ەرلىك جاساۋ اركىمنىڭ قولىنان كەلە بەرمەيدى. دەگەنمەن تۇركىستان وڭىرىندە ءوز باسىن قاۋىپكە تىگىپ, وزگەنىڭ ءومىرىن قورعاپ قالعان ازاماتتار بار. بۇگىن تۇركىستان وبلىسىنىڭ اكىمى ومىرزاق شوكەەۆ بەيبىت كۇننىڭ باتىرلارىن قابىلداپ, قۇرمەت كورسەتتى.
— بۇگىن ءبىز شىن مانىندە ناعىز پاتريوت, باتىل ازاماتتارمەن جۇزدەسىپ وتىرمىز. سىزدەر قازىرگى جاستار ءۇشىن ۇلگىسىزدەر. ولار وتانشىلدىقتىڭ نە ەكەنىن سىزدەردەن ۇيرەنەدى. جالپى تۇركىستان وبلىسىندا پاتريوتتار وتە كوپ. ارىس اپاتى مەن ماقتاارالداعى سۋ تاسقىنىندا وبلىسىمىزدىڭ ەرىكتى جاستارى, پاتريوتتارى كۇندىز-ءتۇنى ەلگە قىزمەت ەتتى. ونى ەل جاقسى بىلەدى. بۇنىڭ ءبارى ءوڭىر تۇرعىندارىنىڭ مىقتىلىعىن, ەلگە جاناشىرلىعىن كورسەتەدى. سىزدەر تۇرعىنداردى ورتتەن, اپاتتان قۇتقارىپ, ەرلىك جاسادىڭىزدار. بەيبىت كۇننىڭ باتىرى اتانىپ جۇرسىزدەر. قاسيەتتى بايراعىمىزدى وتتان الىپ شىققان باۋىرىمىزعا دا راحمەت. وسىنداي ازاماتتاردى ەلگە تانىتىپ, ناسيحاتتاۋىمىز كەرەك. ءبىز سىزدەرمەن ماقتانامىز, — دەدى ومىرزاق شوكەەۆ.
باتىلدىق پەن باتىرلىقتىڭ ۇلگىسىن كورسەتكەن تۇركىستان وبلىسىنىڭ ازاماتتارىن وبلىس اكىمى «تۇركىستان وبلىسىنا سىڭىرگەن ەڭبەگى» ءۇشىن توسبەلگىسىمەن ماراپاتتادى. ولاردىڭ ءبىرى — كۇنى كەشە عانا ەرلىگىنىڭ ارقاسىندا ەلگە تانىلعان قانسەيىت مۇحاممەد. ونىڭ وتانشىل بولمىسىن كۇللى ەل كوردى. سايرام اۋداندىق حالىقتى جۇمىسپەن قامتۋ ورتالىعىنىڭ قىزمەتكەرى اقسۋكەنت اۋىلىندا ورنالاسقان ءارى ءوزى جۇمىس ىستەيتىن عيماراتتا بولعان ءورت كەزىندە شاتىر ۇستىندەگى مەملەكەتتىك تۋدى وتتان الىپ شىققان بولاتىن.
حايرۋللاەۆ ايان رىسبەك ۇلى — جەتىساي اۋداندىق پوليتسيا ءبولىمىنىڭ ميگراتسيا بولىمشەسىنىڭ باسشىسى. ول تونگەن قاۋىپكە قاراماي, بەيتانىس كەيۋانانى ءورتتىڭ ورتاسىنان امان الىپ شىققان.
نۇرعالي كەرىمبەكوۆ — كەنتاۋ قالاسى, №12 ءورت ءسوندىرۋ ءبولىمىنىڭ بولىمشە كومانديرى, ازاماتتىق قورعاۋ اعا سەرجانتى. ءوز ءىسىنىڭ شەبەرى سۋ قۇبىرىنا قۇلاپ كەتكەن 2 جاستاعى بالانى قۇتقارىپ الدى.
باتىرلاردىڭ ءبىرى رىسبەك مەيىربەك نۇرجىگىت ۇلى — قازىعۇرت اۋدانىنىڭ تۇرعىنى. ول اجەتحاناعا ءتۇسىپ كەتكەن 1 جاستاعى بالانى قۇتقارىپ الىپ شىعىپ, ەلدى ءسۇيىندىردى.
باتىل ازاماتتار ءوڭىر باسشىسىنىڭ ءىلتيپاتىنا ريزاشىلىق ءبىلدىرىپ, قوعامنىڭ دامۋىنا قىزمەت ەتۋگە دايىن ەكەندەرىن جەتكىزدى.
