29-30 ماۋسىم – نوعايتى, 1-2 شىلدە – قاراشوقات, 3-4 شىلدە – بەگىمبەت, 5-6 شىلدە – قوتىرتاس, 7-8 شىلدە – بەرشۇگىر, 9-10 شىلدە – مۇعالجار, 11-12 شىلدە – جۇرىن, 13-14 شىلدە – اقكەمەر, 15-16 شىلدە – ايتەكە بي, 17-18 شىلدە – نيكەلتاۋ, 19-20 شىلدە – كەمپىرساي, 21-22 شىلدە مارتۇق ستانساسىندا تاڭعى 09.00-دەن باستاپ كەشكى 18.00-گە دەيىن مەديتسينالىق پويىزدىڭ ماماندارى قابىلدايدى.
ايتا كەتەيىك, «جاردەم» مەديتسينالىق پويىزى 23 مامىردا الماتى-2 ستانساسىنان ماڭعىستاۋ وبلىسىنا جولعا شىعىپ, كەيىن اتىراۋ وبلىسىنا باردى. جوبانىڭ باستى ماقساتى – ەلىمىزدەگى ساپالى مەديتسينالىق قىزمەتكە قول جەتكىزە الماي وتىرعان شالعايدا جاتقان ستانسالار مەن وعان جاقىن ورنالاسقان ەلدى مەكەندەردىڭ تۇرعىندارىن تەگىن مەديتسينالىق تەكسەرۋدەن وتكىزۋ.
اتىراۋ وبلىسىنداعى دارىگەرلىك تەكسەرۋلەردىڭ ستاتيستيكاسى مىناداي: دارىگەرلىك قارالۋلار سانى – 9 532. اتاپ ايتقاندا, ەڭ كوپ ءوتىنىش جپد, تەراپەۆت, پەدياترعا كەلىپ ءتۇستى – 1 165 پاتسيەنت, بۇدان ءارى وفتالمولوگ – 924 پاتسيەنت, سونداي-اق نەۆروپاتولوگ – 894 پاتسيەنت, حيرۋرگ – 831 پاتسيەنت جانە ۋرولوگ – 745 پاتسيەنت. پويىز دارىگەرلەرى بارلىعى 767 ەكگ, 841 ۋدز جانە 833 فليۋوروگرافيا پروتسەدۋرالارىن وتكىزدى. سونىمەن قاتار 57 كىشى حيرۋرگيالىق وپەراتسيا, ياعني پويىز دارىگەرلەرى 57 بالانى سۇندەتكە وتىرعىزدى.
دارىگەرلەر اتىراۋ وبلىسىندا ءجيى كەزدەسەتىن اۋرۋلاردى اتادى: قانت ديابەتى, ومىرتقانىڭ وستەوحوندروزى, ۆيرۋستىق كونيۋنكتيۆيت, ارتريت, ارتروز, برونح دەمىكپەسى, گاستريت, پانكرەاتيت, حولەتسيستيت, سينۋسيت, برونحيت سياقتى سوزىلمالى اۋرۋلار.
اتىراۋ وبلىسىنىڭ تۇرعىندارى مەديتسينالىق پويىز ماماندارىنا كورسەتكەن قىزمەتتەرى مەن كەڭەستەرى ءۇشىن العىس ءبىلدىردى. وسى جوبانىڭ نەگىزىندە كەي پاتسيەنتكە اۋىلدىق جەرلەردە قولجەتىمسىز جانە وبلىستىق مەديتسينالىق مەكەمەلەرىنە مىندەتتى تۇردە بارۋدى تالاپ ەتەتىن سيرەك ەم-دوم تۇرلەرى جاسالدى. مىسالى, يساتاي ستانساسىنىڭ بەس جاسار تۇرعىنى احماد مەرەي ۇلىنا حيرۋرگيالىق وپەراتسيا جاسالدى, ياعني دارىگەرلەر ءبۇلدىرشىندى سۇندەتكە وتىرعىزدى.
