بۇل – سەردار بەردىمۇحامەدوۆ پرەزيدەنت بولىپ سايلانعاننان كەيىنگى ەكى ەل باسشىلارىنىڭ العاشقى بەتپە-بەت كەزدەسۋى. وسىعان وراي مەملەكەت باسشىسى تۇرىكمەنستاننىڭ جاڭا پرەزيدەنتىن سايلاۋداعى جەڭىسىمەن قۇتتىقتادى.
قاسىم-جومارت توقاەۆ بۇگىن اشحابادتا وتەتىن التىنشى كاسپي سامميتىنە ەرەكشە ءمان بەرەتىنىن جەتكىزدى. قازاقستان پرەزيدەنتى ءسامميتتىڭ ناتيجەسى كاسپي ماڭى مەملەكەتتەرىنىڭ دوستىق پەن تاتۋ كورشىلىك بايلانىستارىن ودان ءارى نىعايتۋعا ەلەۋلى ۇلەس قوسىپ, ءوزارا ءتيىمدى ىنتىماقتاستىقتىڭ كوكجيەگىن كەڭەيتەتىنىنە سەنىم ءبىلدىردى.
سەردار بەردىمۇحامەدوۆ قاسىم-جومارت توقاەۆقا شاقىرۋىن قابىل العانى ءۇشىن ريزاشىلىعىن ءبىلدىرىپ, وسى سامميتكە قاتىستى ويىن ايتتى. تۇرىكمەنستان پرەزيدەنتى بارىمىزگە ورتاق كاسپيدىڭ يگىلىگى ءۇشىن بۇگىن كەلەلى باسقوسۋ بولاتىنىن جەتكىزدى.
