اقتوبە وبلىستىق ەكولوگيا دەپارتامەنتى قالانى سۋ جانە جىلۋمەن قامتاماسىز ەتىپ وتىرعان «Aqtobe su-energy group» اق-ىن تەكسەردى.
تەكسەرىس قورىتىندىلارى كارىز تازارتۋ قۇرىلعىسى جانە كارىز سورعىلاۋ ستانساسى 1, 11 جانە 13 ايماعىندا قالدىقتاردى ۋاقىتشا جيناۋ جانە ساقتاۋعا ارنالعان ارنايى ورىننىڭ جوق ەكەنىن كورسەتتى. ناتيجەسىندە سارقىندى سۋلاردى وڭدەۋ كەزىندە شىققان شلام قۇرىلىس, تاماق قالدىقتارىمەن جانە قاتتى تۇرتىستىق قالدىقپەن ارالاساتىنى بەلگىلى بولدى. لاي تۇنباسى كادەگە جاراتىلماعان جانە قايتا وڭدەلمەگەن بولىپ شىقتى. سونىمەن بىرگە قالدىقتار ورتەلگەن.
«سۋدى سىناۋ حاتتاماسىنا سايكەس №1 سۋ رەتتەۋشى توراپقا شىعارىلاتىن سۋ قۇرامىندا لاستاۋشى زات مولشەرىنىڭ اسىپ كەتكەنى انىقتالدى. بۇل جايىندا دەپارتامەنتكە مالىمەت تولىق ۇسىنىلماعان. تەكسەرۋ ناتيجەلەرى بويىنشا كاسىپورىنعا قاتىستى اكىمشىلىك قۇقىق بۇزۋشىلىق تۋرالى 18 حاتتاما تولتىرىلدى», دەپ ءتۇسىندىردى وبلىستىق ەكولوگيا دەپارتامەنتىنىڭ باسشىسى تالاپ ۇسنادين.
سونداي-اق اقتوبە وبلىسى ەكولوگيا دەپارتامەنتى وبلىس پروكۋراتۋراسىمەن بىرلەسىپ «GasProcessingCompany» جشس تەكسەرۋ جۇمىستارىن جۇرگىزدى.
«اۋاعا لاستاۋشى زاتتاردىڭ شىعارعان, جەردىڭ لاستاپ, قالدىقتاردى دۇرىس ساقتاماعان. تەكسەرۋ ناتيجەلەرى بويىنشا «GasProcessingCompany» جشس-ءى قر اقبتك-ءنىڭ بىرنەشە بابى بويىنشا اكىمشىلىك ءىس قوزعالىپ, 675 ملن تەڭگەدەن استام سوماعا ايىپپۇل سالىندى. اكىمشىلىك ايىپپۇل سوماسى مەملەكەت كىرىسىنە ەرىكتى تۇردە ءوندىرىپ الىندى», دەپ قوستى تالاپ ۇسنادين.
