مۇنداي جاعىمسىز ستاتيستيكانى ءوڭىر باسشىسى نۇرلان ۇرانحاەۆ سالا وكىلدەرىمەن كەزدەسۋدە ايتتى. وبلىس اكىمى انا مەن بالانىڭ ءومىرىن ساقتاۋ – دەنساۋلىق ساقتاۋ سالاسىنداعى ماڭىزدى ءارى باستى مىندەتتەردىڭ ءبىرى ەكەنىن ەسكە سالدى.
«بيىل وبلىس كولەمىندە 28 ءسابي مەن ءبىر انانىڭ ءولىمى تىركەلدى. وسى باعىتتا دەنساۋلىق ساقتاۋ باسقارماسىنا انا مەن بالا ءولىمىن ازايتۋ ءۇشىن جول كارتاسىن ازىرلەۋدى تاپسىرامىن. سونداي-اق وڭىردەگى پەريناتالدى ورتالىقتاردىڭ جاعدايىنا مۇقيات تالداۋ جۇرگىزۋ قاجەت.
قانداي دا وزەكتى ماسەلە بولسا, جاسىرماي ايتۋ كەرەك. ويتكەنى بۇل ادامنىڭ دەنساۋلىعى مەن ومىرىنە قاتىستى. سوندىقتان سالاداعى كەز كەلگەن ماسەلەنى جاسىرماعان دۇرىس», دەدى ن.ۇرانحاەۆ.
وبلىس اكىمىنىڭ ايتۋىنشا, وڭىردەگى بىرقاتار اۋرۋحانا مەن ەمحانانىڭ ابدەن توزىعى جەتكەندىكتەن كۇردەلى جوندەۋدى تالاپ ەتەدى.
«سەمەيدە 200 ادامعا شاقتالعان جۇقپالى اۋرۋلار اۋرۋحاناسىن سالۋ جوسپارلانىپ وتىر. سونىمەن قاتار اباي اۋداندىق اۋرۋحاناسىنا جانە كوكپەكتىدەگى اۋداندىق اۋرۋحاناعا كۇردەلى جوندەۋ تاياۋ ارادا جۇرگىزىلەدى. وسى ءوڭىردىڭ تۋماسى بولعاندىقتان بارلىق اۋرۋحانانىڭ قاي جەردە ورنالاسقانىن, سول سەكىلدى قانداي كۇيدە تۇرعانىن جاقسى بىلەمىن. كەز كەلگەن ماسەلەنى بىرلەسىپ شەشكەن ابزال», دەدى ءوڭىر اكىمى.
ن.ۇرانحاەۆ تاياۋ جىلدارى وبلىستا بىرنەشە مەديتسينالىق نىساندار سالىناتىنىن جەتكىزدى.
«كادرلىق الەۋەتىمىز جەتكىلىكتى, سەبەبى سەمەيدە مەديتسينالىق ۋنيۆەرسيتەت پەن ورتا بۋىنداعى مەديتسينالىق قىزمەتكەرلەردى دايارلايتىن 3 كوللەدج جۇمىس ىستەپ تۇر. بۇل ورايدا وڭىردەگى مەديتسينالىق ۇيىمدار جوعارى تەحنولوگيالىق جابدىقتارمەن دە قامتىلعانىن ايتا كەتكەن ورىندى. سەمەي مەن اۋداندىق ەلدى مەكەندەردەگى مەديتسينالىق ۇيىمداردى ارالاپ كوردىم. البەتتە, بەلگىلى ءبىر قيىندىقتار بار. بۇل, اسىرەسە توزىعى جەتكەن جابدىقتار مەن ەسكى عيماراتتارعا قاتىستى. الايدا جەدەل مەديتسينالىق جاردەم اۋرۋحاناسى سىندى جاقسى جابدىقتالعان ءىرى مەديتسينالىق ورتالىقتار دا قىزمەت ەتىپ تۇرعانىن ەسكەرۋىمىز كەرەك», دەدى اكىم.
