قازاقستاندىق تەننيسشى العاشقى اينالىمدا دۇنيەجۇزىلىك رەيتينگتە 157-ورىندا تۇرعان امەريكالىق كوكو ۆاندەۆەگەمەن كەزدەستى.
ءبىرىنشى پارتيا تاعدىرى تاي-برەيكتە شەشىلىپ, وندا ە.رىباكينا ايقىن باسىمدىلىق تانىتتى – 7:6 (7:2). ەكىنشى پارتيادا ەسەپ 5:5 بولعان مەزەتتە ەلەنا برەيك جاساي الدى – 6:5. سودان كەيىن ءوز مۇمكىندىگىن ءمۇلت جىبەرگەن جوق – 7:5. ءبىر ساعات 40 مينۋتقا سوزىلعان ماتچ بارىسىندا قازاقستاندىق سپورتشى 11 ەيسپەن بىرگە 1 برەيك-پوينتتى پايدالانا ءبىلدى.
قارسىلاسى 8 ەيس جاساعانىمەن, 9 برەيك-پوينتتىڭ بىردە-بىرەۋىن ىسكە اسىرا العان جوق. ە.رىباكينا ەكىنشى اينالىمدا الەمنىڭ 56-راكەتكاسى, 2019 جىلعى US Open جارىسىنىڭ جەڭىمپازى, كانادالىق بيانكا اندرەەسكۋمەن شەبەرلىك بايقاسادى. ول 224-ورىنداعى امەريكالىق ەمينا بەكتاستى وڭاي ۇتتى – 6:1, 6:3.
تاعى ءبىر قازاقستاندىق, الەمنىڭ 33-راكەتكاسى يۋليا پۋتينتسەۆا رەيتينگتە وزىنەن ءتورت ساتى تومەن تۇرعان فرانتسيالىق اليزە كورنەمەن ويناپ, 3:6, 6:7 (5:7) ەسەبىمەن ۇتىلىپ قالدى. ەرلەر اراسىندا رەيتينگتە 164-ورىنداعى ميحايل كۋكۋشكين الەمنىڭ 34-راكەتكاسى, امەريكالىق دجەنسون برۋكسبيگە شاماسى جەتپەدى – 3:6, 2:6, 3:6.
