ولار گەوگرافيادان حالىقارالىق وليمپيادادا (IGeO-2022) 1 التىن, 1 قولا مەدال جەڭىپ الدى. ۇلتتىق قۇراما قورجىنىنا التىن مەدالدى سانجار حاميتوۆ (اقتوبە قالاسىنان), قولا جۇلدەنى ەركەبۇلان تازابەك (شىمكەنت قالاسىنان) سالدى. وقۋ-اعارتۋ ءمينيسترى اسحات ايماعامبەتوۆتىڭ حابارلاۋىنشا, بۇل – ەلىمىزدىڭ بەدەلدى وليمپياداعا قاتىسۋ تاريحىنداعى قازاقستاندىقتاردىڭ ەكىنشى التىن مەدالى.
«بيىل زياتكەرلىك جارىستاردى فرانتسيا ۇيىمداستىردى. پاندىك وليمپيادالارعا الەمنىڭ 54 ەلىنەن 216 وقۋشى قاتىستى. بالالارىمىزدىڭ ماتەماتيكا, فيزيكا جانە ەندى گەوگرافيا پاندەرىنەن وليمپيادالارداعى جوعارى جەتىستىكتەرى ولاردىڭ باسەكەگە قابىلەتتى ەكەنىن كورسەتەدى. وقۋشىلاردى جەڭىسىمەن قۇتتىقتايمىن! ءبىز ولاردى ماقتان تۇتامىز. سونداي-اق بالالارعا ساپالى ءبىلىم بەرىپ جاتقان ۇستازدارعا شەكسىز العىسىمدى بىلدىرگىم كەلەدى. دارىندى بالالاردى تاربيەلەگەن اتا-انالارعا دا راحمەت», دەدى ۆەدومستۆو باسشىسى.
ءمينيستردىڭ مالىمدەۋىنشە, بيىل وسىنداي وليمپيادالاردىڭ جەڭىمپازدارى بۇرىن-سوڭدى بولماعان قولداۋ شارالارىنىڭ يگىلىگىن كورەدى. پرەزيدەنتتىڭ تاپسىرماسى بويىنشا قوماقتى اقشالاي سىياقى تولەۋ جانە وتاندىق جوو-عا ۇبت تاپسىرماي-اق قابىلداۋ قاراستىرىلىپ وتىر. التىن مەدال العان وقۋشىعا شامامەن 4,5 ملن تەڭگە, كۇمىس مەدالعا 3 ملن-نان اسا تەڭگە, قولا مەدالعا 1,5 ملن-نان اسا تەڭگە كولەمىندە اقشالاي سىيلىق بەرىلەدى. وقۋشىلاردى جارىسقا دايىنداعان ۇستازدار دا تولەماقى الادى.
