەن حايۋاننىڭ اراسىنداعى اقىل، ەس، سەزىم، قۇشتارلىق ۇعىمدارىن دا الما-كەزەك شەندەستىرەدى. 

اۆتوردىڭ شىعارمانى جازۋ بارىسىندا وقيعانى ءوربىتۋ، وعان وقىرمان ناناتىنداي ەتىپ ەپيزودتار قوسۋى ونىڭ شەبەرلىگىن كورسەتەدى. جەتىم قالعان ق ۇلىندى ەسەككە ەمىزىپ وسىرگەن اۋىل ادامىنىڭ ارەكەتىن اينالاسىنداعىلار دۇرىس كورمەيدى، ءتىپتى ونىڭ بۇل قىلىعىن ەرسى دەپ قابىلداپ، جاتىرقاي قارايدى. مىنا قىزىقتى قاراڭىزشى، ويدا-جوقتا ەسەككە تەلىنىپ، ونىڭ ءسۇتىن ەمگەن جىلقى تۋرا ەسەككە تارىپ وسەدى. ەسەك كورسە وقىرانىپ، سولارعا قاراي جۇگىرەدى. اۆتور بايگەنىڭ بۇل ءساتىن: «…بار قىلىعى ەسەك پەن جىلقى ورتاسىنداعى ءدۇبارا. كورە قالسا، كۇلگە اۋنايدى، توقپاقتاپ جاتساڭ، سۋدان وتپەيدى. قاراپ تۇرىپ ءوزىڭ ۇيالاسىڭ. سودان ونى قورانىڭ تۇبىنە تىققىشتاۋمەن بولدىق. ماقساتىمىز – ەلگە كورسەتپەۋ، ۇياتتان قاشۋ»، دەپ سۋرەت­تەيدى. كەيىن قارتايىپ ولگەندە اۋىل ادامدارى ونىڭ ەتىن ارامسىنىپ، ەتىن شۇڭقىرعا كومدىرىپ تاستايدى. ايتارى كوپ، استارى بار بۇل شىعارماعا اۆتور ءوزىنىڭ قوعامعا، ورتاسىنا دەگەن كوزقاراسىن سۋرەتتەگەنى شىندىق. جازۋشى مەيلى ادام بولسىن، حايۋان بولسىن ءبارى ءوز تەگىنە اجىراسا، جات بولادى، جەريدى دەگەن ۇلى يدەيانى، ماڭگىلىك ۇعىمدى العا تارتادى.

ىلگەرىدە قازاق ءۇشىن جاقسى كورەتىن جىلقىسىنىڭ ءولۋى اۋىر قازامەن تەڭ بولعان. اقاننىڭ قۇلاگەرىنىڭ باسىن قۇشاقتاپ جىلاۋى سول قاسيەتتىڭ شاعىن مىسالى. ال تاكەن الىمقۇلوۆتىڭ «اق­بوز ات» اتتى رومانىنداعى كەيىپكەردىڭ وققا ۇشقان جۇيرىك اتتىڭ باسىن قۇشاق­تاپ «دۇنيەدەن ۇلى جۇيرىك كەتتى»، دەپ ەڭكىلدەگەنىن كوز الدىڭىزعا ەلەستە­تىڭىزشى، ءبارى دە جىلقىعا دەگەن قۇرمەتتىڭ تۋىندىسى. سول ءۇشىن ءبىزدىڭ «تۇلپاردىڭ سوڭعى تۇياعى» قازاق پەن جىلقىنىڭ قاسى­رەتىن ايتقان شىعارما دەۋگە تولىق نەگىز بار. ەگەر وسى شىعارمانى وقىساڭىز، ءسىزدىڭ كوز الدىڭىزعا ەن دالادا قاتار ءومىر ءسۇرىپ، قيىندىق پەن قىسپاقتى قا­تار كورگەن قازاق پەن جىلقى كەلەرى انىق. ارينە، ءسىز وندا تاعدىر دەگەن سوزگە توقتايسىز. ءيا، ءبارى تاعدىردىڭ ءىسى. استارلاپ ايتۋ، فيلوسوفيالىق تۇرعىدان وي ايتۋ – ورازحان شىعارماشىلىعىنىڭ وزىنە ءتان دارا قاسيەتى. ۇلت ادەبيەتى ءۇشىن ونىڭ قالامى نەبىر تىڭ دۇنيەلەر بەرە الدى، ەندى سونى تارازىلاپ، وقىپ، تۇيسىنگەن ابزال. 

