بورودۋليحا اباي وبلىسىنداعى ءىرى اگروونەركاسىپتىك اۋدانداردىڭ ءبىرى سانالادى. مۇندا 70 جشس, 458 شارۋا قوجالىعى جۇمىس ىستەپ كەلەدى. جالپى جەر كولەمى – 698 مىڭ گەكتار, ونىڭ ىشىندە اۋىل شارۋاشىلىعىنا ارنالعان جەر – 474,2 مىڭ گەكتار. اتاپ ايتساق, ەگىستىك كولەمى – 357,2 مىڭ گەكتار, جايىلىمدىق جەر – 108,2 مىڭ گەكتار جانە شابىندىققا ارنالعان جەر – 7,8 گەكتار.
«كاسىبي باعدارعا سايكەس اۋداننىڭ اۋىل شارۋاشىلىعىندا وسىمدىك باعىتىنا باسىمدىق بەرىلگەن. بىراق مال شارۋاشىلىعى دا جول قويىلعان. اۋىل شارۋاشىلىعى جالپى ءونىمىنىڭ قۇرىلىمىندا وسىمدىك شارۋاشىلىعى – 60%, مال شارۋاشىلىعى 40%-دى قۇرايدى.
اۋىل شارۋاشىلىعىنداعى جالپى ءونىمنىڭ كولەمى – 8 ملرد 513 ملن 500 مىڭ تەڭگەگە جەتتى (ناقتى كولەم يندەكسى 100,3%). بۇل وبلىستاعى جالپى كولەمنىڭ 7,2%-ىن قۇرايدى.
بيىلعى ەگىستىك كولەمى 327 900 گەكتار (2021 جىلمەن سالىستىرعاندا 8,1 مىڭ گەكتارعا كوپ), ونىڭ ىشىندە جازدىق داقىلدار 297 600 گەكتارعا ەگىلدى», دەدى بورودۋليحا اۋدانىنىڭ اكىمى احمەتقالي نۇرعوجين.
اۋدان اۋماعىنداعى نەگىزگى ونەركاسىپ ورنى جەزكەنت كەنتىندەگى ورلوۆكا وندىرىستىك كاسىپورنى سانالادى. قازىر مۇندا مەردىگەر كومپانيالار قىزمەتكەرلەرىن قوسا العاندا 3 مىڭنان اسا ادام جۇمىس ىستەيدى. بيىلعى التى ايدا ءوندىرىس كولەمى 28 ملرد 895 ملن تەڭگەگە جەتكەن. ءوسۋ قارقىنى – 112,4%.
وبلىستىڭ وزگە اۋداندارىنداعى سەكىلدى بورودۋليحادا دا جول ماسەلەسى وزەكتى.
«بۋركۋتوۆو اۋىلىنداعى كىرەبەرىس جول – 23 شاقىرىم. سوسنوۆكا مەن بۋركۋتوۆونى بايلانىستىراتىن جول 6 جىل بويى جوندەۋ كورمەگەن. جولدىڭ جارتىسى ابدەن توزعان. جۇرگىزۋشىلەر اينالما جولمەن جۇرۋگە ءماجبۇر. بيىل تەك شۇڭقىرلاردى جوندەۋ جوسپارلانعان. بۇل اتالعان ماسەلەنى تۇپكىلىكتى شەشپەيدى. ويتكەنى كەپىلدىك مەرزىمى ءبىر-اق جىل. ءبىز جول جوندەۋ جۇمىستارىنا بيۋدجەتتەن قاراجات ءبولۋدى سۇرايمىز. بۇل – سمەتاعا سايكەس 860 ملن تەڭگە», دەدى تاۆريا اۋىلدىق وكرۋگىنىڭ تۇرعىنى ناتاليا ستاروجيلوۆا.
اۋدان اكىمىنىڭ سوزىنە سۇيەنسەك, قازىر اۋداندىق ماڭىزى بار 337 شاقىرىم جولدىڭ 250 شاقىرىمى قاناعاتتانارلىق جاعدايدا. بۇل – 74,1%.
