الىسقا بارماي-اق قويايىق, 22 شىلدەدە ۇقك شەكارا قىزمەتى تۇركىستان وبلىسى «جىبەك جولى» وتكىزۋ پۋنكتىندە ينسپەكتسيالىق تەكسەرۋ كەشەنى جانە قىزمەتتىك ءيتتى قولدانۋ ارقىلى كولىك قۇرالىن تەكسەرىپ, 35 كيلوعا تارتا ەسىرتكى زاتتارىن تاركىلەدى. الدىن الا بولجام بويىنشا گەروين بولۋى مۇمكىن. اتالعان فاكت بويىنشا قىلمىستىق ءىس قوزعالىپ, تەرگەۋ امالدارى ءجۇرىپ جاتىر.
ۇقك نۇر-سۇلتان قالاسى بويىنشا دەپارتامەنتى 26 شىلدەدە اسا ءىرى كولەمدەگى پسيحوتروپتى زاتتاردى ساتۋعا قاتىسى بار كۇدىكتى ا. ەسىمدى ەلوردالىق تۇرعىندى ۇستادى. پروتسەسسۋالدىق ءىس-شارا بارىسىندا زاڭسىز اينالىمنان 1,5 كگ «مەفەدرون», 1,4 كگ «الفا-PVP» جانە 659 تابلەتكا مدما («ەكستازي») تاركىلەندى. كۇدىكتى اككى ارەكەتىن جالدامالى پاتەردە جۇزەگە اسىرىپ, ينتەرنەت ونلاين الاڭى ارقىلى تۇراقتى تۇردە ساتىپ كەلگەن. اتالعان فاكتى بويىنشا قىلمىستىق كودەكستىڭ 297-بابى 3-بولىگى بويىنشا تەرگەۋ جۇرگىزىلۋدە. قىلمىسى دالەلدەنسە, 15 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
ال پەتروپاۆلدىق پوليتسەيلەر ەسىرتكى زەرتحاناسى جۇمىسىنىڭ جولىن كەستى. بۇگىندە سينتەتيكالىق ەسىرتكىنى ءوندىرۋ جانە وتكىزۋ فاكتىسى بويىنشا سوتقا دەيىنگى تەرگەپ-تەكسەرۋ ءجۇرىپ جاتىر. كۇدىكتى – 20 جاستاعى قالا تۇرعىنى. ونى ۇستاۋ كەزىندە وسىمدىك تەكتەس زات سالىنعان 8 پوليمەر تۇيىنشەك تاركىلەندى. تاعى 52 تۇيىنشەك پەن سۇيىقتىق قۇيىلعان ەكى ىدىس حالتۋرين كوشەسى بويىنداعى تۇرعىلىقتى مەكەنجايىنان تابىلدى. ساراپتاما ونىڭ «سپايس» دەگەن اتپەن بەلگىلى سينتەتيكالىق ەسىرتكى, سونداي-اق ونى دايىنداۋعا ارنالعان پرەكۋرسورلار ەكەنىن كورسەتتى. كۇدىكتىنىڭ ايتۋىنشا, ەسىرتكىنى ول جەكە پايدالانۋ ءۇشىن ساقتاعان. تاركىلەنگەن ەسىرتكىنىڭ سانى 200 رەتتىك دوزاعا جۋىق, ەسىرتكى زاتىنىڭ جالپى سالماعى شامامەن 8 گرامم. بۇل اسا ءىرى مولشەر ساناتىنا جاتادى. ونىڭ ۇيىنەن رەسپيراتورلار, گرامدىق تارازىلار, ولشەۋىش كولبالار مەن سينتەتيكالىق ەسىرتكىنى دايىنداۋعا ارنالعان باسقا دا قۇرىلعىلار تاركىلەنگەنىن اتاپ وتكەن ءجون.
ءبىزدىڭ مىسال كەلتىرگەنىمىز 2-3 وقيعا عانا. ەسىرتكى ساۋداسىنا قاتىستى قىلمىستار كۇن سايىن تىركەلمەسە دە, كۇن سايىن ءتارتىپ ساقشىلارى ونىڭ ءىزىن كەسۋ جۇمىستارىن جۇيەلى جۇرگىزىپ كەلەدى. بايقاساڭىزدار, سوڭعى ۋاقىتتا ء«لاززات شىڭىنا» ۇمتىلعانداردىڭ اراسىندا سينتەتيكالىق ەسىرتكىلەر سانگە اينالعان. بىلتىرعى كورسەتكىشتەرگە كوز جۇگىرتسەك, سينتەتيكالىق ەسىرتكىمەن بايلانىستى قۇقىق بۇزۋشىلىقتار كوپ تىركەلگەن وڭىرلەر كوشىن نۇر-سۇلتان, الماتى قالالارى جانە قاراعاندى وبلىسى باستاپ تۇر.
