ۋاقىت بىزبەن ساناسپايدى, ءبىز ۋاقىتپەن ساناسامىز. قوعامعا ءسىزدىڭ قالىپتان شىققانىڭىز قاۋىپتى. ءبىز بۇعان دەيىن ەڭ اۋىر دەرت – سانا دەرتى ەكەنىن ايتقانبىز. ادامنىڭ ويى نەعۇرلىم قىسقا بولسا, سوعۇرلىم ەنجار. مۇنى شىعىس عۇلاماسى رۋمي «سەنىڭ əلەمگە قارايتىن تەرەزەڭ كىر بولسا, مەنىڭ گۇلدەرىم ساعان باتپاق بوپ كورىنەدى», دەپ تۇيەدى. ەڭ نۇرلى ءلاززات – سانانىڭ ەركىندىگى. ءسىزدىڭ اقىلىڭىز بوستاندىقتا بولسا بولعانى, الدىڭىزدان شىققان قيىندىققا مۇقالمايسىز. ءبىز, سوزىمىزگە دالەل رەتىندە امەريكالىق اتاقتى ءمۇسىنشى زەنوس فرۋداكيستىڭ «بۇعاۋدان بوساۋ» سكۋلپتۋراسىن الماقپىز. اڭگىمە وسى شىعارمانىڭ جەلىسى جونىندە.
فيلادەلفياداعى بۇل كومپوزيتسيا جاننىڭ بوستاندىققا ۇمتىلىسىن بەينەلەيدى. 4 فيگۋرا, ياكي بىرتە-بىرتە ۇيقىدان ويانىپ, كىسەنىن شەشىپ, ماڭگىلىك ومىرگە بەت بۇرعان ءبىر ادام. ءبىزدى سۇيسىندىرگەن دە وسى كورىنىس, اۆتوردىڭ وزگەشە يدەياسى. ءمۇسىننىڭ داڭققا بولەنۋى دە سودان. ەركىندىك – ءومىر موتيۆاتسياسى, رۋحىڭىز تاۋەلسىز بولعاندا عانا ومىردەن ءلاززات الاسىز. تۇرلاۋسىز تىرلىكتىڭ تۇتقىنىنا تۇسكەن ءار پەندە ءومىر بويى جان ازاتتىعى ءۇشىن كۇرەسىپ وتەدى. سول كۇرەستە جەڭىسكە جەتۋ ءۇشىن بارىنشا شەڭبەرلەردەن قاشىڭىز.
قابىرعانى جارىپ شىققان كەيىپكەر, ول – ءبىز بەن ءسىز. ومىرشەڭ تۋىندىدان ءوزىڭىزدى كورەسىز. باقساڭىز, ءبىرىنشى فيگۋرا قابىرعاعا قادالعان مۋمياعا ۇقسايدى, تۇرمەگە جابىلعانداي, بۇعاۋلارعا بايلانعان. بوستاندىققا مۇمكىندىك جوق. ەكىنشىسى – ازاتتىق ءۇشىن كۇرەستىڭ باستالۋى, العاشقى تالپىنىستار. ءۇشىنشى فيگۋرا – ءىس جۇزىندە بوساتىلعان, ءسال الدىعا ۇمتىلسا, ماقساتىنا جەتەدى. ءتورتىنشى – ەركىندىك, شاتتىق, باقىت. ارمانىنا جەتكەن سوڭعى كەسكىننىڭ قاسىندا «وسىندا تۇر» دەگەن جازۋ ورنالاسقان. سىزگە ايتىپ تۇر؟ مۇسىنمەن بىرگە سۋرەتكە ءتۇسىپ, ونىڭ ءبىر بولىگى ەكەنىڭىزدى سەزىنۋىڭىز شارت.
اۆتور جەتكىزگەن تۇسىنىكتەن تاعان تارتا وتىرىپ, كەنەت ءبىزدىڭ ويىمىزعا «وماحا سيقىرشىسىنىڭ» وقيعاسى ساپ ەتە قالعانى. مۋلتيميللياردەر ۋوررەن باففەتتىڭ قايىرىمدىلىعىنىڭ قايدا اپارعانىن بىلەسىز بە؟ ونىڭ بايلىعى بۇگىندە 110,5 ملرد دوللارعا باعالانادى. ول ادامزات تاريحىنداعى ەڭ بەدەلدى جومارت كاسىپكەر. باففەت بيلل گەيتسپەن بىرگە باسقا دا امەريكالىق بايلاردى جارلىلارعا جاناشىرلىق جاساۋعا شاقىرادى. بۇل ۇسىنىستى مارك تسۋكەربەرگ, تەد تەرنەر, دجوردج لۋكاس, ماككەنزي سكوتت سەكىلدى تانىمال تۇلعالار قولداپ, دۇنيەلەرىنىڭ تەڭ جارىمىن جاقسىلىققا جۇمساۋعا ۋادە ەتتى.