«مەن اققىستاۋ اۋدان ورتالىعىنا «جاردەم» مەديتسينالىق پويىزىنىڭ كەلە جاتقانىن ەستىپ, تۇششىقۇدىق اۋىلىنان دەنساۋلىعىمدى تەكسەرتۋ ءۇشىن كەلدىم. بۇل – اۋىلدىق جەرلەردىڭ تۇرعىندارى ءۇشىن, سونداي-اق قارجى جاعى ازداۋ مەن سياقتى زەينەتكەرلەرگە ۇلكەن مۇمكىندىك. قازىرگى كەزدە مەديتسينالىق قىزمەتتەردىڭ باسىم بولىگى – جەكەمەنشىك, ءاربىر قارالۋ كەم دەگەندە 5-6 مىڭ تەڭگە تۇرادى. مەن تاڭەرتەڭنەن بەرى بەس ماماننىڭ قاراۋىنان ءوتتىم, ەندى ۋدز پروتسەدۋراسىن كۇتىپ وتىرمىن. دارىگەرلەردىڭ بارلىعى ۇنادى, اۋرۋدىڭ سەبەپتەرى مەن ەمدەۋ جولدارىن ەگجەي-تەگجەي ءتۇسىندىردى. اسىرەسە نەۆروپاتولوگ پەن گينەكولوگتى اتاپ وتكىم كەلەدى. پويىزداردا بارلىق جاعداي جاسالعان: ءار ماماننىڭ جەكە كابينەتى بار, ال ىشىندەگى ءجۇرىپ-تۇراتىن جەردە مەن سياقتى ەرەسەكتەر ءۇشىن وتىرۋعا مۇمكىندىك بار. Samruk-Kazyna Trust قورىنا ۇلكەن العىسىمدى بىلدىرەمىن جانە بىزگە ءجيى كەلىپ تۇرۋلارىڭىزدى تىلەيمىن. سەبەبى ءبىر دەگەندە 5-6 ماماننىڭ قاراۋىنان وتۋگە بولادى. سونىسىمەن قولجەتىمدى ءارى ىڭعايلى», دەپ اتىراۋ وبلىسىنىڭ تۇرعىنى جۇمازيا الميروۆا ءوز العىسىن ءبىلدىردى.
«جاردەم» مەديتسينالىق پويىزى ەندى كەستەگە سايكەس اقتوبە وبلىسىنىڭ 12 ستانساسىنا بارادى. وندا 21 شىلدەگە دەيىن بولىپ, شالعاي بەكەتتەردەگى جەرگىلىكتى تۇرعىندارعا قاجەت مەديتسينالىق كومەك تەگىن كورسەتىلەدى. «29 ماۋسىمدا نوعايتى ستانساسىنان باستاپ, تاڭعى ساعات 09:00-دەن حالىقتى قابىلدايمىز», دەدى «جاردەم» مەديتسينالىق پويىزىنىڭ باس دارىگەرى اينۇر ەگىنباەۆا.
20 ماۋسىمدا «سالاماتتى قازاقستان» ەكىنشى مەديتسينالىق پويىزى ىسكە قوسىلدى. كەستە بويىنشا مەديتسينالىق پويىز ماماندارى مالايسارى ستانساسىندا جۇمىسىن جالعاستىرۋدا. جۇمىسىن الماتى وبلىسىنان باستاعان پويىز ودان ءارى شىعىس قازاقستان, پاۆلودار, اقمولا, سولتۇستىك قازاقستان, قوستاناي جانە قاراعاندى, جەتىسۋ, ۇلىتاۋ, اباي وبلىستارىنا بارادى. سونىمەن قاتار قوس مەديتسينالىق پويىز ەلىمىزدىڭ شالعاي اۋداندارىنداعى 147 ستانسانى قامتيدى.
جوبانى «سامۇرىق-قازىنا» اق كومپانيالار توبىنىڭ اتىنان Samruk-Kazyna Trust الەۋمەتتىك جوبالاردى دامىتۋ قورى, دەنساۋلىق ساقتاۋ مينيسترلىگىنىڭ قاتىسۋىمەن, «قازاقستان تەمىر جولى» ۇك» اق جانىنداعى «الەۋمەتتىك جوبالار قورى» كورپوراتيۆتىك قورىمەن بىرلەسىپ ىسكە اسىرۋدا.