ەستەرىڭىزدە بولسا, مەملەكەت باسشىسى قاسىم-جومارت توقاەۆتىڭ 2021 جىلعى 1 قىركۇيەكتەگى قازاقستان حالقىنا جولداۋىندا ەسىرتكىنىڭ زاڭسىز اينالىمى بويىنشا بىرقاتار تاپسىرما بەرگەن بولاتىن. وعان سايكەس, ەسىرتكى نارىعىنداعى وزگەرىستەرگە جەدەل دەن قويۋ جانە زاڭنامالىق دەڭگەيدە سينتەتيكالىق ەسىرتكىنىڭ جاڭا تۇرلەرىن ەنگىزۋ ماقساتىندا بىرقاتار زاڭنامالىق باستامالار جۇزەگە اسىرىلعان. اتاپ ايتساق, اسا قاۋىپتى زاتتاردىڭ «قىلمىستىق» مولشەرى 1 گرامعا دەيىن تومەندەتىلدى جانە ولاردى وتكىزۋ ماقساتى بولماسا دا زاڭسىز ساقتاعانى ءۇشىن قىلمىستىق جاۋاپكەرشىلىك كۇشەيتىلدى. سونداي-اق پرەكۋرسورلار مەن كۇشتى اسەر ەتەتىن زاتتاردىڭ زاڭسىز اينالىمى ءۇشىن جاۋاپكەرشىلىكتى كۇشەيتۋدى كوزدەيتىن زاڭ جوباسى ازىرلەنگەن. 2022-2023 جىلدارعا ارنالعان جول كارتاسىنىڭ جوباسى قولعا الىنىپ, وندا شەتەلدە وندىرىلگەن ەسىرتكىنىڭ اكەلىنۋىنە, ولاردىڭ ەل ىشىندە تارالۋى مەن وندىرىلۋىنە جول بەرمەۋ, ەسىرتكىگە تاۋەلدىلەردى ەمدەۋ جانە وڭالتۋ شارالارى كوزدەلگەن.
سانداردى سويلەتسەك, بىلتىر ىشكى ىستەر ورگاندارى 2 384 ەسىرتكى قىلمىسىن, ونىڭ ىشىندە 1 436 ساتۋ, 407 اسا ءىرى كولەمدە ەسىرتكى ساقتاۋ فاكتىسىن انىقتاعان. 17 ەسىرتكى زەرتحاناسى جويىلعان. زاڭسىز اينالىمنان 14 تونناعا جۋىق ەسىرتكى تاركىلەندى, ونىڭ ىشىندە 450 كيلو گاشيش, 10 توننا ماريحۋانا, 5 كيلو گەروين جانە 142 كيلودان استام سينتەتيكالىق ءونىم بار. بيىل ءساۋىر ايىنا دەيىنگى دەرەكتەرگە كوز جۇگىرتسەك, 695 ەسىرتكى قىلمىسى انىقتالىپتى. ونىڭ ىشىندە 472 ساتۋ, 133 اسا ءىرى كولەمدە ساقتاۋ فاكتىلەرى تىركەلگەن. 8 ەسىرتكى زەرتحاناسى جويىلدى. زاڭسىز اينالىمنان 1 تونناعا جۋىق ەسىرتكى الىندى. اتاپ ايتقاندا, 260 كيلو گاشيش, 658 كيلو ماريحۋانا, جانە 42 كيلودان استام سينتەتيكالىق زات تابىلعان.
ايتا كەتۋ كەرەك, قازاقستان بۇۇ-نىڭ ەسىرتكىگە قارسى بارلىق ءۇش كونۆەنتسياسىنىڭ قاتىسۋشىسى بولا وتىرىپ, وسى سالاداعى ءوزىنىڭ حالىقارالىق مىندەتتەمەلەرىن پراكتيكالىق جانە زاڭنامالىق دەڭگەيدە جۇزەگە اسىرادى. 2019 جىلى جاڭا پسيحوبەلسەندى زاتتاردى باقىلاۋعا ەنگىزۋ مەحانيزمىن ايتارلىقتاي جەڭىلدەتكەن نورمالار ەنگىزىلدى. مەملەكەت باسشىسىنىڭ تاپسىرماسى بويىنشا ەسىرتكىنى ينتەرنەت ارقىلى تاراتقانى ءۇشىن قىلمىستىق جاۋاپكەرشىلىك كۇشەيتىلدى. ەسىرتكىنى جارنامالاۋ مەن ناسيحاتتاعانى ءۇشىن, ونىڭ ىشىندە گرافيتي-سۋرەتتەر مەن QR-كودتار ارقىلى جاۋاپكەرشىلىك كوزدەلەتىن قىلمىستىڭ جاڭا قۇرامى ەنگىزىلدى.
