يگىلىكتى ءىس-شارا اۋدان ورتالىعى اقسۋات اۋىلىنداعى ۇرانحاي قاجى مەشىتىنىڭ جانىنان سالىنعان مەدرەسەنىڭ اشىلۋ سالتاناتىمەن باستالدى. «مۇندا اسىل دىنىمىزگە بەت بۇرعان جاستار ءدىني ساۋات اشىپ, رۋحاني ءتالىم-تاربيە الاتىن بولادى», دەدى قازاقستان مۇسىلماندارى ءدىني باسقارماسى (قمدب) شاريعات جانە ءپاتۋا ءبولىمىنىڭ مەڭگەرۋشىسى, نايب ءمۇفتي سانسىزباي شوقانوۆ. مەدرەسەنىڭ اشىلۋىنا قمدب اباي ءوڭىرى بويىنشا باس يمامى اسقار مۇقانوۆ, اقسۋات اۋدانىنىڭ اكىمى اسحات سمايلوۆ, «حابار» اگەنتتىگىنىڭ باسقارما توراعاسى بەرىك ءۋالي قاتىسقانىن ايتا كەتكەن ورىندى.
بۇعان قوسا اۋليە ىرعىزباي دوسقانا ۇلىنىڭ رۋحىنا ارناپ اس بەرىلىپ, جاس بالالار اراسىندا رەسپۋبليكالىق قۇران جارىسى وتكىزىلدى. بۇل سىندا 25 قاتىسۋشى ءوز مۇمكىندىگىن پىسىقتاپ, 1-ورىندى يەلەنگەن ەلدوس جورتىموۆ ۇمرا قاجىلىعىنا جولداما الدى. جەڭىمپاز قاجىلىق ساپارىنىڭ جولداماسىن اناسىنا سىيعا تارتاتىنىن جەتكىزدى. سول سەكىلدى 5-ورىنعا دەيىن تابان تىرەگەندەرگە دە اقشالاي جۇلدە تابىستالدى.
وسىدان كەيىن اۋدان ورتالىعىندا قاراكەرەي قابانباي باتىردىڭ 330 جىلدىق مەرەيتويىنا ارنالعان «وتان قورعاۋ جولىنداعى باتىر بابالار ەرلىكتەرى» تاقىرىبىندا رەسپۋبليكالىق عىلىمي-تاجىريبەلىك كونفەرەنتسيا ۇيىمداستىرىلىپ, عالىمدار كەلەلى ويلارىن ورتاعا سالدى.
«دانا حالقىمىزدا «تۋعان جەرگە تۋىڭدى تىك» دەگەن ۇلاعاتتى ءسوز بار. اتادان بالاعا ميراس بولىپ, ءتول ونەردىڭ دامۋىنا اتسالىسقان ازاماتتار مەن ۇيىمداستىرۋشىلارعا ءوزىمنىڭ جانە جەرلەستەرىمنىڭ اتىنان زور ريزاشىلىعىمدى بىلدىرە وتىرا بارلىق سپورتشى مەن ونەرپازعا ساتتىلىك, كورەرمەن قاۋىمعا ۇمىتىلماس مەرەكەلىك كوڭىل كۇي تىلەيمىن», دەدى اباي وبلىسىنىڭ اكىمى نۇرلان ۇرانحاەۆ.
قازاق كۇرەسىنەن ۇيىمداستىرىلعان ىرعىزباي دوسقانا ۇلى اتىنداعى الەمدىك گران-پري باسەكەسىنە 19 مەملەكەتتىڭ بالۋاندارى قاتىسىپ, باقتارىن سىنادى. جارىستىڭ ناتيجەسىنە سايكەس 70 كيلو سالماق دارەجەسى بويىنشا 1-ورىن گرۋزيادان كەلگەن نيكو شيكايدزەگە بۇيىردى. 2-ورىننان تاجىكستاندىق ناۆرۋز كاريمزات كورىنسە, ۇزدىك ۇشتىكتى موڭعوليالىق ەنحبول ەحتايۆان مەن وتانداسىمىز راۋان التىنبەك تۇيىندەدى. 90 كيلو سالماق دارەجەسىندە اباي وبلىسىنىڭ بالۋانى اسەت احمەتجانوۆقا تەڭ كەلەر قارسىلاس تابىلمادى. ول فينالدا گرۋزيانىڭ دارىندى سپورتشىسى پااتا گۆيناشيۆيليدىڭ جاۋىرىنىن جەرگە تيگىزدى. قولا جۇلدەنى قىرعىزستاندىق جامالبەك اسىلبەك ۇلى مەن مولدوۆادان كەلگەن ميحايل مارچيتون قانجىعاسىنا بايلادى. 90 كيلودان جوعارى سالماقتا قاپ تاۋىنىڭ تاعى ءبىر وكىلى گەورگي كاۆكارادزە قارسىلاس شىداتپاي التىننان القا تاقتى. كۇمىس جۇلدەنى پولشالىق كاسپەر جۋروۆسكي السا, 3-ورىنعا قىزىلوردالىق ماقسات يساقابىلوۆ پەن يراندىق فارحاميدريزا سادجادي تابان تىرەدى.
