مىسالى, «التىن شاڭىراق ۇياسى» تىگىن ورتالىعىندا قازىرگى ۋاقىتتا 13 كوپبالالى انا جۇمىس ىستەيدى. ورتالىق زاتتاردان باستاپ ءۇي توقىماسىنا دەيىن تىگۋ, رەستاۆراتسيالاۋ, كونسترۋكتسيالار, بۇيىمداردىڭ بارلىق ءتۇرىن ۇسىنادى. كارانتين كەزىندە مەديتسينا قىزمەتكەرلەرىنە ماسكالار مەن كوستيۋمدەر تىگىلدى. ورتالىق ديرەكتورى ءاليدا وتارباەۆا 2021 جىلى «بيزنەستىڭ جول كارتاسى-2025» بيزنەستى قولداۋ مەن دامىتۋدىڭ مەملەكەتتىك باعدارلاماسى اياسىندا گرانت الدى. ۇتىپ الىنعان گرانتقا ورتالىققا قاجەتتى قۇرال-جابدىقتار ساتىپ الىندى.
«بىلتىر بەلگىلى قولونەر شەبەرى ىرزا تۇرسىنزادانىڭ شەبەرلىك ساباقتارىنا قاتىستىق. ءبىزدىڭ ۇستازىمىز سول كىسى. ودان كەيىن «التىن شاڭىراق ۇياسى» اتتى قوعامدىق بىرلەستىكتى قۇردىق. قالا اكىمدىگىنەن كومەك سۇراعان ەدىك, ءوتىنىشىمىز كەرى قايتارىلعان جوق. قازىر مۇندا 13 كوپبالالى انا جۇمىس ىستەيدى. نەگىزگى كاسىبىمىز – توسەك جابدىقتارى, كورپە-جاستىق سياقتى قىز جاساۋىن تىگۋ. ءارتۇرلى ۇلتتىق كيىمدەردى دە تىگەمىز. شيكىزاتتى ورتالىق بازاردان ساتىپ الامىز. تاپسىرىستار كوپ ءتۇسىپ جاتىر», دەيدى توعىز بالانىڭ اناسى ءاليدا وتارباەۆا.
ەلوردادا بىلتىر الەۋمەتتىك وسال توپتارمەن جۇمىس ىستەيتىن سەگىز ورتالىق اشىلعان. مۇنداي ورىندار اۋەلى كوپبالالى انالار مەن ەرەكشە قاجەتتىلىكتەگى جەتكىنشەكتەردى تاربيەلەپ وتىرعان وتباسىلار ءۇشىن قاجەت. جانار بايمۇحامبەتوۆا – التىن قۇرساقتى انا. 9 بالانى دۇنيەگە اكەلگەن ول قازىر وسى ورتالىقتاعى تىگىن تسەحىندا ەڭبەك ەتەدى.
«تاپقان تابىسىم بالا-شاعامدى اسىراۋعا جەتكىلىكتى», دەيدى كوپبالالى ايەل. بۇرىندارى جۇمىسسىز جۇرگەن جاننانى ءوزى سەكىلدى انالار وسىندا شاقىرعان. قازىر «ەكى قولعا ءبىر كۇرەك» ۇستاعان ول قىز جاساۋى مەن ءتۇرلى بۇيىمدار تىگۋدى قولعا العان.
«ەشقانداي جۇمىستان قاشپايمىز. قانداي جۇمىس بولسا, سونى ىستەۋگە تىرىسامىز. بۇل جەردىڭ بىزگە بەرەرى وتە كوپ. نەگە دەسەڭىز, بۇل جەر التىن قۇرساقتى انالارىمىز باس قوساتىن جەر. سودان كەيىن ءبىز ءبىر-بىرىمىزگە كومەكتەسە الامىز. سوزبەن بولسا دا, ىسپەن بولسا دا. قولىمىزدان كەلەتىن قازاق قول ونەرىن جوعالتپاۋ كەرەك. ەكىنشىدەن, قازاقستاندا وتاندىق ءونىمدى دامىتۋىمىز قاجەت», دەدى ج.بايمۇحامبەتوۆا.
