باسقوسۋدا قۇرامىنا بەلگىلى مۇسىنشىلەر, سۋرەتشىلەر, زەرگەرلەر, عالىمدار مەن قوعام قايراتكەرلەرى كىرەتىن مونۋمەنتتىك ونەر قۇرىلىستارىن ورناتۋ جونىندەگى كوميسسيا رەسپۋبليكالىق كونكۋرستىڭ قورىتىندىسى بويىنشا جوبالاۋ جۇمىستارىن قاراپ, ماقۇلدادى.
ناقتىراق ايتقاندا, الداعى ۋاقىتتا قوستاناي وبلىسى جانگەلدين اۋدانى تورعاي اۋىلىندا الاشتىڭ قوس ارىسى احمەت بايتۇرسىن ۇلى مەن مىرجاقىپ دۋلات ۇلىنا ەسكەرتكىش تۇرعىزىلادى. سونداي-اق الماتىدا ۇلت ۇستازى احمەت بايتۇرسىن ۇلىنا ەسكەرتكىش ورناتىلسا, كورنەكتى رەجيسسەر, تەاتر قايراتكەرى جۇمات شانينگە بيۋست قويىلادى.
«ەسكەرتكىشتەر – تاريحي جادىمىزدى جاڭعىرتۋدا جانە قوعامدىق سانانى قالىپتاستىرۋدا ەرەكشە مانگە يە. سوندىقتان جوسپارلاۋدان باستاپ ەسكەرتكىشتەردى ورناتقانعا دەيىنگى جۇمىسقا مۇقيات قاراۋ وتە ماڭىزدى. كوميسسيا توبى مۇسىندەردىڭ جۇمساق ماتەريالدان جاسالعان تولىق كولەمدەگى نۇسقاسىن جان-جاقتى قاراستىرۋى قاجەت», – دەدى مادەنيەت جانە سپورت ءمينيسترى داۋرەن اباەۆ.
سونىمەن قاتار كوميسسيا مۇشەلەرى جامبىل, قاراعاندى, قوستاناي, تۇركىستان جانە ۇلىتاۋ وبلىستارى اكىمدىكتەرىنىڭ يدەيالىق ۇسىنىستارىن ءبىراۋىزدان قولدادى. اتالعان وڭىرلەردە قازاقستاننىڭ حالىق جازۋشىسى شەرحان مۇرتازاعا, اقىن, مەملەكەت جانە قوعام قايراتكەرى كاكىمبەك سالىقوۆقا, نياز باتىر سايدالى بارقى ۇلىنا, ءىى دۇنيەجۇزىلىك سوعىس جانە ەڭبەك ارداگەرى جاقسىبەك وڭشىباەۆقا جانە تۇرىك ساياساتكەرى, مەملەكەت قايراتكەرى ادنان مەندەرسكە ارنالعان ەسكەرتكىشتەردى جوبالاۋ جوسپارلانعان.
