الەۋمەتتىك ماڭىزى بار نىسان جالپى سوماسى 207 ملن تەڭگە تۇراتىن مەديتسينالىق وڭالتۋ جابدىقتارىنىڭ 90-نان اسا تۇرىمەن جاراقتالعان. ارنايى مەديتسينالىق قىزمەتكەرلەر نۇر-سۇلتان, ماسكەۋ جانە سانكت-پەتەربۋرگتە وقىتۋ كۋرستارىنان وتكەن.
«مەملەكەت باسشىسى قاسىم-جومارت توقاەۆ 2022 جىلدى بالالار جىلى دەپ جاريالاعانى بەلگىلى. اباي وبلىسىندا پەريناتالدى ورتالىقتىڭ جانىنان بالالار وڭالتۋ ورتالىعى مەن ەرتە ارالاسۋ ورتالىعىنىڭ اشىلۋى ماڭىزدى وقيعا سانالادى. انا مەن بالانى قورعاۋ قىزمەتىنىڭ دامۋى قوعامنىڭ الەۋمەتتىك ءال-اۋقاتىنىڭ ينديكاتورلارىنىڭ ءبىرى ەكەنى ءسوزسىز. تۇتاستاي العاندا, انا مەن بالانى قورعاۋ – وتباسىن نىعايتۋعا, انانىڭ دارەجەسىن كوتەرمەلەۋگە, بالالاردى تاربيەلەۋگە, سونداي-اق ولاردىڭ دەنە ءبىتىمى, زياتكەرلىك جانە ادامگەرشىلىك جاعىنان دامۋى ءۇشىن نەعۇرلىم قولايلى جاعدايلار جاساۋعا باعىتتالعان مەملەكەتتىك جانە قوعامدىق ءىس-شارالار جۇيەسى», دەدى سەمەي قالاسىنىڭ اكىمى باقىتجان باياحمەتوۆ.
اتالعان ورتالىقتىڭ نەوناتالدى جانە پەدياتريالىق قىزمەتىنىڭ باسشىسى گۇلجازيرا دۇيسەكەنوۆا ورتالىقتا اتقارىلعان جۇمىستىڭ ناتيجەلەرىن ايتتى. ماسەلەن, جارتى جىلدا بالالاردىڭ 72%-ى اياققا تۇرىپ جۇرە باستاسا, 55%-ى باسىن تىك ۇستاپ, تاعى 48%-ى ەڭبەكتەپ قوزعالۋعا ۇيرەنگەن. بۇل – بالالاردىڭ قىسقا مەرزىمدە العان داعدىلارى.
مۇندا نەيرو-ورتوپەديالىق اۋرۋلارى بار, ونىڭ ىشىندە تسەرەبرالدى سال اۋرۋى بار بالالاردى وڭالتۋدىڭ الەمنىڭ ۇزدىك ادىستەمەلەرى مەن زاماناۋي تاسىلدەرى قولدانىلادى. ماماندار اۋرۋدىڭ ەرەكشەلىكتەرىن ەسكەرىپ, ءار بالانى قالپىنا كەلتىرۋدىڭ جەكە باعدارلاماسىن جاسايدى. وڭالتۋ ءۇشىن قوزعالىس داعدىلارىن دامىتۋدىڭ زاماناۋي تەحنولوگيالارى, اتاپ ايتقاندا ارنايى تەحنيكالىق قۇرالدار, ترەناجەرلەر, اپپاراتتار مەن اپپاراتتىق-باعدارلامالىق كەشەندەر پايدالانىلادى.
