رەسمي مالىمەتكە سۇيەنسەك, جەرگىلىكتى پوليتسيا قىزمەتكەرلەرىنە پانفيلوۆ اۋدانىنا قاراستى شولاقاي اۋىلى تۇرعىنىنىڭ اتىنان كامەلەتكە تولماعان قىزىنىڭ جوعالىپ كەتكەنى تۋرالى ارىز تۇسكەن. 10-سىنىپقا كوشكەن قۇرالاي قيسابەكوۆا كەشكىسىن اۋىلداعى قۇربىسىنا قوناققا بارىپ, ۇيىنە قايتىپ ورالماعان. اتالعان ارىز بويىنشا جەتىسۋ ءوڭىرىنىڭ پوليتسەيلەرى قىزدى ىزدەۋ جۇمىستارىن جۇرگىزگەن. كەشەندى جەدەل-ىزدەستىرۋ ءىس-شارالارىنىڭ ناتيجەسىندە قۇزىرلى ورگاندار ونىمەن جىنىستىق قاتىناسقا ءتۇسىپ, ءىسىن جاسىرۋ ءۇشىن ايۋاندىقپەن ولتىرگەنىن مويىنداعان جەرگىلىكتى رۋستام احمەتوۆ ەسىمدى ازاماتتى انىقتايدى.
كۇدىكتىنىڭ ايعاقتارىن تەكسەرۋ جانە ناقتىلاۋ بارىسىندا جابىرلەنۋشىنىڭ ءمايىتى اۋىلدىڭ شەتىنەن تابىلعان, قازىر سوت-مەديتسينالىق ساراپتاماعا جىبەرىلدى.
«قازاقستان رەسپۋبليكاسى قىلمىستىق كودەكسىنىڭ 99-بابىنىڭ 2-بولىگى (كىسى ءولتىرۋ), 10-تارماعى (وزگە قىلمىستى جاسىرۋ ماقساتىندا) جانە 14-تارماعى (كامەلەتكە تولماعان ادامدى ءولتىرۋ) بويىنشا قىلمىستىق ءىس قوزعالدى. قازاقستان رەسپۋبليكاسى قىلمىستىق كودەكسىنىڭ 120-بابىنىڭ 3-1-بولىگى, 1-تارماعى (كامەلەتكە تولماعان ادامدى زورلاۋ) بويىنشا ءومىر بويىنا باس بوستاندىعىنان ايىرۋعا دەيىنگى جازا تاعايىندالدى. ونىڭ سانكتسياسىندا 17 جىلعا دەيىن باس بوستاندىعىنان ايىرۋ جازاسى قاراستىرىلعان», دەيدى جەتىسۋ وبلىسى پوليتسيا دەپارتامەنتىنىڭ ءباسپاسوز قىزمەتى.
كۇدىكتى ۋاقىتشا ۇستاۋ يزولياتورىنا قامالدى, ءىس بويىنشا بىرقاتار قاجەتتى ساراپتاما تاعايىندالدى. تەرگەۋدى وبلىستىق پوليتسيا دەپارتامەنتىنىڭ تەرگەۋشىلەرى جۇرگىزىپ جاتىر.
تۋىستارىنىڭ ايتۋىنشا, 15 جاسار قۇرالاي 21 شىلدەدە ۇيىنەن شىعىپ, قايتا ورالماعان. ءمايىت اراعا اپتا سالىپ, 28 شىلدەدە تابىلدى. ايتا كەتەيىك, كۇدىكتى بۇعان دەيىن دە ءىستى بولعان ەكەن. مۇنى قۇرالاي قيسابەكوۆانىڭ تۋىسى كامشات كوپباەۆا دا ايتىپ وتىر.
«وسىدان بەس-التى جىل بۇرىن كامەلەت جاسقا تولماعان قىزدى زورلاپ, سوتتالدى. بىراق جازا مەرزىمىن تولىق وتەمەي, تارتىبىنە بايلانىستى بوستاندىققا شىقتى. تۇرمەدەن بوساعان سوڭ تاعى ءبىر قىزدى زورلاپ, قىلمىستىق جازادان جالتارۋ ماقساتىندا, سول قىزعا ۇيلەندى. ەندى, مىنە, ءبىزدىڭ قىزىمىز سول ايۋاننىڭ كەزەكتى قۇربانى بولىپ وتىر», دەيدى ك.كوپباەۆا.