وسىنداي ەلدىڭ بولاشاعىنا ەڭبەك ەتىپ كەلە جاتقان ورتالىقتاردىڭ ءبىرى – Bilim All. ورتالىق Strong Mothers قورى جانىنان اشىلعان. بۇل جەردە كوپبالالى انالار مەن مۇعالىمدەر ەڭبەك شارتى بويىنشا حالىقتى جۇمىسپەن قامتۋ ورتالىعى ارقىلى ەڭبەك ەتەدى. جوبا جەتەكشىسى رايگۇل سەرىكباەۆا 2021 جىلى «بيزنەستىڭ جول كارتاسى-2025» بيزنەستى قولداۋ مەن دامىتۋدىڭ مەملەكەتتىك باعدارلاماسى اياسىندا گرانت الدى. وسى قاراجات ورتالىقتى دامىتۋعا جانە ورتالىق ءۇشىن تەحنيكا مەن جابدىقتار ساتىپ الۋعا باعىتتالدى.
«كوپبالالى, جالعىزباستى, ەرەكشە بالا ءوسىرىپ وتىرعان انالار بىرىگىپ Strong Mothers NS («نۇر-سۇلتاننىڭ مىقتى انالارى») اتتى قوعامدىق قور اشتىق. ءبىزدىڭ قوعامدىق قوردىڭ باستى ماقساتى – حالىقتىڭ الەۋمەتتىك وسال توپتاعى بالالاردىڭ, مۇمكىندىگى شەكتەۋلى بالالاردىڭ الەۋەتىن اشۋ, كوپبالالى انالار مەن ەرەكشە بالالاردى تاربيەلەپ وتىرعان ايەلدەردى قولداۋ ارقىلى قازاقستاننىڭ دامۋىنا جاردەمدەسۋ. وسى قوعامدىق قور ارقىلى از قامتىلعان وتباسىلارعا, كوپبالالى, جالعىزباستى, ەرەكشە بالا ءوسىرىپ وتىرعان انالارعا اقپاراتتىق, قۇجاتتىق كومەك بەرۋ, دەمەۋشىلەر مەن سەرىكتەستەر كومەگىمەن ازىق-ت ۇلىك سەبەتىن تاراتىپ بەرۋ, وسى توپتاعى وتباسىلاردىڭ بالالارىن 50 پايىز جەڭىلدىكپەن ءوز مەكەمەمىزدە وقىتۋ. ءالى دە ءبىزدىڭ اتقارار شارۋامىز كوپ. ءبارىمىز بىرلەسە, بىرىگە وتىرىپ بالالارىمىزدى كەمەل كەلەشەككە جەتەلەيىك», دەدى ورتالىق ديرەكتورى ر.سەرىكباەۆا.
Strong Mothers Ns قوعامدىق قورىنىڭ باسشىسى ءارى الەۋمەتتىك كاسىپكەر رايگۇل سەرىكباەۆانىڭ ايتۋىنشا, ورتالىقتار جەلىسىن اشۋعا كوپبالالى انا بولعانى ءارى ءوزىنىڭ تاجىريبەسى اسەر ەتكەن.
«مەن اعىلشىن ءتىلىنىڭ ۇستازىمىن جانە سەرىكتەستەرىم دە مۇعالىم, سوندىقتان ءبىز بىرگە Bilim All جوباسىن اشۋدى ۇيعاردىق. مەن, انا رەتىندە, بالالارىمدى وقىتۋدا قيىندىقتارعا تاپ بولدىم: ءبارى قىمبات جانە الىس. كوپبالالى وتباسىلاردان شىققان بالالاردىڭ قولجەتىمدى قوسىمشا ءبىلىم الۋىنا مۇمكىندىگى جوق. مۇنداي بالالارعا كومەكتەسۋ مەنىڭ ارمانىم بولدى. حالىقتىڭ الەۋمەتتىك وسال توپتارىنا كوپبالالى وتباسىلاردان شىققان بالالار, مۇگەدەكتىگى بار جانە تولىق ەمەس وتباسىلاردان شىققان بالالار جاتادى. ماقساتىم – سولارعا قولۇشىن سوزۋ», دەدى قوعامدىق قور باسشىسى.
