«وليمپيادا ناتيجەسى – كاسىبي دايىندىعىمىزدىڭ كورسەتكىشى بولماق. وعان فەدەراتسيا باسشىلارى, جاتتىقتىرۋشىلار, باپكەرلەر, ءتيىستى سالا ماماندارى جانە مەن – بارلىعىمىز جەكە-جەكە جاۋاپتىمىز», دەدى داۋرەن اباەۆ.
مينيستر سپورتشىلاردى دايارلاۋ جۇيەسىندە تۇيىتكىلدى ماسەلەلەر بار ەكەنىن ايتتى جانە ولاردى شەشۋ ماقساتىندا اتقارىلىپ جاتقان جۇمىستارعا توقتالدى. ماسەلەن, ۇكىمەت تاراپىنان سپورتتىق ينفراقۇرىلىمدى دامىتۋدىڭ جوسپار-كەستەسى ازىرلەندى. بيىل الماتى, اتىراۋ, قاراعاندى, قىزىلوردا, پاۆلودار جانە سولتۇستىك قازاقستان وبلىستارىندا 10 دەنە شىنىقتىرۋ-ساۋىقتىرۋ كەشەنىن سالۋ جوسپارلانعان.
مادەنيەت جانە سپورت ءمينيسترى داۋرەن اباەۆ ەلىمىزدەگى 25 جەڭىل اتلەتيكالىق مانەجدىڭ تەك بىرنەشەۋى عانا جالپى تالاپتارعا ساي ەكەنىن ايتتى. ال 367 ءجۇزۋ باسسەينىنىڭ تەك ەكەۋىندە حالىقارالىق تالاپتاردى ەسكەرە وتىرىپ جارىستاردى وتكىزۋگە بولادى.
مينيستر ۇلتتىق قۇراما كوماندالار مۇشەلەرىن دايارلاۋدى قامتاماسىز ەتۋ ماسەلەلەرىنە دە توقتالدى. شىلدە ايىنان باستاپ رەسپۋبليكالىق سپورت كوللەدجى بازاسىندا كۇرەس تۇرلەرى بويىنشا جاتتىعۋ ورتالىعىنىڭ جۇمىسى پيلوتتىق رەجيمدە ىسكە قوسىلسا, ك.احمەتوۆ اتىنداعى رەسپۋبليكالىق وليمپيادالىق رەزەرۆ مەكتەپ-ينتەرنات-كوللەدجى بازاسىندا دزيۋدو اكادەمياسى اشىلدى.
تاعى ءبىر جاڭالىق – 2022 جىلعى 1 شىلدەدەن باستاپ 2024 جىلعا دەيىن سپورت تورەشىلەرىنىڭ جۇمىسىنا اقى تولەۋ كەزەڭ-كەزەڭىمەن 100%-عا ارتادى. سپورت سالاسىندا تورەشىلەرگە اقى جارىستىڭ ءار كۇنى ءۇشىن تولەنەدى. بيىل اقى كولەمى 2600 تەڭگەدەن 8000 تەڭگەگە دەيىن, ال 2023 جىلى – 13 مىڭ تەڭگەگە دەيىن, 2024 جىلى – 17 مىڭ تەڭگەگە دەيىن كوبەيەتىن بولادى.
بۇدان باسقا 2022 جىلعى 1 شىلدەدەن باستاپ وليمپيادا, پاراليمپيادا, سۋردليمپيادا چەمپيوندارى مەن جۇلدەگەرلەرى جانە وليمپيادالىق سپورت تۇرلەرى بويىنشا الەم چەمپيوندارىن دايىنداعان جاتتىقتىرۋشىلارعا ءومىر بويى اي سايىنعى ماتەريالدىق قامتاماسىز ەتۋ مولشەرى 24 اەك-تەن 100 اەك-كە دەيىن ۇلعايتىلدى. ياعني, ولار ەندى اي سايىن ورتاشا ەسەپپەن 73 مىڭ تەڭگە ەمەس, 318 مىڭ تەڭگە الىپ وتىراتىن بولادى.
سونداي-اق مينيستر داۋرەن اباەۆ كادرلىق قامتاماسىز ەتۋ ماسەلەسىنە ەرەكشە نازار اۋداردى.
«بۇگىندە ەلىمىزدە 13 700 جاتتىقتىرۋشى جۇمىس ىستەيدى. ولاردىڭ تەك 4% عانا جىل سايىن بىلىكتىلىكتى ارتتىرۋ كۋرستارىنان ءوتىپ ءجۇر. كەيبىر فەدەراتسيالار ءتىپتى جاتتىقتىرۋشىلاردى اتتەستاتتاۋ بويىنشا جۇمىس جۇرگىزبەيدى. سوندىقتان فەدەراتسيالار وسى باعىتتاعى جۇمىستى جانداندىرۋى قاجەت», دەدى مينيستر.
ايتا كەتۋ كەرەك, وليمپيادادا سپورتشىلارىمىز ءساتسىز ونەر كورسەتكەننەن كەيىن بيىل 28 جاتتىقتىرۋشى قىزمەتىنەن بوساتىلدى.
ءمينيستردىڭ ايتۋىنشا قازىرگى ۋاقىتتا جاتتىقتىرۋشى-وقىتۋشىلاردىڭ ايلىعىن كوتەرۋ جانە اپتالىق ساعاتتىق جۇكتەمەسىن 18 ساعاتقا دەيىن تومەندەتۋ باعىتىندا جۇمىس جۇرگىزىلىپ جاتىر.
وتاندىق سپورتتىڭ عىلىمي-مەديتسينالىق بازاسىن نىعايتۋ تۇرعىسىندا داۋرەن اباەۆ رەسپۋبليكالىق تالداۋ ورتالىعىنىڭ مارتەبەسىن كۇشەيتۋ, ونىڭ ىشىندە قىزمەتكەرلەردىڭ ەڭبەكاقىسىن ارتتىرۋ بويىنشا جۇمىس باستالعانىن دا ايتى.
«بۇل ورتالىق مۇددەلى ورگاندارمەن بىرلەسىپ, سپورتشىلاردىڭ فيزيولوگيالىق جاي-كۇيىن, مەديتسينالىق تۇرعىدا جان-جاقتى قامتاماسىز ەتىلۋىن, جاراقاتتانۋ دەڭگەيىن جانە ت.ب. ەسكەرە وتىرىپ, ولاردىڭ ويىن ناتيجەلەرىن تالداۋ نەگىزىندە جوعارى جەتىستىكتەر سپورتىن دامىتۋمەن اينالىساتىن بولادى», دەپ اتاپ ءوتتى مينيستر.
سونداي-اق سپورت دارىگەرلەرىنىڭ ەڭبەكاقىسىن ارتتىرۋ, ارنايى مامانداردى شاقىرۋ, زاماناۋي جابدىقتاردى ساتىپ الۋ, سپورتشىلاردى تاماقتاندىرۋ نورمالارىن بەكىتۋ, فارماكولوگيالىق قامتاماسىز ەتۋ تىزبەسىن جاڭارتۋ ماسەلەسى تالقىلاندى.
كەڭەس قورىتىندىسى بويىنشا داۋرەن اباەۆ فەدەراتسيالارعا وليمپيادالىق تسيكلگە ارنالعان كەشەندى-ماقساتتى باعدارلامانى جانە دەنە شىنىقتىرۋ-سپورت ۇيىمدارىنا سپورت تۇرلەرى بويىنشا دايارلىق باعدارلاماسىن ازىرلەپ, بەكىتۋدى تاپسىردى.
