زەرتتەۋشىلەردىڭ ايتۋىنشا, مۋزىكالىق اسپاپتا ويناۋ – قولدىڭ ۇساق موتوريكاسىن بەلسەندىرۋگە ىقپال ەتىپ قانا قويماي, بالالاردىڭ جان-جاقتى دامۋىنا جاعىمدى اسەر ەتەدى. وسىعان وراي ۇلتتىق دومبىرا كۇنىنە وراي اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتى نۇر-سۇلتان قالاسىنىڭ وقۋشىلار سارايىمەن بىرىگىپ, اتا-انالاردىڭ ءوتىنىشى بويىنشا «جانۇيا» الەۋمەتتىك وڭالتۋ ورتالىعىنداعى اۋىر دياگنوزى بار بالالارعا قايىرىمدىلىق كونتسەرتىن ۇيىمداستىردى. كونتسەرتتەن كەيىن اتا-انالاردىڭ كومەگىمەن بالالار قولدارىنا دومبىرا ۇستاپ, ۇلتتىق اسپاپپەن تانىستى. بولاشاقتا مەتسەناتتاردىڭ قولداۋىمەن مۇنداي ءىس-شارالاردى تۇراقتى تۇردە وتكىزۋ جوسپارلانۋدا.
سونىمەن قاتار اتالعان مەرەكەگە بايلانىستى جاستار مەن بالالاردىڭ قاتىسۋىمەن قازاقستاندا ءداستۇرلى مۋزىكالىق شىعارمالار مەن اسپاپتىڭ ءوزىن دارىپتەيتىن جۇزدەگەن ءىس-شارا ۇيىمداستىرىلدى. وسىلايشا, جاستار ۇيىمدارىنىڭ, جاستار رەسۋرستىق ورتالىقتارىنىڭ قاتىسۋىمەن چەللەندجدەر ءوتتى. وندا قۇرمانعازى, تاتتىمبەت, دينا نۇرپەيىسوۆانىڭ كۇيلەرى ورىندالدى. اتاپ ايتقاندا, بۇل كۇندەرى دومبىرا تارتاتىن مىڭنان استام جاس پەن بالا جۇزدەن استام
چەلەندجگە قاتىسىپ, دومبىرانىڭ داڭقىن ارتتىردى دەسە بولادى.