«اۋدانداعى اۆتوموبيل جولدارىنىڭ جالپى ۇزىندىعى – 718 شاقىرىم, ونىڭ ىشىندە 96 شاقىرىمى – رەسپۋبليكالىق, 285 شاقىرىمى – وبلىستىق جانە 337 شاقىرىمى – جەرگىلىكتى ماڭىزعا يە جولدار.
بيىل جەرگىلىكتى ماڭىزداعى جولدارعا ورتاشا جوندەۋ جۇمىستارىن جۇرگىزۋ جوسپارلانىپ وتىر. اتاپ ايتساق, 144 ملن 586 مىڭ تەڭگەگە (وبلىستىق بيۋدجەتتىڭ قاراجات ەسەبىنەن) ۇزاقتىعى 2,8 شاقىرىم بولاتىن جەزكەنت وتكىزۋ پۋنكتىنە دەيىنگى كىرەبەرىستەگى (رف شەكاراسى) اۆتوموبيل جولىن ورتاشا جوندەۋ, جەرگىلىكتى بيۋدجەتتەن 22 ملن 950 مىڭ تەڭگە سوماسىنا ۇزاقتىعى 19,4 شاقىرىم بولاتىن بۋركوتوۆو اۋىلىنا دەيىنگى كىرەبەرىستەگى اۆتوموبيل جولىنا اعىمداعى جوندەۋ, سونداي-اق جەرگىلىكتى بيۋدجەتتەن 72 ملن 200 مىڭ تەڭگە سوماسىنا ۇزىندىعى 3,5 شاقىرىم پەرەمەنوۆكا-رەمكي باعىتىنداعى جولعا ورتاشا جوندەۋ جۇرگىزىلەدى.
«اۋىل – ەل بەسىگى» جوباسى اياسىندا رەسپۋبليكالىق بيۋدجەتتەن جالپى سوماسى 396 ملن 900 مىڭ تەڭگەگە ەلدى مەكەندەردەگى كوشەلەردى جوندەۋ جۇمىستارى جۇرگىزىلىپ جاتىر.
اۋداندىق اۋرۋحاناعا جول جوندەۋ جوباسى جارىق شامدارىن ورناتۋمەن بىرگە اياقتالدى.
بورودۋليحا, پەتروپاۆلوۆكا, زەنكوۆكا, يۆانوۆكا اۋىلدارىندا 23 شاقىرىمعا سوزىلعان قيىرشىق تاس جانە اسفالت توسەلگەن كوشەلەردى جوندەۋ جۇمىستارى ىسكە اسىرىلىپ جاتىر», دەدى ا.نۇرعوجين.
وبلىس اكىمى نۇرلان ۇرانحاەۆ بورودۋليحاداعى جول پروبلەماسى وڭىردەگى وزگە دە اۋداندارعا ءتان ماسەلە ەكەنىن ايتتى. ءوڭىر باسشىسى اتالعان ماسەلەنى ءجىتى باقىلاۋىنا الاتىنىن جەتكىزدى.
«بىرىنشىدەن, تىكەلەي ءوزىم بارىپ قايتقان 6 اۋداندا وسىنداي سيپاتتاعى پروبلەمالار بار ەكەنىن ءتۇسىنۋ كەرەك. البەتتە, بارلىق جەرگە قىرۋار اقشا قاجەت. ەگەر دە جوبالىق-سمەتالىق قۇجات دايىن بولسا, بۇل ماسەلەنى مىندەتتى تۇردە قاداعالايمىز. بيىل, وكىنىشكە قاراي, جوندەۋ جۇمىستارىنىڭ جۇرگىزىلۋى ەكىتالاي. بىراق كەلەسى جىلى بۇل ماسەلەمەن مىندەتتى تۇردە اينالىسامىز. سونداي-اق حالىق ايتىپ جاتقان وڭىردەگى باسقا دا جولدار مەن كوپىرلەردى قاراپ شىعۋ كەرەك», دەدى ن.ۇرانحاەۆ.
بۇدان باسقا اۋدان تۇرعىندارى گازداندىرۋ, جارىق جانە سۋمەن قامتاماسىز ەتۋگە بايلانىستى ماسەلەلەردىڭ قاشان رەتتەلەتىنىن سۇرادى.
اباي وبلىسى,
بورودۋليحا اۋدانى
