«مونەتارلىق ساياساتتىڭ قاتاڭدىعى بيىل كۇشەيىپ, 2-3 پايىزدان 2022 جىلدىڭ اقپانىنىڭ سوڭىندا 7,3 پايىزعا دەيىن جەتتى. 2022 جىلدىڭ ءساۋىر-مامىر ايلارىندا كورسەتكىش 6-7 پايىز بولدى. سوندا كوروناۆيرۋس پاندەمياسى جاريالانعان 2020 جىلدىڭ ناۋرىزىنان اسىپ ءتۇستى. ال ۇلتتىق بانك مۇناي باعاسىنىڭ كۇرت تومەندەۋى جانە ۆاليۋتا نارىعىنداعى دۇرلىگۋ جاعدايىندا بازالىق مولشەرلەمەنى ايتارلىقتاي ارتتىردى. 2020 جىلى قازاقستان ەكونوميكاسى ءبىراز شوكتى باستان كەشىردى. بىرىنشىدەن, ەلدەگى باستى ەكسپورتتىق تاۋار سانالاتىن مۇنايدىڭ الەمدىك باعاسىنىڭ كەنەتتەن تومەندەۋى اسەرىن تيگىزدى. ەكىنشىدەن, پاندەميامەن كۇرەسكە بايلانىستى ەنگىزىلگەن اكىمشىلىك شەكتەۋلەر جانە لوگيستيكالىق تىزبەكتەردىڭ بۇزىلۋى سالدارىنان تۋىنداعان ينفلياتسيالىق پروتسەستەردىڭ كۇشەيە ءتۇسۋى ىقپال ەتتى», دەلىنگەن زەرتتەۋدە.
اكرا ساراپشىلارىنىڭ ايتۋىنشا, اقشا-نەسيە ساياساتىنىڭ قاتاڭداي ءتۇسۋى ەكونوميكاداعى بەلسەندىلىكتى تومەندەتتى. سوندىقتان ەكونوميكاداعى بەلسەندىلىكتى دە باسەڭدەتپەيتىن, تەڭگەلەي اكتيۆتەرگە دەگەن قىزىعۋشىلىقتى دا ىنتالاندىرا الاتىن تەڭگەرىمدى مونەتارلىق ساياساتتى قالىپتاستىرا الۋ وتە ماڭىزدى.
«ەل ىشىندەگى ونەركاسىپتىك ءوندىرىس ديناميكاسىنىڭ باياۋلاۋىنا جانە باستى ساۋدا سەرىكتەس سانالاتىن رەسەيگە قاتىستى سانكتسيالىق شارالاردىڭ ارتۋىنا بايلانىستى 2022 جىلدىڭ باسىندا قازاقستان ەكونوميكاسىنداعى قالپىنا كەلۋ پروتسەسى ءبىراز السىرەپ قالدى. بۇل رەسەيدەن بەرى قاراي ينفلياتسيا يمپورتىنىڭ اعىنىنا جول اشىپ, قازاقستاننىڭ ۆاليۋتا نارىعىنا اسەر ەتتى جانە رەسەي تەرريتورياسى ارقىلى تاۋار ەكسپورتتاۋ بويىنشا ترانسپورتتىق-لوگيستيكالىق احۋالدى كۇردەلەندىردى. ناتيجەسىندە, دەۆالۆاتسيالىق كۇتۋلەر مەن تۇتىنۋشىلىق ينفلياتسيانىڭ ءوسىمى اقشا-نەسيە ساياساتىن قايتا قاراۋعا مۇمكىندىك بەرمەدى», دەيدى اكرا ساراپشىلارى.
ولاردىڭ بيىلعا تۇتىنۋشىلىق ينفلياتسيا بويىنشا بولجامى 11-13 پايىز مەجەسىندە. سونداي-اق قازاقستانداعى ۆاليۋتا نارىعىنىڭ شاعىن ماسشتابىن جانە ونىڭ اشىقتىعىن, ەكى ەل ەكونوميكاسىنىڭ تىعىز بايلانىسىن ەسكەرە وتىرىپ, رەسەي ۆاليۋتا نارىعىنان قازاقستان نارىعىنا قاراي دەۆالۆاتسيالىق ۇردىستەردىڭ اۋىسۋ پوتەنتسيالى دا وتە جوعارى.
«ماكروقاداعالاۋشى بەلگىلەگەن ينفلياتسيالىق تارگەت-ءدالىزدىڭ قازىرگى جاعدايىندا ۆاليۋتالىق شوك تاۋەكەلى مەن جوعارىلاتىلعان ينفلياتسيا جوعارى بازالىق ستاۆكانى قولداۋعا مۇمكىندىك بەرەدى. بۇل رەتتە قازاقستاننىڭ اقشا-نەسيە ساياساتىن قاتاڭ دەپ باعالاي الامىز», دەيدى اكرا.