«وسى جارىستا ۇيىمداستىرۋداعى باستى ماقساتىمىز – قاراپايىم قازاق اۋىلىن تانىتۋ ەدى. قازىر اتالعان سايىس حالىقارالىق بىرىككەن كۇرەس الەمى قاۋىمداستىعىنىڭ كۇنتىزبەسىنە ەنىپ, ماڭىزدى جارىستاردىڭ قاتارىنا ەنىپ وتىر. بۇل ءوز كەزەگىندە ەلىمىزدىڭ ابىرويىن ارتتىرىپ, وتاندىق بۇقارالىق سپورتتىڭ دامۋىنا سۇبەلى ۇلەسىن قوسادى دەگەن ءۇمىتىمىز باسىم», دەدى ىرعىزباي دوسقانا ۇلى اتىنداعى گران-پري جوباسىنىڭ اۆتورى بادەلحان كامالحان ۇلى.
سۋىرىپسالما اقىنداردىڭ باسەكەسى دە بارقىتبەلدىڭ باۋرايىنداعى مەرەكەنىڭ كوركىن قىزدىرا ءتۇستى. تارتىسقا تولى سينكرەتتىك ونەر دوداسىنىڭ قورىتىندىسىنا سايكەس بيىلعى Assyl dombyra-نىڭ يەگەرى جامپوز اقىن رينات زايتوۆ اتانىپ, وعان تەمىر تۇلپار تابىس ەتىلدى. سول سەكىلدى «التىن دومبىرانىڭ» ءۇش دۇركىن يەگەرى مۇحتار نيازوۆ Assyltas ستيپەندياسىن يەلەندى.
بۇل رەتتە اتالعان ءىس-شارانىڭ وتكىزىلۋىنە ۇيىتقى بولعان كاسىپكەر دۋلات تاستەكەەۆ اقسۋات اۋدانىنداعى ەكپىن اۋىلىندا تۇراتىن كوپبالالى اناعا پاتەر كىلتىن تابىستاعانىن ايتا كەتۋ كەرەك.
اتالعان فەستيۆالدىڭ شارىقتاۋ شىڭى – 140 شاقىرىمعا سوزىلعان الامان بايگە بولدى دەسەك قاتەلەسپەيمىز. مۇنداي قاشىقتىقتاعى تۇلپارلار جارىسى بۇرىن-سوڭدى بولماعان دەيدى ۇيىمداستىرۋشىلار. سودان بولسا كەرەك, اتالعان الامان گيننەس رەكوردتار كىتابىنا ەنۋى مۇمكىن. كوكپەكتى اۋدانىنان باستاۋ العان جارىستا 17 شاباندوز ءبىر-ءبىرىن شاڭ قاپتىرۋعا تىرىستى. ايتسە دە فينالدىق مارەنىڭ سىزىعىنان 1-ءشى بولىپ 7 ساعات 12 مينۋتتا كاتونقاراعايلىق ەربولات توقسانوۆتىڭ تارپاڭ سايگ ۇلىگى اتتادى. 2-ءشى ساتىدان الماتىلىق سەكەناي بوبەكبايدىڭ بايشۇبارى كورىنسە, ۇشتىككە كوكجىرالىق اعزام سابۋروۆتىڭ ماڭماڭگەرى ءىلىندى. بايگەنىڭ بارلىق ساناتى بويىنشا جەڭىمپاز اتانعاندار اۆتوكولىك مىنسە, جۇلدەگەرلەر اقشالاي سىيلىققا يە بولدى.
مەرەكەنىڭ سوڭىندا قازاقستاندىق ونەر يەلەرىنىڭ گالا كونتسەرتى ۇسىنىلىپ, جەرگىلىكتى حالىقتىڭ كوڭىل كۇيىن ءبىر سەرپىلتتى.
يگى داستۇرگە اينالعان بۇل ءىس-شارانىڭ وتۋىنە وبلىس اكىمدىگىنىڭ قولداۋىمەن قازاق كۇرەسى قاۋىمداستىعىنىڭ ۆيتسە-پرەزيدەنتى بادەلحان كامالحان ۇلى مەن Tas Group كومپانيالار توبىنىڭ باسقارما توراعاسى دۋلات تاستەكەەۆ مۇرىندىق بولىپ كەلەدى.
اباي وبلىسى,
اقسۋات اۋدانى
