ارينە, ءبىزدىڭ پىكىرگە قوسىلۋ, قوسىلماۋىڭىز ءوز قۇزىرىڭىزدا… تەك ءبىز مىسالعا العان كارتيناعا قاراپ, سول ويعا بايلانارىڭىزعا سەنىمدىمىز. سۋرەتكەردىڭ سەزىمىن الديلەگەن, كوڭىلىن تولقىتقان تۇستەردىڭ تاڭعاجايىپ قوسىندىسى. بۇل قىلقالام شەبەرى كاميلا جاپالوۆانىڭ «ماحاببات اۋەنى» كارتيناسى. مايلى بوياۋمەن جازىلعان ماحاببات حيكاياسى.
كومپوزيتسيادا وتاعاسى مەن ونىڭ بايبىشەسى بەينەلەنگەن. قازاقى كيىمدە, بولمىس-ءبىتىمى ۇلتتىڭ سالت-داستۇرىنەن تاعان تارتىپ تۇر. قارا جەرگە قۇراق كورپە جايىپ, قوس عاشىق قوبىز ۇنىمەن قۋات الۋدا. قىمىز ۇسىنعان قىزدىڭ كيىمىنە نازار سالىڭىزشى. ەسكى ءداۋىردىڭ كەلبەتىن كوز الدىڭىزعا اكەلەدى. مۇندا يبالىلىق, مەيىرىمدىلىك, تازالىق, تەكتىلىك بار. جىگىتتىڭ دە ءون بويىنان سونى كورەمىز.
اينالا تۇگەلدەي ساعىمعا ۇلاسقانداي, تىرشىلىك تولقىنداي تەربەلىپ تۇر. قۇددى قوس عاشىققا قوسىلىپ تابيعات ءان ايتىپ تۇرعانداي. قازاقى ويۋ ورنەكتەر مايدا جەلدەي بۇرالا ورنالاسقان. ايەلدىڭ قولىنداعى توستاعاننان بولەك تاعى ەكى توستاعان بەرىلگەن. قوناق كەلسە, قۇشاعى اشىق قازاقتىڭ پەيىلىن ەلەستەتەدى. ءبىر-بىرىنە تاقالا جايعاسقان ەكەۋدىڭ قوبىز ۇنىنە بالقىپ وتىرعانى انىق.
اۆتور كارتينانى «ماحاببات اۋەنى» دەپ اتاۋى بەكەر ەمەس. كەنەپ بەتىندە شىنىمەن مۋزىكا بار. ونى ويلى وقىرمان بىردەن بايقايدى. قوڭىر دالانىڭ قۇشاعىندا قوڭىر اۋەنگە تەڭىزدەي تەربەلگەن ەر مەن ارۋدىڭ ءبىر-بىرىنە دەگەن سۇيىسپەنشىلىگى كوزگە وتتاي باسىلادى. سولارمەن بىرگە بارلىق الەم تەربەلىپ تۇرعانداي. سۇيگەندەردىڭ قاشاندا ءوز ءانى, ءوز تاعدىر-تالەيى بولۋى زاڭدىلىق.
