بالاباقشالاردا بالالارعا قاراۋ جاعدايىنا, قىزمەتكەرلەردىڭ جۇمىسىنا, سونداي-اق بۇلدىرشىندەردىڭ دەنساۋلىعىنا ءارى ومىرىنە زيان كەلتىرۋگە قاتىستى شاعىمدار بار.
«سوڭعى تۇسكەن ارىز-شاعىمدار بويىنشا تەكسەرۋ جۇرگىزىلىپ, بالالاردىڭ ءومىرى مەن دەنساۋلىعىنا زيان كەلتىرۋ فاكتىلەرى بويىنشا 5 اكىمشىلىك ءىس قوزعالدى. ىشكى ىستەر مينيسترلىگى مەكتەپكە دەيىنگى ۇيىمدارعا قاتىستى 15 اكىمشىلىك ءىس قوزعادى. رەزونانس تۋدىرعان وقيعالاردىڭ ءبىرى رەتىندە نۇر-سۇلتان قالاسىنداعى «ساتي» جەكەمەنشىك بالاباقشاسىندا بۇلدىرشىندەرگە قاتىستى زاڭسىز فاكتىلەر تىركەلگەن. وندا بالاباقشا قىزمەتكەرلەرى بالالاردى سۇيرەپ, بۇرىشقا تۇرعىزىپ, داۋىس كوتەرگەن», دەلىنگەن مينيسترلىك مالىمەتىندە.
ال اتىراۋ قالاسىنداعى جەكەمەنشىك مەكتەپكە دەيىنگى مەكەمەدە توپتاعى بالالاردىڭ كوپ بولۋىنا بايلانىستى تاربيەشى بالالارعا دۇرىس باقىلاۋ جۇرگىزبەگەن. سونىڭ سالدارىنان بالاباقشاداعى ءۇش ءبۇلدىرشىن 2019 جىلى تۋعان قىزدى ۇرىپ-سوعىپ, دەنەسىنە زاقىم كەلتىرگەن.
«قىزىلوردادا جەكەمەنشىك بالاباقشالاردىڭ ءبىرىنىڭ جۇرگىزۋشىسى مەكەمەگە 7 بالانى الىپ كەلگەن. بالالاردى بالاباقشاعا كىرگىزگەن تاربيەشىنىڭ كومەكشىسى ءبىر بالانىڭ كوشەدە قالىپ قويعانىن بايقاماي قالعان. جۇرگىزۋشى دە بالاعا ءمان بەرمەي, بالانى قاعىپ كەتكەن. وسىنىڭ سالدارىنان بالا اۋرۋحاناعا بارا جاتقان جولدا كوز جۇمدى. وسى فاكتى بويىنشا قىلمىستىق ءىس قوزعالدى», دەپ اتالىپ وتكەن ۆەدومستۆو حابارلاماسىندا.
ايتا كەتەيىك, قازىرگى كەزدە بالاباقشا اشۋ جانە جۇمىس ىستەۋ ءۇشىن ۋاكىلەتتى ورگانعا حابارلاما جىبەرۋ جەتكىلىكتى. دەگەنمەن ءبىلىم باسقارمالارىنىڭ مەكتەپكە دەيىنگى ۇيىمداردى ارالاپ, تەكسەرۋگە زاڭدى قۇقىعى جوق.
«وسىعان بايلانىستى بالاباقشالاردى ليتسەنزيالاۋ باستاماسى قولعا الىنىپ جاتىر. بۇل بالاباقشالارداعى جاعدايعا, قىزمەتكەرلەردىڭ بىلىكتىلىگىنە, سانيتارلىق جانە ءورت قاۋىپسىزدىگى ەرەجەلەرىنىڭ ساقتالۋىنا, تاماق ونىمدەرىنىڭ ساپاسىنا, بەينەباقىلاۋ كامەرالارىنىڭ جۇمىسىنا جانە باسقا دا تالاپتاردى بەلگىلەيدى», دەلىنگەن مينيسترلىك تۇسىنىكتەمەسىندە.
