قارجى مينيسترلىگىنىڭ مەملەكەتتىك كىرىستەر كوميتەتى باسقارما باسشىسىنىڭ ورىنباسارى اينۇر سارتاەۆانىڭ حابارلاۋىنشا, ەۋرازيالىق ەكونوميكالىق وداقتىڭ كەدەن اۋماعىنا باسقا ەلدەردەن (ياعني ەاەو قۇرامىنا كىرمەيتىن مەملەكەتتەردەن) ۋاقىتشا اكەلىنگەن كولىك قۇرالدارى شەتەلدىك تاۋارلار بولىپ سانالادى جانە كەدەندىك باقىلاۋدا بولادى. سوندىقتان مۇنداي كولىكتەردى قازاقستان اۋماعىندا پايدالانۋ ءۇشىن الدىمەن كەدەن جاعىنان تەكسەرىپ, الىمدار مەن سالىقتاردى تولەگەننەن كەيىن عانا قولدانۋعا رۇقسات بەرىلەدى. «شەتەلدىك ازاماتتار ء«وزىمىز پايدالانامىز» دەپ سىرتتان كولىك كىرگىزگەنىمەن ونى قازاقستاندىقتارعا ساتۋ ماقساتىندا تاسىمالدايتىنى بايقالۋدا. ويتكەنى ولار كولىك قۇرالىن اكەلگەننەن كەيىن ءبىراز ۋاقىتتان كەيىن وزدەرى قازاقستان اۋماعىنان كەتىپ قالادى, ال كولىگى كەدەندىك تازارتۋدان وتپەستەن ەلىمىزدە قالادى. ال زاڭ بويىنشا ۋاقىتشا اكەلۋ مەرزىمى اياقتالعاننان كەيىن (بۇعان ءبىر جىل ۋاقىت بەرىلەدى) اۆتوكولىك قۇرالدارى ەاەو اۋماعىنان شىعىپ كەتۋى قاجەت. ەگەر شىعىپ كەتپەسە, ەاەو-تىڭ قولدانىستاعى زاڭناماسىنا سايكەس ءتيىستى شارالار قولدانىلادى», دەيدى ا.سارتاەۆا.
كوميتەت پوليتسيا دەپارتامەنتتەرىمەن بىرلەسە وتىرىپ, ارنايى رەيدتىك شارالار جۇرگىزگەن. وسىلايشا, ۋاقىتشا ءجۇرۋ مەرزىمى اياقتالعان 116 اۆتوكولىك قۇرالىن انىقتاعان. بۇل اۆتوكولىكتەر قازىرگى تاڭدا ۋاقىتشا ساقتاۋ قويمالارىنا ورنالاستىرىلعان. بۇل باعىتتاعى جۇمىستاردى ءارى قاراي جالعاستىرامىز, دەيدى ماماندار.
مەملەكەتتىك كىرىستەر كوميتەتى قازاقستان ازاماتتارىنان جەكە پايدالانۋعا ارنالعان اۆتوكولىكتى ساتىپ الاردا اباي بولىپ, ەلىمىزدىڭ زاڭناماسىن ساقتاۋعا شاقىرادى. «ەگەر ساتىپ العالى جاتقان اۆتوكولىگىڭىزدىڭ شىعۋ تەگى نەمەسە زاڭدىلىعى كۇدىك تۋعىزار بولسا, وندا قازاقستاندا كەدەندىك تازارتۋدان وتكەنى جانە تيەسىلى كەدەندىك الىمدار مەن سالىقتار تولەگەنى تۋرالى اقپاراتتى مەملەكەتتىك كىرىستەر ورگاندارىنان بىلۋگە بولادى. ول ءۇشىن كوميتەتكە (تەل: 8 7172 71 77 24) نەمەسە تۇرعىلىقتى مەكەنجاي بويىنشا مەملەكەتتىك كىرىستەر دەپارتامەنتىنە جانە قم مكك بايلانىس ورتالىعىنا حابارلاسۋعا بولادى», دەيدى ا.سارتاەۆا.
