مادەني, رۋحاني ءىس-شارا الدىمەن اقتوبە قالاسىندا ابىلقايىر حان مەن بوپاي حانىمنىڭ ونەگەگە تولى ءومىرى مەن قوعامدىق-ساياسي قىزمەتتەرى تۋرالى تانىمدىق كونفەرەنتسيامەن باستالدى. سونداي-اق ابىلقايىر حان مەن بوپاي حانىمنىڭ ومىرلەرىن زەرتتەۋشى تاريحشىلار مەن ولكەتانۋشىلار تاراپىنان ورتاق تاقىرىپقا قاتىستى وي-پىكىرلەر ايتىلدى.
ودان كەيىن زيالى قاۋىم وكىلدەرى, ابىلقايىر حان مەن بوپاي حانىمنىڭ ۇرپاقتارى حان بابا ماڭگىلىك مەكەن تاپقان ايتەكە بي اۋدانىنا اتباسىن تىرەپ, تولىباي اۋىلىنداعى «ابىلقايىر حان» مۋزەيىندە ۇلى تۇلعا مەن جارىنىڭ ومىرىمەن تانىستى. سوڭىندا مۋزەيگە بوپاي حانىمنىڭ پورترەتى سىيعا تارتىلدى.
رۋحاني ءىس-شارانىڭ شارىقتاۋ شىڭى «حان مولاسى» – ابىلقايىر حان كەسەنەسىنىڭ باسىندا جۇزەگە استى. الدىمەن قورىم باسىندا مال سويىلىپ, قۇران باعىشتالدى. اقىندار ايتىس كورىگىن قىزدىرىپ, اۋدان ونەرپازدارى كونتسەرت قويسا, وبلىستىق ت.احتانوۆ اتىنداعى دراما تەاتردىڭ ارتىستەرى تەاترلاندىرىلعان قويىلىم كورسەتتى. ۇلتتىق سپورت ويىندارى دا بۇل استىڭ كوركىن كەلتىردى. جالپى, اتالعان اۋقىمدى جيىنعا ەلىمىزدىڭ تۇپكىر-تۇپكىرىنەن زيالى قاۋىم وكىلدەرى كەلىپ قاتىسسا, ونى 300-گە جۋىق اۋدان حالقى تاماشالادى.
ءىس-شارا سوڭىندا ونى ۇيىمداستىرۋعا كومەك قولدارىن سوزعان جومارت جۇرەكتى دەمەۋشىلەر مەن ايتەكە بي اۋدانىنىڭ اكىمدىگىنە بابالار ۇرپاقتارى شىنايى العىستارىن جەتكىزدى.
ا.ابەنوۆا
اقتوبە وبلىسى,
ايتەكە بي اۋدانى
