ءوڭىر باسشىسى كەمە قاتىناسىنىڭ ماڭىزدىلىعىن, اتاپ ايتقاندا, جولاۋشىلار تاسىمالىن ارتتىرۋداعى تيىمدىلىگىن, سونداي-اق جۇك تاسىمالداۋعا ەكونوميكالىق ارتىقشىلىقتارىن جەتكىزدى.
«وسىعان دەيىن ەرتىستەگى كەمە قاتىناسىن جانداندىرۋدىڭ قاجەتتىلىگىن ايتقان ەدىم. كەز كەلگەن كەمە ءۇشىن پيرس قاجەت ەكەنى ايتپاسا دا تۇسىنىكتى. وسى ماقساتتا بۇرىنعى وزەن ۆوكزالىنىڭ جاعدايىمەن تانىسۋدى ۇيعاردىق», دەدى وبلىس اكىمى.
ونىڭ ايتۋىنشا, شاھاردا كەمە قاتىناسىن جاڭعىرتۋ ءۇشىن بارلىق تەتىك قاراستىرىلعان. ەڭ باستىسى, ينۆەستورلار كەلۋگە دايىن.
«بۇل باعىتتا ۇسىنىستار بار, ينۆەستورلار دا تابىلىپ وتىر. بۇرىن وسكەمەن مەن ومبىنىڭ اراسىن سەمەي ارقىلى قاتىنايتىن ايگىلى «راكەتا» كەمەلەرى جالعايتىن. كەمە قاتىناسىن جاڭعىرتۋدى ورىندى دەپ سانايمىز. مەنىڭ ويىمشا قازىر كوپشىلىگى اۆتوكولىك جولدارىمەن جۇرۋگە جالىقتى. وسكەمەننەن سەمەيگە دەيىن شليۋزدەۋدى ەسەپكە العاندا جول ۇزاقتىعى ءۇش جارىم ساعاتتى الادى. كوپشىلىگى كولىك قاتىناسىنىڭ بۇل تۇرىنە قىزىعىپ, سۇرانىس ارتادى دەپ ويلايمىن. جۇك تاسىمالدارىنا كەلەتىن بولساق, بۇل بولەك ماسەلە. البەتتە, ونى ەسەپتەن شىعارۋعا بولمايدى. بىراق وعان باسقا ينۆەستورلار قاجەت», دەدى ن.ۇرانحاەۆ.
اباي وبلىسى
