ەكولوگيا • 29 ماۋسىم، 2022

ماماندار يتبالىقتاردىڭ قىرىلۋ سەبەبىن انىقتاي المادى

13 رەت كورسەتىلدى

جىل باسىنان بەرى كاسپي تەڭىزىنىڭ جاعالاۋىنان 219 يتبالىقتىڭ ولەكسەسى تابىلدى. ەكولوگيا، گەولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتى يتبالىقتاردىڭ ۇشاسى تابىلعان جەرلەردەن تەكسەرۋ ناتيجەلەرى الىنعانىن ايتتى، دەپ حابارلايدى Egemen.kz.

گيدروبيولوگيا جانە ەكولوگيا ينستيتۋتىنىڭ، «ميكروبيولوگيا جانە ۆيرۋسولوگيا عىلىمي-وندىرىستىك ورتالىعى» جشس، «قازاقستاندىق قولدانبالى ەكولوگيا اگەنتتىگى» جشس عىلىمي قىزمەتكەرلەرى، سونداي-اق بالىق شارۋاشىلىعى كوميتەتى، ماڭعىستاۋ وبلىسىنىڭ ەكولوگيا دەپارتامەنتى جانە قر اشم ۆەتەريناريالىق باقىلاۋ جانە قاداعالاۋ كوميتەتىنىڭ اۋماقتىق بولىمشەلەرىنىڭ قۇزىرەتتى مەملەكەتتىك ورگاندارىنىڭ وكىلدەرى قاتىسقان تالقىلاۋ ناتيجەسى بويىنشا وسى جىلدىڭ 24 ماۋسىمىندا يتبالىقتاردىڭ ءولىمى بويىنشا قورىتىندى دايىندالعان.

«قورىتىندىعا سايكەس، تابىلعان ولەكسەلەردىڭ قاتتى ىدىراۋىنا بايلانىستى، ءولىمنىڭ ناقتى سەبەپتەرىن انىقتاۋ مۇمكىن بولمادى. سونىمەن قاتار عالىمدار مەن قۇزىرەتتى مەملەكەتتىك ورگانداردىڭ پىكىرىنشە، جاڭا تۋعان كۇشىكتەردىڭ مۇز ۇستىندە اشىق تەڭىزگە شىعارۋ سالدارىنان ولاردىڭ السىزدەنۋى، كۇشىكتەردىڭ سۋعا ءتۇسۋى سالدارىنان قاتىپ قالۋى، ەرەسەك يتبالىقتاردىڭ بالىق اۋلاۋ تورلارىنا ءتۇسۋى، سونداي-اق كەمەلەردىڭ بۇراندالارىنا ءتۇسۋى قىرىلۋدىڭ ىقتيمال سەبەپتەرى بولۋى مۇمكىن»، دەلىنگەن ۆەدومستۆو حابارلاماسىندا.

عىلىمي ۇيىمدار مەن مۇددەلى مەملەكەتتىك ورگانداردىڭ وكىلدەرى كاسپي تەڭىزىندە جۇرگىزىلىپ جاتقان ءتۇپ تەرەڭدەتۋ جۇمىستارى تابىلعان يتبالىقتاردىڭ قىرىلۋىنا تىكەلەي اسەر ەتپەيدى جانە ىقتيمال سەبەپ رەتىندە قاراستىرىلمايدى دەگەن ورتاق پىكىرگە كەلدى.

كاسپي يتبالىعى ترانسشەكارالىق سۋ جانۋارلارى بولعانىنا بايلانىستى، 2021 جىلعى قىركۇيەكتە قازاقستان مەن رەسەيدىڭ XVII ايماقارالىق ىنتىماقتاستىق فورۋمى بارىسىندا قازاقستان مەن رەسەي ەكولوگيا مينيسترلىكتەرى اراسىندا كاسپي يتبالىعىنىڭ پوپۋلياتسياسىن ساقتاۋ جونىندەگى 2021-2026 جىلدارعا ارنالعان بىرلەسكەن ءىس-قيمىل جوسپارىنا قول قويىلدى.

«مەملەكەت باسشىسى كاسپي يتبالىعى پوپۋلياتسياسىنىڭ ازايۋىن شەشۋ ماسەلەسىن جەكە باقىلاۋىنا الدى جانە بۇگىنگى كۇنى مينيسترلىك كاسپي يتبالىعىنىڭ كوبەيۋ جانە مەكەندەۋ ورىندارىن ساقتاۋ ءۇشىن ەرەكشە قورعالاتىن تابيعي اۋماق قۇرۋ ماسەلەسىن پىسىقتاۋدا. بۇگىنگى تاڭدا ءتيىستى جاراتىلىستانۋ-عىلىمي نەگىزدەمە ازىرلەنۋدە.

بۇدان باسقا، 2020 جىلدان باستاپ كاسپي يتبالىعى جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىنىڭ تىزبەسىنە ەنگىزىلدى (قازاقستان رەسپۋبليكاسىنىڭ قىزىل كىتابى) جانە قر قىلمىستىق كودەكسىنە سايكەس، جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىن اۋلاۋ 3000 اەك دەيىن ايىپپۇل سالۋعا نەمەسە 3 جىلعا دەيىن باس بوستاندىعىن شەكتەۋمەن جازالانادى.

ءوز كەزەگىندە، بيىلعى جىلدىڭ كوكتەمىندە كاسپي تەڭىزىنىڭ جاعالاۋىندا يتبالىقتاردىڭ ولەكسەلەرى تابىلعانىنا بايلانىستى ماڭعىستاۋ وبلىسىنىڭ پوليتسيا دەپارتامەنتىنە پروتسەستىك شارالار قابىلداۋ ءۇشىن ءتيىستى ماتەريالدار جولداندى»، دەلىنگەن مينيسترلىكتىڭ حابارلاماسىندا.

سوڭعى جاڭالىقتار

ۇلىلار ۇندەستىگى

قازاقستان • كەشە

باعا باقىلانادى

قارجى • كەشە

مەيىرىم شۇعىلاسى

رۋحانيات • كەشە

تسيفرلى دامۋ: جاڭا بەتبۇرىس

تەحنولوگيا • كەشە

ماحاببات اۋەنى

ونەر • كەشە

ۇقساس جاڭالىقتار