وقيعا 16 شىلدە كۇنى ساعات 08:56-دا تالدىقورعان قالاسى كوكتەم شاعىن اۋدانىنداعى كوپپاتەرلى تۇرعىن ۇيدە بولدى.
«وقيعا ورنىنا تجد, گاز قىزمەتى, جەدەل مەديتسينالىق كومەك جانە پوليتسيا بولىمشەلەرى جىبەرىلدى. تجد قىزمەتكەرلەرى كوپ پاتەرلى تۇرعىن ءۇيدى ارالاۋ بارىسىندا گازدىڭ ءيىسى التىنشى قاباتتاعى پاتەردەن شىعىپ تۇرعانىن انىقتادى. بىراق پاتەردىڭ ەسىگىن ەشكىم اشپادى. گازدىڭ تارالۋىن توقتاتۋ ماقساتىندا تجد قىزمەتكەرلەرى پاتەرگە بالكون ارقىلى كىرۋ تۋرالى شەشىم قابىلدادى. پاتەر ىشىندەگى توسەكتە 1985 جىلى تۋعان ەر ادام جاتقان. ول قۇتقارىلىپ, تابيعي گازبەن ۋلانۋ بەلگىلەرى بار ەكەنى بايقالعان سوڭ جەدەل مەديتسينالىق جاردەم قىزمەتكەرلەرىنە تاپسىرىلدى. ءارى قاراي تالدىقورعان قالاسىنىڭ مەديتسينالىق مەكەمەسىنە جاتقىزىلدى», دەلىنگەن وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى تاراتقان حابارلامادا.
ۆەدومستۆونىڭ اقپاراتىنا سايكەس, پاتەر ءىشىن تەكسەرۋ كەزىندە تابيعي گاز شۇمەگى ءسال اشىلىپ تۇرعانى انىقتالعان.
