مەملەكەت باسشىسى قاسىم-جومارت توقاەۆ جاڭا قازاقستان تەحنولوگياسى قۋاتتى ەلگە اينالۋ كەرەك ەكەنىن, بۇل ءۇشىن ەلدىڭ بولاشاعىنا تەحنيكالىق سالانىڭ ماماندارى كوپتەپ قاجەت بولاتىنىن ايتقان-دى. وسىعان وراي 2022-2023 وقۋ جىلىنا جوعارى ءبىلىم الۋعا بەرىلگەن مەملەكەتتىك ءبىلىم بەرۋ گرانتىنىڭ كوپ بولىگى تەحنيكالىق ماماندار دايارلاۋعا قاراستىرىلعان. جالپى, الداعى وقۋ جىلىنا باكالاۆرياتقا 73 مىڭعا جۋىق گرانت ءبولىندى. عىلىم جانە جوعارى ءبىلىم مينيسترلىگىنىڭ مالىمدەۋىنشە, وسىنشاما گرانتتىڭ باسىم بولىگى «ينجەنەرلىك, وڭدەۋ, قۇرىلىس سالالارى» ءبىلىم بەرۋ باعدارلاما توپتارىنا ءبولىندى, ونىڭ سانى 17 794 گرانتتى قۇرايدى. ال «پەداگوگيكالىق عىلىمدارعا» – 10 810 گرانت, «اقپاراتتىق-كوممۋنيكاتسيالىق تەحنولوگيالار» سالاسىنا – 9 103 گرانت, «جاراتىلىستانۋ عىلىمدارى, ماتەماتيكا جانە ستاتيستيكا» باعىتىنا – 6 288 گرانت تيەسىلى. سونداي-اق تەحنيكالىق باعىتتارعا ەرەكشە نازار اۋدارىلىپ, مەملەكەتتىك تاپسىرىستىڭ ۇلەسى 60%-عا دەيىن ۇلعايدى.
پرەزيدەنت تاپسىرماسىن ورىنداۋ ماقساتىندا ءبىلىم بەرۋ گرانتىنىڭ جاڭا ءتۇرى انىقتالدى. بۇل «حالىقتىڭ تىعىز ورنالاسقان جانە باتىس وڭىرلەرىنىڭ جاستارىنىڭ جەتەكشى جوعارى وقۋ ورىندارىندا وقۋعا ارنالعان ماقساتتى ءبىلىم بەرۋ گرانتى» دەپ اتالادى. جاڭا گرانت اتىراۋ جانە ماڭعىستاۋ وبلىستارىنىڭ 10 مىڭ تالاپكەرىنە جوعارى وقۋ ورىندارىندا ءبىلىم الۋ ءۇشىن ماقساتتى گرانت الۋعا مۇمكىندىك بەرەدى. ماقساتتى «اتىراۋ-ماڭعىستاۋ» گرانتىنا كونكۋرسقا بيىلعى مەكتەپ تۇلەكتەرى قاتىسا الادى. بىراق ولار ءبىر ۋاقىتتا جالپى كونكۋرسقا, ونىڭ ىشىندە «سەرپىن» بايقاۋىنا قاتىسا المايدى.
