اتالعان رەزەرۆاتتىڭ ماماندارى ايتقانداي, سول سەكىلدى قىزىل كىتاپقا ەنگەن مارال مەن ارقار دا ءجيى كەزدەسەتىن بولىپتى.
ورمانداعى تىرشىلىك يەلەرىنىڭ سانىن, سونداي-اق شوعىرلانعان جەرى مەن جۇرەتىن ورىندارى تۋرالى دەرەكتەردى جيناۋ ماقساتىندا «سەمەي ورمانىنا» قاراستى شارۋاشىلىقتاردا جىل سايىن جابايى جانۋارلاردىڭ ەسەبى جۇرگىزىلەتىنىن ايتا كەتكەن ورىندى.
«ۇكىمەتتىڭ 2006 جىلى «ەرەكشە قورعالاتىن تابيعي اۋماقتار تۋرالى» زاڭىن قابىلداۋىنا سايكەس اتالعان اۋماقتاردا اڭ اۋلاۋعا تىيىم سالىنىپ, ساقتىق شارالارىنىڭ كۇشەيتىلۋىنە بايلانىستى سەمەي ءوڭىرى بويىنشا بۇلان, ءسىبىر ەلىگى, قابان سياقتى تۇياقتى اڭداردىڭ وسىمىندە وڭ ديناميكا بايقالىپ وتىر. بۇعان قوسا قىزىل كىتاپقا كىرگەن مارال مەن ارقار دا ءجيى كەزدەسە باستاعانىن ايتا كەتۋ كەرەك.
كەيىنگى جىلدارداعى دەرەكتەردى تالداي كەلە تۇلكى مەن سىلەۋسىننىڭ دە سانى كوبەيىپ كەلە جاتقانى انىقتالدى. ەرەكشە قورعالاتىن تابيعي اۋماقتاردا قويان ءتارىزدى اڭنىڭ پوپۋلياتسياسى سالىستىرمالى تۇردە تۇراقتى بولعان سوڭ اق قويان مەن تولايدىڭ وسكەنى بايقالادى. الايدا ور قوياننىڭ ازايعانىن ايتىپ ءوتۋىمىز كەرەك. قاسقىر, قارساق جانە ءتيىننىڭ سانى دا تومەندەپ كەلەدى», دەلىنگەن «سەمەي ورمانى» موتر سەمەي فيليالىنىڭ ورماندى قورعاۋ جانە كۇزەتۋ ينجەنەرى ولجاس سەيىتقاليەۆ.
بيىل ءساۋىر-مامىر ارالىعىندا كەشكى جانە تاڭعى ۋاقىتتاردا ارنايى دىبىس پەن ۆيزۋالدى باقىلاۋ ارقىلى قاۋىرسىندى قاراتورعايلار مەن قىرعاۋىلداردى ەسەپكە الۋ جۇرگىزىلدى.
جىلدىڭ باسىنداعى جابايى اڭداردىڭ ەسەپتىك دەرەكتەرىن تالداۋدىڭ ناتيجەسىندە رەزەرۆاتتىڭ اڭشىلىق شارۋاشىلىق ماماندارى بورسىق (+27 داراق), قۇر قۇسى (+98 داراق) مەن سۇر كەكىلىكتىڭ (+60 داراق) كوبەيگەنىن انىقتاعان. بىراق اق كەكىلىكتىڭ (-8 داراق) كەرىسىنشە ازايعانى بايقالىپ وتىر.
ال قىزىل كىتاپقا ەنگەن قارا لايلەكتىڭ پوپۋلياتسياسى بۇرىنعى قالپىندا.
مامانداردىڭ ايتۋىنشا, جابايى جانۋارلاردى ەسەپكە الۋ بيوتەحنيكالىق ءىس-شارالار كولەمىن جوسپارلاۋ ءۇشىن دە قاجەت. سوعان سايكەس بۇتاقتى جەم مەن ءشوپتى دايىنداۋ, سورتاڭ جەرلەردى قالپىنا كەلتىرۋ جانە جاڭارتۋ, بۇلاندار مەن ەلىكتەردىڭ مينەرالدى بالانسىن قالپىنا كەلتىرۋ ءۇشىن تاس تۇزىن قالاۋ, سۋاتتاردى سالۋ مەن جاڭالاۋ, سول سەكىلدى اڭداردى استىق جانە تامىر داقىلدارى مەن قوسىمشا ازىقپەن قامتاماسىز ەتۋ امالدارى قولعا الىنادى.
«سەمەي ورمانىنا» قاراستى 10 فيليالدىڭ ورمان كۇزەتىنىڭ مەملەكەتتىك ينسپەكتورلارى اڭشىلىق شارۋاشىلىق ماماندارىمەن بىرلەسىپ, بۇل باعىتتاعى جۇمىستى ۇزدىكسىز جۇرگىزىپ كەلەدى. ويتكەنى ەرتىس وڭىرىندەگى قاراعايلى ورمان فاۋناسىنىڭ الۋاندىعى مەن قولايلى قالىپتاسۋى ورىندالاتىن بيوتەحنيكالىق ءىس-شارالاردىڭ ساپاسى مەن ۋاقتىلىعىنا بايلانىستى.
اباي وبلىسى