مەديتسينا • 11 تامىز، 2022

تامىردى جالعاعاندار – ءومىردى سىيلاعاندار

53 رەت كورسەتىلدى

قاراعاندىداعى وبلىستىق كارديوحيرۋرگيا ورتالىعىندا اسا كۇردەلى وتالاردى جاسايتىن جوعارى بىلىكتى ماماندار ەڭبەك ەتەدى. مىسالى، جىل باسىنان بەرى اتالعان مەديتسينالىق مەكەمەدە اورتاسى ۇزىلگەن بەس ناۋقاسقا وتا جاسالعان.

دارىگەرلەردىڭ ايتۋىنشا، بۇل پاتولوگيانىڭ قاۋىپتى توبىنا ەمدەۋدەن وتپەيتىن جوعارى قان قىسىمى بار جانە اتەروسكلەروزى بار ادامدار جاتقىزىلادى ەكەن.

ماماندار اورتانىڭ جىرتىلۋ جاعدايلارىنىڭ 80%-ى باقىتسىز جاعدايمەن اياقتالاتىنىن ايتادى. سەبەبى ەڭ ۇلكەن تامىر مەن ونىڭ قابىعى تولىق جىرتىلسا، ادام قاندى كوپ جوعالتىپ، ءجۇرىپ كەتۋى ابدەن مۇمكىن.

تاياۋدا اتالعان ورتالىقتىڭ كارديوحيرۋرگ دارىگەرلەرى قولقا تامىرى ۇزىلگەن ناۋقاستى اجالدان اراشالاپ قالدى. جاسى 58-گە كەلگەن قالا تۇرعىنى ءوزىن ناشار سەزىنگەندىكتەن جەدەل جاردەم كارديولوگيالىق ورتالىققا جەتكىزگەن ەكەن. بۇل جەردە وعان اورتانىڭ جارىلۋى دياگنوزى قويىلدى.

جوعارى ساناتتى كارديوحيرۋرگ، كارديوورتا­لىق­تىڭ ديرەكتورى ارىستان ماعزۇ­موۆ تامىردىڭ جارىلۋى ەكى كەزەڭ­نەن تۇراتىنىن ايتادى. ءبىرىنشى جاعدايدا اورتا ءۇزىلىپ كەتەدى ەكەن دە، ادام بىردەن كوز جۇماتىن كو­رىنەدى. ال كەيدە ىشكى بولىك جارىلىپ، تامىر سىرتقى قاباتىندا ۇستالىپ تۇرادى ەكەن.

– بۇل – امان قالۋعا مۇمكىن­دىگى بار پاتسيەنتتەر. ويتكەنى جىر­تىلعان جەردى پروتەزدەۋ جۇ­مىستارىن جۇرگىزۋگە مۇمكىندىك بار. ال بۇل ناۋقاستا اورتانىڭ كوتەرىلىپ كەلە جاتقان بولىگى عانا زاقىمدالماي، تامىردىڭ ءۇزى­لۋى جوعارىعا شىعىپ كەتكەن. تا­مىر كوپ بولعاندىقتان، اتال­عان اۋماقتى پروتەزدەۋ دە قيىن بولدى، – دەيدى ا.ماعزۇموۆ

راسىندا دا، جوعارى ءبولىم مەن اورتا دوعاسىن پروتەزدەۋ وپەراتسياسى شامامەن بەس ساعاتقا سوزىلىپتى. جاساندى قان اينالىم اپپاراتىنا قوسىلعان ناۋقاستىڭ جۇرەگىنىڭ قاعىسى ءبىراز ۋاقىتقا توقتاتىلىپ، دەنەسى 18 گرادۋسقا دەيىن سالقىنداتىلعان. ابىروي بولعاندا، وپەراتسيا ءساتتى اياقتا­لىپ، پاتسيەنت ەكى اپتاعا جۋىق جانساقتاۋ بولىمىندە بولىپ، ودان كەيىن وڭالتۋ كۋرسىنان وتكەن.

قازىر ناۋقاس ءوزىنىڭ بۇرىنعى قالپىنا كەلە باستاعانىن ايتادى.

– ءدال وسى جاعدايدا ماعان تاع­دىر ەكى مارتە سىي جاسادى. جەدەل جاردەم فەلدشەرى وتە تاجىريبەلى بولىپ شىقتى جانە بىردەن كار­ديولوگيالىق ورتالىققا جىبەرۋگە شەشىم قابىلدادى. ەكىنشى رەتتە وسىنداي بىلىكتى حيرۋرگتەر­گە تاپ بولىپ، جانىمنىڭ قالعانىن ايتۋعا بولادى، – دەيدى ول ريزا­شىلىقپەن.

ورتالىقتاعى ەرەسەكتەر كار­ديو­حيرۋرگياسى ءبولىمىنىڭ مەڭ­گەرۋشىسى سەرگەي تسوي بۇل پاتو­لوگيانىڭ كۇردەلىلىگى مەن قاۋىپ­تىلىگى اتالعان دەرتكە ءتان كەل­مەيتىن بەلگىلەرگە بايلانىس­تى بولا­تىنىن ايتادى.

– كومپيۋتەرلىك توموگرافيا، كارديوسكوپيا ءتارىزدى ارنايى ادىستەرسىز كلينيكالىق دياگ­نوز قويۋ وتە قيىن. دياگنوزدان كەيىن ءبىر عانا شەشىم بار – ادام مۇمكىندىگىنشە تەزىرەك وپەرا­تسيا­عا جاتقىزىلۋى كەرەك، – دەيدى س.تسوي.

ايتا كەتۋ كەرەك، اورتا ءبو­لى­مىن پروتەزدەۋ بويىنشا وپە­راتسيا­لار ءمامس جۇيەسى اياسىندا جۇرگىزىلەدى. مەديتسينالىق ساق­تاندىرۋ قورى ولاردىڭ ارقاي­سىسىنا 2،6 ملن تەڭگەدەن قارجى بولەدى ەكەن.

 

قاراعاندى

سوڭعى جاڭالىقتار

ۇقساس جاڭالىقتار