جەرگىلىكتى باق وكىلدەرىمەن بولعان كەزدەسۋدە العاشقى بولىپ ءسوز العان اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ باسقارما باسشىسى الماگۇل قۇتانوۆا اتالعان جوبانىڭ ماقسات-مىندەتىن ءتۇسىندىرىپ ءوتتى.
ال ءوز كەزەگىندە ءسوز العان جەتىسۋ وبلىسى اكىمىنىڭ ورىنباسارى رۋستام ءالي: «شىنى كەرەك, بۇل جوبانى ءبىراز ۋاقىت كۇتتىك. شامامەن 2017-2018 جىلدارى جاقسى ناتيجە بەرگەن جوباعا سول كەزدە 600 ملن تەڭگە ءبولىنىپ, 600 ازامات گرانت ۇتىپ العان ەدى. اتالعان گرانت يەلەرى بۇگىنگە دەيىن ءوز جوبالارىن جۇزەگە اسىرۋدا», دەي كەلە, اۋقىمى كەڭەيگەن جوبا تۋرالى ناقتىلى مالىمەتتەرگە توقتالدى.
اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعى بىرلەسىپ جۇزەگە اسىرعان جوبا جاستاردىڭ كاسىپ اشىپ, جەكەلەي, الەۋمەتتىك جوبالارىن ىسكە اسىرۋىنا مۇمكىندىك بەرمەك. 18 بەن 28 جاس ارالىعىنداعى ازاماتتار مەن وسال ساناتتاعى جاستار, جۇمىسسىزدار, از قامتىلعان وتباسىنان تۇراتىن, جەتىم جانە مۇگەدەك جاندار, مۇگەدەك بالانى تاربيەلەپ وتىرعان اتا-انالار, كوپبالالى وتباسى, «التىن القا» جانە «كۇمىس القا» يەگەرلەرىنە اتالعان جوباعا قاتىسۋعا مول مۇمكىندىك بار.
كورسەتىلگەن ساناتقا جاتاتىن جاندار شىلدە ايىنىڭ 26-سىنان تامىزدىڭ 10-ى ارالىعىندا Zhas project جوباسىنىڭ الەمەتتىك جەلىدەگى پاراقشاسىنا ءوتىنىم قالدىرا الادى. العاشقى كەزەڭدە وزدەرىنىڭ جوبالارىن ۇسىنىپ, ءوتىنىم قالدىرسا, كەلەسى كەزەڭدە ارنايى قۇرىلعان كوميسسيانىڭ زەردەلەۋىمەن گرانت يەسى اتانۋىنا بولادى. جيىندا بۇل جايلى «تامشىبۇلاق» قوعامدىق بىرلەستىگىنىڭ جەتەكشىسى جانات تولەمىسوۆا ەگجەي-تەگجەيلى باياندادى.
ايتا كەتەرلىگى, الماتى جانە جەتىسۋ, قاراعاندى, ماڭعىستاۋ مەن تۇركىستان وبلىستارىندا جۇزەگە اسىرىلاتىن جوباعا قاتىسىپ, ءوز وتىنىمدەرىن ۇسىنعان جانە ناتيجەگە قول جەتكىزە العان جاستارعا 1 ميلليون تەڭگە گرانت بەرىلمەك. جيىن بارىسىندا وسىعان توقتالعان قوناقتار كوپتەن بەرى ەلگە تانىس جوبا تۋرالى تولىققاندى اقپاراتتى پاراقشادان ونلاين وقي الاتىنىن دا اتاپ ءوتتى.