اۋەزوۆتىڭ شاكىرتى رەتىندە ورازحان احمەت قازاق ادەبيەتىنە ءىرى روماندار بەردى. ونىڭ كەڭ تىنىستى، ەپيكالىق ۇلگى­دە جازۋى دا مۇحتار اۋەزوۆتىڭ شىعار­ماشىلىقتاعى ەركىن قۇلاش سەر­مەۋىنىڭ ءبىر كورىنىسى. ول مۇحتار اۋەزوۆ شىعارماشىلىعى تۋرالى ءبىر سوزىندە: «اباي – ادەبيەتىمىزدىڭ ماقتانىشى. «اباي جولى» – رومانى قازاق رۋحاني مادەنيەتىنىڭ اسىلى. وسى ءبىر ەۋرازيا ورتاسىندا ءومىر سۇرگەن جاۋىنگەر حالىقتىڭ بەكزاتتىق مىنەزىن، پاراسات-پايىمىن، وزىندىك مادەنيەتىن الەمگە تانىتقان شىعارما. بۇگىنگى كۇنى اۋەلى قازاق ادەبي ءتىلىنىڭ ەنتسيكلوپەدياسى بولىپ وتىر. ال شىعارماداعى كەڭەستىك كوزقاراس ورىسشىل جارامساقتار جاعىنان ەرىكسىز تاڭىلعاندىعى ايدان انىق. قىتاي قازاقتارىندا وسى رومان حح عاسىردىڭ 80-جىلدارىنان بەرى بەس-التى دۇركىن اسا مول تيراجبەن باسىلىم كوردى. قازىر جانە دە كىتاپحانادان تاپپايسىڭ. بىراق ءار قازاقتىڭ ۇيىنەن تاباسىڭ. ءار جىل سايىن راديودا وقىلادى، ەلەكتروندى نۇسقاسى دا بار. اۋەلى وسى كىتاپتى تولىق وقىپ شىققان ديكتوردىڭ ءوزى وسى كۇندە اسا جوعارى بەدەلگە يە»، دەيدى.  مەيلى قاي ەلدە ءومىر ءسۇرسىن سول ەلدەگى قازاق قالامگەرلەرى ءۇشىن اۋەزوۆ ماڭگى ۇستاز.

وقشاۋ جازعان تالانت

شىڭجاڭداعى قالامگەرلەر اراسىنان دارا شىققان جازۋشىنىڭ ءبىرى رەتىندە جۇماباي ءبىلالدىڭ ەسىمى ءجيى اتالادى. ونىڭ شىعارماشىلىقتاعى وزىندىك ەرەك­شەلىگى ەشكىمدى قايتالاماي، دارا جولمەن ءجۇرۋى. قارا سوزگە جان ءبىتىرىپ، وقشاۋ تەڭەۋ تاباتىن جازۋشىنىڭ وسى­عان دەيىن شىڭجاڭ باسپالارىنان «ارۋلار»، «بوز جىگىتتەر»، «جەل شىعىس­تان تۇرعاندا»، «دالا تورعايلارى» سياق­تى كوپتەگەن رومانى جارىق كوردى. ونىڭ وسى شىعارمالارىن وزگە ۇلت قالامگەرلەرى دە جاقسى باعالاپ، اۋدارىپ، جاريالادى.

قالامگەردىڭ «بوز جىگىتتەر» اتتى رومانى كوپ وقىلعان شىعارمالار ساپىندا. بۇل روماندا جولامان اتتى كەيىپكەر ءوزىنىڭ باستان كەشكەندەرى ارقىلى سىرت­قى الەمگە قاراتا وي تولعايدى، سىر ايت­قىسى كەلەدى. اينالادا بولىپ جاتقان قۇ­بىلىستاردى ءوز كوزىمەن كورىپ، سودان سىر تۇيەدى. ونىڭ ءومىرى ۇنە­مى وزگە­رىسكە ۇشىراپ، شىندىقتىڭ كەي­پى اشىلا بەرەدى. تۇتاس روماننىڭ ءون-بويىن­دا وزىنە ءتان ءبىر اۋەن بار، كەيىپ­كەر سونى باستان-اياق قۋالاپ، عۇمىر كەشە­دى. جازۋشىنىڭ شەبەرلىگى سوندا، ول كەيىپكەردىڭ كورگەن-بىلگەنى ارقىلى ءوزىنىڭ ىشكى ويىن ايتقىسى كەلەدى.  