تسەرەبرالدى سال اۋرۋى مەن تىرەك-قيمىل مۇشەلەرىن ەمدەۋ ءۇشىن ومىرتقانىڭ, بۋىنداردىڭ ءجۇرۋ مەن قوزعالۋ داعدىلارىن قالپىنا كەلتىرۋگە ارنايى كوستيۋمدەر, ترەناجەرلەر جانە الەمدىك ۇزدىك وندىرۋشىلەردىڭ قۇرىلعىلارى قاراستىرىلعان. سونىمەن قاتار ەمدىك دەنە شىنىقتىرۋ, ەلەكتروەنتسەفالوگرافيا, فيزيوتەراپيا, جارىقپەن ەمدەۋ, سۋ ماسساجى, لوگوپەد جانە دەفەكتولوگپەن كۇندەلىكتى جەكە ساباقتار وتكىزىلەدى. يممەرسيالىق ۆاننا, مەحانوتەراپيا, ەرگوتەراپەۆت جانە پسيحولوگ كابينەتتەرى, سەنسورلىق بولمە, قۇرعاق ۆاننا جۇمىس ىستەيدى.
ەرتە ارالاسۋ ورتالىعىنىڭ نەگىزگى قىزمەتىنە دامۋدىڭ ەرتە كەزەڭدەرىندە (3 ايدان 3 جاسقا دەيىن) بالالارعا كەشەندى وڭالتۋ كومەگىن كورسەتۋ جاتادى. نەگە دەسەڭىز, 3 جاسقا دەيىن بالانىڭ ميى يكەمدى جانە وڭالتۋ ەمىنە قولايلى بولىپ كەلەدى. ونى نەعۇرلىم ەرتە باستاسا, مۇگەدەكتىكتىڭ اۋىرلىعىن سوعۇرلىم ازايتىپ, بالانىڭ اۋرۋدان ساۋىعىپ كەتۋگە مۇمكىندىگى جوعارىلايدى. ورتالىق ماماندارىنىڭ ماڭىزدى مىندەتىنە اتا-انالارمەن جۇمىس جۇرگىزۋ, ولاردى قاراپايىم كۇندەلىكتى ءىس-ارەكەتتەر مەن قوزعالىستارعا داعدىلاندىرۋ, ونىڭ ىشىندە بالانى دۇرىس كوتەرۋگە, تاماقتاندىرۋعا, سول سەكىلدى كيىندىرىپ, وتىرعىزۋعا ۇيرەتۋ كىرەدى. ويتكەنى وڭالتۋ ىسىندە ۇساق-تۇيەك نارسە بولمايدى. بۇل اسىرەسە ەرتە كەزەڭدەردە اسا ماڭىزدى.
بارلىق كومەك (وڭالتۋ, پەداگوگيكالىق, الەۋمەتتىك, پسيحولوگيالىق) تەگىن كورسەتىلەدى. ەكى ورتالىقتاعى جاتىن ورىن سانى – 100, ونىڭ ىشىندە 30-ى تاۋلىك بويى قىزمەتكە شاقتالعان.
جىل سايىن وڭالتۋ شارالارىن 1 200-دەن اسا بالا الا الادى. قازىر ورتالىقتا 80 قىزمەتكەر جۇمىس ىستەيدى.
«بالالارىمىزعا الەۋمەتتەنىپ, ءوزىن ءوزى كۇتۋ داعدىلارىن الۋعا مۇمكىندىك بەرگەندەرىڭىزگە راحمەت. مەنىڭ ۇلىم سەكىلدى بالالارعا ءتىپتى ءبىر قادامدى جاساۋدىڭ ءوزى ەۆەرەستكە شىققانمەن تەڭ. وسى ورتالىقتاعى ماماندارعا ودان ءارى وركەندەپ, بالالاردى ەمدەۋ جولىنداعى قىزمەتتەرىنە تاباندىلىق پەن توزىمدىلىك, ال اتا-انالارعا شىدامدىلىق تىلەيمىن», دەدى اتا-انالاردىڭ ءبىرى.
ءىس-شارا وڭالتۋدان وتكەن بالالاردىڭ, ولاردىڭ اتا-انالارى مەن ورتالىق قىزمەتكەرلەرىنىڭ قاتىسۋىمەن وتكەن كونتسەرتتىك باعدارلامامەن اياقتالدى.
اباي وبلىسى