ەگەر ادام بۇرىن دا وسىنداي ارەكەتى ءۇشىن سوتتالعان بولسا, ەندى تۋرا سول قىلمىسىن بوستاندىققا شىققان سوڭ قولى قالت ەتپەي قايتالاسا, «نە ءۇشىن جانە كىمنىڭ كومەگىمەن مەرزىمىنەن بۇرىن بوستاندىققا شىقتى ەكەن؟» دەگەن ساۋالدىڭ تۋىنداۋى انىق.
قازىر الەۋمەتتىك جەلىدە الىپقاشپا اڭگىمەلەر جەلدەي ەسۋدە. قاندى قىلمىس 4 ادامنىڭ قولىمەن جاسالعاندىعى تۋرالى بۇراتارتپا اقپاراتتار دا ءورىپ ءجۇر. قۇزىرلى ورگاندار كۇدىكتى زاڭ بويىنشا ەڭ اۋىر جازانى ارقالايتىنىن جەتكىزدى.
«جاركەنت وڭىرىندەگى جاعداي بويىنشا كوبى سۇراپ جاتىر. بىردەن ايتايىن, قىلمىسكەر ءبىر ادام. ول بۇرىن زورلاۋ بابى بويىنشا سوتتالعان. قازىر قاندىقول قاماۋدا. ءارى قارايعى جازاسىن قۇزىرلى ورگاندار سوڭىنا دەيىن ءار دەتالىن زەرتتەپ, جەتكىزەتىن بولادى. ول جاقتان شىعۋى ەندى نەعايبىل. كەشە قىز جەر قوينىنا تاپسىرىلدى. قىزدىڭ وتباسىنا جان-جاقتى كومەك كورسەتىلۋدە. اۋداندا جاعداي تۇراقتى. ساقتىق شارالارى جاسالعان. تەك چاتتار مەن الەۋمەتتىك جەلىلەردە ءارتۇرلى جالعان اقپاراتقا دۇرلىگىپ جاتقان ازاماتتار بارشىلىق. ولاردى تۇسىنۋگە بولادى. الايدا اينالىپ كەلگەندە زارداپ شەگەتىن ءوزىمىز», دەيدى پانفيلوۆ اۋدانى اكىمىنىڭ ءباسپاسوز حاتشىسى نۇربول قاناعات.
كەز كەلگەن قىلمىس بولسىن, قىلمىسكەر بولسىن, ۇلتقا بولىنبەيدى. ايىپتالۋشى ءادىل جازاسىن تارتادى دەگەن ۇمىتتەمىز. وقيعا بارىسى ۇلتارالىق سيپات الىپ كەتپەس ءۇشىن, قازىر شولاقاي اۋىلىندا قاۋىپسىزدىك شاراسى كۇشەيتىلگەن.
ايتا كەتەيىك, الەۋمەتتىك جەلىلەردە وسى دەرەككە قاتىستى جالعان اقپارات توقتاۋسىز تاراتىلۋدا. بۇل ءۇردىس قوعامدىق كوڭىل كۇيدى بۇزىپ, قۇقىق قورعاۋ ورگاندارىنا سەنىمسىزدىك تۋدىرۋدا. وسىعان وراي قولدانىستاعى زاڭناماعا سايكەس كورىنەۋ جالعان اقپارات تاراتقانى ءۇشىن جاۋاپكەرشىلىك قارالاتىنىن ەسكەرتەمىز جانە ازاماتتاردان تەك رەسمي دەرەككوزدەرگە سەنىم ءبىلدىرۋىن سۇرايمىز. سونداي-اق تۋىستارىنىڭ كامەلەتكە تولماعان قىزدى ءوز بەتىنشە ىزدەۋ جۇمىستارىنىڭ ناتيجەسى بولماعاننان كەيىن پوليتسيانىڭ كومەگىنە جۇگىنگەنى جانە ءتارتىپ ساقشىلارى ءجاسوسپىرىم قىزدىڭ ءىز-ءتۇزسىز جوعالعانى تۋرالى دەرەكتى دەرەۋ تىركەپ, ىزدەۋ امالدارىنا كىرىسكەنىن اتاپ وتەمىز.
جەتىسۋ وبلىسى
