بىرىنشىدەن, ۇكىمەت بيۋدجەت سالاسى قىزمەتكەرلەرىنىڭ جالاقىسىن كوتەرۋ جانە الەۋمەتتىك تولەمدەردى يندەكستەۋ جونىندەگى بارلىق الەۋمەتتىك مىندەتتەمەنى ورىندايدى. ەكىنشىدەن, جەرگىلىكتى اتقارۋشى ورگاندارمەن بىرلەسىپ, جۇمىس ورىندارىن قۇرۋ, بىلىكتىلىكتى ارتتىرۋ, جاڭا داعدىلاردى يگەرۋ, سونداي-اق تابىسى تومەن الەۋمەتتىك وسال توپتاردى قولداۋ ارقىلى تابىسى جوق ازاماتتاردىڭ ەكونوميكاسىنا الەۋمەتتىك ىقپالداسۋ شارالارى كەشەنى قولعا الىنىپ جاتىر. ۇشىنشىدەن, ەڭبەكاقىداعى الشاقتىقتى قىسقارتۋ جانە وندىرىستىك پەرسونالدىڭ جالاقىسىن ءوسىرۋ بويىنشا بيزنەس قوعامداستىقپەن بىرلەسىپ قابىلدانعان جۇيەلى شەشىمدەر – ەڭبەك ادامىنىڭ تابىسىن ارتتىرۋدا سارالانعان ءتاسىل.
جالپى, ۇكىمەت حالىقتىڭ تابىسىن ارتتىرۋ جونىندەگى مىندەتتى كەزەڭ-كەزەڭىمەن شەشۋدە. وسىلايشا, باعدارلامانىڭ تىكەلەي ءىس-شارالارى اياسىندا ءبىرىنشى جارتىجىلدىقتىڭ قورىتىندىسى بويىنشا بيۋدجەت سالاسىنىڭ 850 مىڭ قىزمەتكەرىنىڭ, كۆازيمەملەكەتتىك سەكتوردىڭ 240 مىڭ وندىرىستىك پەرسونالىنىڭ, 1,2 ملن بيزنەس-قۇرىلىم قىزمەتكەرلەرىنىڭ جالاقىسى ۇلعايدى, الەۋمەتتىك تولەمدەر يندەكستەلدى.
ال جاناما ءىس-شارالار ەكونوميكانى يندۋستريالاندىرۋمەن جانە ارتاراپتاندىرۋمەن, كاسىپكەرلىكتى دامىتۋمەن ۇشتاساتىن ناتيجەلى جۇمىسپەن قامتۋدى جولعا قويۋعا باعىتتالعان.
50 كومپانيانىڭ ءىرى ينۆەستيتسيالىق جوبالاردى ىسكە اسىرۋىنىڭ مۋلتيپليكاتيۆتىك اسەرى – ولاردىڭ اينالاسىندا شاعىن جانە ورتا كاسىپورىندار بەلدەۋىن قۇرۋ جانە وندىرىستەردى وقشاۋلاۋ. بۇل وڭىرلەردىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى جانە جاڭا جۇمىس ورىندارىن قۇرۋدى قامتاماسىز ەتەدى. ينۆەستيتسيالىق جوبالاردى ىسكە اسىرۋ شەڭبەرىندە 2025 جىلعا دەيىن 2 ملن-نان اسا جاڭا جۇمىس ورنىن قۇرۋ جوسپارلانىپ جاتىر. ونىڭ ىشىندە 2022 جىلى 444 مىڭ جۇمىس ورنىن قۇرۋ كوزدەلگەن. بۇگىندە 249 مىڭ جۇمىس ورنى قۇرىلدى, ياعني, جىلدىق جوسپاردىڭ 56%-ى ورىندالدى دەگەن ءسوز.
جۇمىس ورىندارىن قۇرۋ بويىنشا جوسپارلى كورسەتكىشتەرگە قول جەتكىزۋ – بارلىق دەڭگەيدەگى اكىمدەردىڭ باستى مىندەتى. بارلىق كورسەتكىشتەر وڭىرلىك جۇمىسپەن قامتۋ كارتالارىندا نەگىزگە الىندى, بۇعان تۇراقتى مونيتورينگ جۇرگىزىلەدى.
2025 جىلعا دەيىن 266 مىڭنان اسا جۇمىس ورنىن قۇرۋدى كوزدەيتىن نەگىزگى 847 ينۆەستيتسيالىق جوبالار پۋلى قالىپتاستى. ولار دايىن ءونىمنىڭ يمپورتىن الماستىرۋعا جانە ەكسپورتىنا باعىتتالعان. ونەركاسىپتى دامىتۋ قورى قارسى مىندەتتەمەلەردى ورىنداۋ شارتتارىندا جەڭىلدىكتى مولشەرلەمە بويىنشا 305 ملرد تەڭگە سوماسىندا قاراجات ءبولۋدى كوزدەيدى.
مەملەكەت باسشىسىنىڭ تاپسىرماسى بويىنشا «جاستار پراكتيكاسى» جوباسى (23,5 مىڭ ادامدى قامتۋ) بويىنشا تاعىلىمدامانىڭ ۇزاقتىعى 6 ايدان 12 ايعا دەيىن, ال «العاشقى جۇمىس ورنى» جوباسى (96 مىڭ ادامدى قامتۋ) بويىنشا 12 ايدان 18 ايعا دەيىن ۇزارتىلدى.
2022 جىلدىڭ 1 ماۋسىمىنداعى جاعداي بويىنشا 546 جاستار گرانتى بەرىلدى, 1,1 مىڭ جاس العاشقى جۇمىس ورنىنا تۇردى, جاستار پراكتيكاسىمەن 8,6 مىڭ جاس قامتىلدى. كوللەدجدەر جانىنان 21 شاعىن كاسىپورىن (جوسپارلانعان 100 كاسىپورىننان) قۇرىلدى, جوعارى وقۋ ورىندارى جانىنان 63 مانساپتىق ورتالىق (103-ءى جوسپارلانعان) اشىلدى.
حالىقتىڭ الەۋمەتتىك وسال توپتارىنا (ونىڭ ىشىندە ۇيدەن شىقپاي) تۇراقتى تابىس تابۋىنا مۇمكىندىكتەر جاسالىپ جاتىر. وتباسىن قولداۋ ورتالىقتارى (ەل بويىنشا – 35) ء«بىر تەرەزە» قاعيداتى بويىنشا (زاڭدىق, پسيحولوگيالىق, الەۋمەتتىك, تۇرعىن ءۇي جانە ت.ب.) كەشەندى كەڭەس بەرەدى. مىسالى, كوپ بالالى وتباسى مۇشەلەرىن سۇرانىستاعى ماماندىقتارعا قىسقا مەرزىمدى وقىتۋ, ءوز بيزنەسىن اشۋعا قولداۋ كورسەتۋ, وتباسى ينستيتۋتىن نىعايتۋ جونىندەگى ءىس-شارالاردى ۇيىمداستىرۋ جانە وتكىزۋ باسىم باعىت بولىپ سانالادى.
سونىمەن قاتار مۇگەدەكتىگى بار ەڭبەككە قابىلەتتى 419 مىڭ ادامنىڭ 104 مىڭى نەمەسە شامامەن 24,8%-ى جۇمىس ىستەيدى. «كۇمىس جاس» جوباسى بويىنشا 226 ادام جۇمىسقا ورنالاستىرىلدى.