ءوز كەزەگىندە سالا وكىلدەرى قوردالانعان پروبلەمالاردى دا جاسىرماي ايتتى. ايتالىق, سەمەيدەگى ەكى مەديتسينالىق ستاتسيونار XIX عاسىردا سالىنعان عيماراتتا ورنالاسقان. شاھارداعى مەديتسينالىق ۇيىمداردىڭ باسىم بولىگى 30 جىل بۇرىن پايدالانۋعا بەرىلگەندىكتەن ماماندار ەسكىرگەن نىسانداردا حالىققا قىزمەت كورسەتۋگە ءماجبۇر. سوندىقتان دا يگىلىكتى سالانىڭ وكىلدەرى مەديتسينالىق ينفراقۇرىلىمدى جاڭارتۋ ماسەلەسىن كۇن تارتىبىنە قويۋ كەرەك دەپ سانايدى.
جوعارىدا ايتىلعانداي, بيىل وبلىس ورتالىعىندا جۇقپالى اۋرۋلار اۋرۋحاناسىن سالۋ كوزدەلىپ وتىر. وسىعان بايلانىستى جوبالىق-سمەتالىق قۇجاتتامانى ازىرلەۋ جۇمىستارى قولعا الىنباق. بيىلعا مەجەلەنگەن نەگىزگى مىندەتتەردىڭ ءبىرى – اباي اۋداندىق اۋرۋحاناسى مەن كوكپەكتىدەگى اۋداندىق اۋرۋحاناسىنداعى قازاندىقتى كۇردەلى جوندەۋدەن وتكىزۋ.
بۇدان بولەك, جۋىردا سەمەيدە كوپ بەيىندى بالالار اۋرۋحاناسىن, وبلىستىق قان ورتالىعىن, ەكى ۇلگىلىك ەمحانانى, مەديتسينالىق ۋنيۆەرسيتەت كلينيكاسىن, سول سەكىلدى وڭىردەگى ەلدى مەكەندەردە 19 دارىگەرلىك امبۋلاتوريا, 44 مەديتسينالىق جانە 8 فەلدشەرلىك-اكۋشەرلىك پۋنكت سالۋ ماسەلەلەرى قاراستىرىلادى.
وبلىس باسشىسى كوروناۆيرۋس اۋرۋىنىڭ تارالۋىنا جول بەرمەۋ ءۇشىن ەلىمىزدەگى ەپيدەميالىق احۋالدى ۇدايى نازاردا ۇستاپ وتىرۋدىڭ قاجەتتىلىگىن ايتتى. ماسەلەن, شىلدەنىڭ باسىندا وڭىردە 31 ادامنان كوروناۆيرۋس ينفەكتسياسى انىقتالدى. ولاردىڭ 5-ەۋى ينفەكتسيالىق ستاتسيوناردا ەمدەلىپ جاتسا, قالعاندارى امبۋلاتورلىق ەم-دوم شارالارىن قابىلداپ جاتىر.
«وبلىستا 31 ادامنان كوروناۆيرۋس ينفەكتسياسى انىقتالدى. ۇرەيلەنۋگە نەگىز جوق بولعانىمەن ارقانى دا كەڭگە سالۋ ءالى ەرتە. حالىقتىڭ قاجەتتى ۆاكتسينانى الۋىنا بارىنشا جاعداي جاساۋ كەرەك. اۋرۋىن جاسىرعان ولەتىنىن ەستەن شىعارماۋ كەرەك. دەنساۋلىق ساقتاۋ ۇيىمدارىنىڭ باسشىلارىنا بىرقاتار تاپسىرمانى جۇكتەيمىن. جاعدايدى تولىق باقىلاۋدا ۇستاۋ كەرەك», دەدى ن.ۇرانحاەۆ.
دەنساۋلىق ساقتاۋ مينيسترلىگى شىلدەدە ۆيرۋسقا شالدىققانداردىڭ سانى كوبەيەتىنىن ايتقان ەدى. دەمەك قازىر ينفەكتسيالىق اۋرۋدىڭ ماۋسىمدىق ءوسىمى بايقالسا كەرەك.
اباي وبلىسى
