«ەلوردا تۇرعىنى دەپوزيتتەگى اقشاسىنىڭ جوعالعانى تۋرالى شاعىممەن پوليتسياعا جۇگىندى. قارت ادام دەپوزيتكە 2018 جىلى سالعانىمەن, ۇزاق ۋاقىت بويى كادەگە جاراتپاعان قاراجاتىن شەشىپ الۋ ءۇشىن بانككە كەلگەن. بىراق, بانكككە كەلگەن كەزدە شوتىندا جيناق اقشاسىنىڭ جوق ەكەنىن بىلگەن. ءمان-جايدى انىقتاۋ ءۇشىن ول پوليتسياعا جۇگىندى», دەپ اتاپ وتەدى دەپارتامەنتتەن.
وسىدان كەيىن جەدەل-ىزدەستىرۋ ءىس-شارالارىن قولعا العان ەسىل اۋداندىق پوليتسيا باسقارماسىنىڭ قىلمىستىق پوليتسيا ءبولىمى قىزمەتكەرلەرى شوتتاعى قاراجاتتىڭ جوعالۋىنا بانك قىزەتكەرىنىڭ قاتىسى بارىن انىقتادى. بانك قىزمەتكەرى زارداپ شەگۋشىنىڭ شوتىنا كىرۋ مۇمكىندىگىن پايدالانىپ, اقشانى دوسىنا اۋدارعان. كەيىن ونى قولما-قول اقشاعا اينالدىرعان. كۇدىكتى اقشانى ءوز قاجەتىنە جاراتىپ جىبەرگەن.
«پوليتسيا قىزمەتكەرلەرى تاۋلىك ىشىندە قاسكۇنەمدى انىقتاپ, قولعا ءتۇسىردى. 23 جاستاعى كۇدىكتىنىڭ ۇستىنەن «ۇرلىق» بابىمەن سوتقا دەيىنگى تەرگەۋ جۇرگىزىلىپ جاتىر. ۇستالعان كۇدىكتى كىناسىن مويىندادى. ونىڭ ەلوردا اۋماعىندا جاسالعان ءدال وسىنداي قىلمىستارعا قاتىسى تەكسەرىلىپ جاتىر», دەدى ۆەدومستۆودان.
