«مەملەكەت باسشىسىنىڭ جارلىعىمەن گۇلسارا مەرەيقىزى ارىستانقۇلوۆا قازاقستان رەسپۋبليكاسىنىڭ فرانتسۋز رەسپۋبليكاسىنداعى توتەنشە جانە وكىلەتتى ەلشىسى لاۋازىمىنا تاعايىندالدى», دەلىنگەن حابارلامادا.
سونداي-اق مەملەكەت باسشىسىنىڭ جارلىعىمەن جان سەرجان ۇلى عاليەۆ قازاقستان رەسپۋبليكاسىنىڭ فرانتسۋز رەسپۋبليكاسىنداعى توتەنشە جانە وكىلەتتى ەلشىسى لاۋازىمىنان, قازاقستان رەسپۋبليكاسىنىڭ موناكو كنيازدىگىندەگى توتەنشە جانە وكىلەتتى ەلشىسى, يۋنەسكو جانىنداعى قازاقستان رەسپۋبليكاسىنىڭ تۇراقتى وكىلى قىزمەتىن قوسا اتقارۋدان بوساتىلدى.
گۇلسارا ارىستانقۇلوۆا 1971 جىلى 15 قازاندا جامبىل وبلىسىندا تۋعان. قازاق مەملەكەتتىك الەم تىلدەرى ۋنيۆەرسيتەتىن, «بولاشاق» باعدارلاماسى بويىنشا ستراسبۋرگ قالاسىنىڭ گۋمانيتارلىق عىلىمدار ۋنيۆەرسيتەتىن جانە قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىن بىتىرگەن. حالىقارالىق قاتىناستار سالاسىنداعى دوكتور.
ديپلوماتيالىق قىزمەتىن 1998 جىلى قازاقستاننىڭ بەلگياداعى ەلشىلىگىنىڭ اتتاشەسى رەتىندە باستادى. قر ءسىم ورتالىق اپپاراتىندا تمد ىستەرى جونىندەگى كوميتەتتىڭ ەكىنشى, ءبىرىنشى حاتشىسى, حالىقارالىق اقپارات كوميتەتىنىڭ باسقارما باسشىسى لاۋازىمدارىن اتقاردى. 2003-2007 جىلدارى قازاقستاننىڭ فرانتسياداعى ەلشىلىگىندە ەكىنشى, ودان كەيىن ءبىرىنشى حاتشى بولىپ جۇمىس ىستەدى.
2008 جىلدان باستاپ قازاقستان رەسپۋبليكاسى پرەزيدەنتى اكىمشىلىگىنىڭ سىرتقى ساياسات ورتالىعىندا كونسۋلتانت, سەكتور مەڭگەرۋشىسى بولىپ جۇمىس ىستەدى جانە قازاقستاننىڭ فرانتسياداعى ەلشىسى لاۋازىمىنا تاعايىندالعانعا دەيىن قر پرەزيدەنتى اكىمشىلىگىنىڭ سىرتقى ساياسات جانە حالىقارالىق بايلانىستار ءبولىمى مەڭگەرۋشىسىنىڭ ورىنباسارى بولدى.
