اتىراۋ وبلىسىنىڭ اكىمى سەرىك شاپكەنوۆ «تەڭىز» كەن ورنىندا بولعان اپاتتى جاعدايعا بايلانىستى شۇعىل جيىن وتكىزدى.
وبلىس اكىمىنىڭ ءباسپاسوز قىزمەتى حابارلاعانداي, جيىنعا اكىمدىككە قاراستى باسقارمالاردىڭ باسشىلارى, «تەڭىزشەۆرويل» جشس-ءنىڭ, وبلىستىق توتەنشە جاعدايلار جانە پوليتسيا دەپارتامەنتتەرىنىڭ وكىلدەرى قاتىستى.
وبلىس اكىمى جارىلىستان قازا تاپقان جۇمىسشىلاردىڭ تۋىستارى مەن جاقىندارىنا كوڭىل ايتىپ, قازا تاپقاندار مەن زارداپ شەككەندەردىڭ وتباسىلارىنا قاجەتتى ماتەريالدىق كومەك كورسەتىلەتىنىن ءمالىم ەتتى.
«وبلىستىق دەنساۋلىق ساقتاۋ باسقارماسىنىڭ باسشىسىنا جاراقات العان جۇمىسشىلارعا مەديتسينالىق كومەك كورسەتۋدى تاپسىردىم. اپاتتىڭ سەبەپ-سالدارىن انىقتاۋ ماقساتىندا وبلىستىق دەڭگەيدە ارنايى كوميسسيا قۇرىلىپ, زاڭ اياسىندا تەكسەرۋ جۇمىستارىن جۇرگىزەدى», دەدى وبلىس اكىمى سەرىك شاپكەنوۆ.
ەسكە سالا كەتسەك, بۇگىن, 6 شىلدەدە جەرگىلىكتى ۋاقىتپەن ساعات 9:55 شاماسىندا تەڭىز كەن ورنىندا جارىلىس بولىپ, ەكى ادام قايتىس بولدى.