ءسويتىپ, قىرۋار قارجىعا الەۋمەتتىك دەڭگەيى تومەن اۋىل-اۋىلداردا مەكتەپ, بالاباقشا, اۋرۋحانا سالىنىپ, ءتىپتى قايىرىمدىلىق قورلارى اشىلدى. بىراق مۇنداي اتاۋلى كومەك جالپى جاعدايدى جاقسارتپادى. جەر شارىنداعى ەڭ باي ادامداردىڭ ءوز بايلىعىنىڭ ءبىر بولىگىن ادامزات مۇقتاجىنا اۋدارىپ جاتقانىن كورۋ, ارينە, كەرەمەت, بىراق بۇل تەڭگەنىڭ ءىس جۇزىندە قالاي جۇمسالىپ جاتقانىن كورۋ كوڭىل قىنجىلتادى. تەگىن دۇنيەنىڭ ەشقاشان قادىرى بولعان ەمەس. ماڭداي تەرىڭىزبەن تاپپاعان تيىن الاقانىڭىزدى جىلىتپايدى. قانداي دا ءبىر جەڭىلدىك العان ادام ءوز شەڭبەرىنە بايلانا تۇسەدى. بۇل – ەركىڭىزدەن ايىرۋعا اپاراتىن جول.
اسپاننان اۋىزعا تۇسكەن ماتەريالدىق يگىلىك ءبىزدى رۋحاني دامۋعا يتەرمەلەمەيدى. كەرىسىنشە, ادام ءبىر نارسەگە وڭاي قول جەتكىزسە, قالعان بەلەستەردى دە بىرەۋدىڭ كومەگىنە سۇيەنىپ باعىندىرۋعا تىرىسادى. سوزىمىزگە افريكا ەلى ءتىرى مىسال بولا الادى. وعان ميللياردتاعان اقشا قۇيىلعانىن, اقىرى ەسەپسىز قارجىنىڭ كەدەيشىلىك ماسەلەسىن شەشپەگەنىن, حالىقتىڭ ءبىلىم دەڭگەيىن كوتەرمەگەنىن, مەديتسينالىق قىزمەت كورسەتۋدى جاقسارتپاعانىن كورەمىز. قايتا جانعا جايلى جاناشىرلىق سول ەلدەگى جەمقورلىقتى ۇدەتە ءتۇستى. كوردىڭىز بە, ميللياردەرلەردىڭ قارەكەتى جاقسىلىق اكەلگەن جوق, قايتا جاعىمسىز پروتسەستەردى قاپتاتتى. سوندىقتان ولار اقشا شاشپاي, قولدارىن قالتالارىندا ۇستاسا, الەم الدەقايدا جاقسى بولار ما ەدى دەگەن ويعا ۇيسىز…
جوق, شىنىندا دا, داۋلەتى تاسىعانداردىڭ نيەتى الەمگە جاقسىلىق اكەلۋ ەمەس ەدى. ولار وسى قايىرىمدىلىق ارقىلى قۇرمەتكە بولەنگىسى كەلدى. ساداقالارىنىڭ جارتىسى وزدەرىن جارنامالاۋعا جۇمسالسا, قالعانى ىسىراپ بولدى. ءارى كەدەيلەردى تاعى دا تاۋەلدى ەتتى, ءتاتتى بەرىپ الدادى, جىگەرىن تۇسادى. وسىلايشا, قوعامدى ەكىگە ءبولدى, جىكتەدى. ياعني كوگەندەلگەن ساناسىنا ەشقانداي ساۋلە سەپكەن جوق. ادامدار بۇرىنعىشا الدەقايدان ءبىر مەيىرىم بۇيىرىپ قالار دەگەن ۇمىتپەن عانا كۇنەلتتى.
ادام – ەڭ ۇلى جاراتىلىس, قۇداي وعان سۇمدىق ينستينك بەرگەن. ونى پايدالانباۋ – ەڭ اۋىر كۇنا. رۋحىڭىزدى وياتۋ ءۇشىن, اقىلىڭىزدى شىنىقتىرىڭىز. كوزىڭىز جەتكەن كوكجيەكتىڭ ارعى جاعىندا دا كوركەم كەڭىستىك بار, ونى تانۋ ءۇشىن جۇرەگىڭىزگە ءۇڭىلىڭىز. شەڭبەردەن شىقپاساڭىز, شەڭبەر سىزدەن شىقپايدى.