ال ونىڭ «دالا تورعايلارى» اتتى رومانى سان قيلى تاعدىر كەشكەن قازاق حالقىنىڭ ءار كەزەڭدەگى تاعدىرى باياندالادى. اق پاتشانىڭ ول ەلدەگى قازاقتارعا جاساعان زورلىق-زومبىلىعى مەن قىس­پاعى وسى روماندا كوزبەن كورگەندەي ەتىپ سۋرەتتەلەدى. جۇمىق ەلىنىڭ ارعى بەتكە كوشىپ بارعاندا كورگەندەرى كىتاپتىڭ نەگىزگى وقيعالارى رەتىندە سيپاتتالادى. مۇحتار اۋەزوۆ «قاراش-قاراش وقيعا­سىندا» قازاق باسىنان وتكىزگەن قيىن­دىقتاردىڭ قالاي تاپتىشتەپ، رەت-رەتىمەن سۋرەتتەسە، جۇماباي ءبىلال ۇلى دا «دالا تورعايلارىندا» تاريح ءداۋىردىڭ سول ساتتەرىن اينا قاتەسىز اق قاعازعا تۇسىرەدى. جازۋشىنىڭ جيعان ماتەريال­دارى، ءوزىنىڭ جادى وسىنداي كولەمدى روماننىڭ ومىرگە كەلۋىنە باستى سەبەپ دەۋگە بولادى. ول جازعان وقيعالار مەن حالىق تىرشىلىگى كوركەم شىعاما بولىپ وقىرمانعا جەتتى، بۇل دا ادەبي ءۇردىس ءۇشىن كەرەكتى دۇنيە.

جازۋشى جۇماباي ءبىلال ۇلى ءبىر سۇح­با­تىندا: «مەن «اباي جولىن العاش رەت 1953 جىلى وقىدىم. سول كەزدە ون بەس-ون التى جاستامىن. سودان كەيىن 1959 جىلى «قازاقستان پيونەرى» گازەتىنىڭ بىرنەشە سانىنان «كوكسەرەك» پوۆەسىن وقىدىم، بۇل شىعارما جان جۇيكەمدى سىلكىلەدى. قۇدىرەتتى قالامگەردىڭ وي تولعانىسى ۇزاق جىلدار بويى مەنىڭ جان دۇنيەمدى باسقا ءبىر جۇمباق الەمگە جەتەلەي بەردى. العان اسەرىمدى سوزبەن ايتىپ جەتكىزۋ قيىن. سەبەبى ءبىزدىڭ ۇلتتىڭ ومىرىندەگى ۇلى ادامنىڭ تاعدىرىن، تاريحىن ۇلى شىعارما ەتىپ جازۋ تەك اۋەزوۆ سەكىلدى تۇلعانىڭ عانا قولىنان كەلەتىنى اقيقات. ال «كوكسەرەك» تۋرالى ايتسام، بەرتىنگە دەيىن مۇحاڭ قاسقىردىڭ بولتىرىگىنە نيەتى اۋىپ، سول تۋرالى جازدى»، دەپ ويلاپ ءجۇردىم. سويتسەم، جازۋشى بۇل شىعارماسى ارقىلى «قاسقىر سەنى جەيدى» دەگەندى بىلدىرمەك ەكەن. مەنىڭ بۇكىل شىعارمالارىمنىڭ ءون-بويىندا ءورىلىپ تۇسكەن مەڭزەۋ، يشارالاۋ سىندى سيمۆولدىق دەتالدارعا «كوكسەرەكتىڭ» اسەرى بولعانى شىندىق»، دەپ مۇحتار ومارحان ۇلى تۋرالى شىنايى كوزقاراسىن ايتادى.

قازاق ادەبيەتىندە تاۋ بولار، ءتىپتى سوعان لايىقتى تۇلعالار از ەمەس. دەگەن­مەن سولاردىڭ ىشىندە وقشاۋلانىپ، ءوز مۇناراسىن بيىكتەتىپ تۇرعان جالعىز جازۋ­شى – مۇحتار اۋەزوۆ. ول ارتىنان سانسىز شاكىرت ەرتىپ، ءوز مەكتەبىن كەلەر ۇرپاققا اماناتتاعان داڭقتى ءسوز زەرگەرى بولا الدى. سول ءۇشىن دە شەتەلدەگى قازاق قالامگەرلەرىنىڭ كوبى ونىڭ جولىن ۇستانىپ، كوپتەگەن پروزالىق ەڭبەك جازدى. بۇل دا بولسا اۋەزوۆتىڭ شاراپاتى بولسا كەرەك. 

سوڭعى جاڭالىقتار

COVID-19: ۆاكتسينا العانداردىڭ سانى ارتتى

كوروناۆيرۋس • بۇگىن، 09:58

ۇقساس جاڭالىقتار