«بۇگىن ءبىز پالاتانىڭ ەكىنشى سەسسياداعى جۇمىسىن اياقتاپ, قورىتىندى وتىرىسىمىزدى وتكىزدىك. بۇل پارلامەنتتىك ماۋسىمدا ءبىز ماڭىزى زور تاريحي وزگەرىستەر مەن ىرگەلى ىستەردىڭ كۋاسى بولدىق. سەسسيا بارىسىندا تاۋەلسىزدىگىمىزدىڭ 30 جىلدىعىن بۇكىل ەل بولىپ اتاپ وتتىك. سونداي-اق جىل باسىندا بۇرىن-سوڭدى بولماعان جاڭا سىن-قاتەرلەرمەن بەتپە-بەت كەلدىك. قاسىرەتتى قاڭتار وقيعاسى, الەمدىك گەوساياسي احۋال مەملەكەتتىك باسقارۋ جۇيەسىندە جاڭا تاسىلدەر مەن شەشىمدەردى تالاپ ەتتى. وسىعان قاراي مەملەكەت باسشىسى كەشەندى رەفورمالار توپتاماسىن جاريالادى. سول ارقىلى زاڭ شىعارۋ قىزمەتىنىڭ دە باسىم باعىتتارىن بەلگىلەپ بەردى», دەدى ماۋلەن اشىمباەۆ سەناتتىڭ جالپى وتىرىسىندا.
سەنات توراعاسى تۇبەگەيلى ساياسي وزگەرىستەر قولعا الىنىپ, كونستيتۋتسيالىق رەفورما جۇرگىزىلگەنىن ايتتى.
«ادىلەتتى جاڭا قازاقستان قۇرۋدىڭ بەرىك نەگىزى قالاندى. شىن مانىندە, ەلىمىز الەۋمەتتىك-ەكونوميكالىق جانە ساياسي دامۋدىڭ جاڭا كەزەڭىنە قادام باستى. كونستيتۋتسياعا ەنگىزىلگەن تۇزەتۋلەرگە سايكەس پارلامەنتتىڭ مارتەبەسى ارتتى. ازاماتتاردىڭ قۇقىعىن قورعاۋ تاسىلدەرى جەتىلىپ, حالىقتىڭ ەل باسقارۋ ىسىنە قاتىسۋ مۇمكىندىگى كەڭەيدى. بۇل وزگەرىستەر جاڭارۋدىڭ باسى عانا. ساياسي جۇيەمىزدى رەفورمالاۋ ودان ءارى جالعاسا بەرەتىنى ءسوزسىز. بۇل جونىندە پرەزيدەنتىمىز ناقتى ايتتى. وسى باعىتتا پارلامەنت بىرقاتار جاڭا زاڭ قابىلداپ, قولدانىستاعى زاڭناماعا تۇزەتۋلەر ەنگىزۋگە ءتيىس. جاڭا سەسسيادا وسى جۇمىستى بەلسەندى تۇردە جۇرگىزەمىز», دەدى سەنات توراعاسى.
ونىڭ ايتۋىنشا, پارلامەنت ەكىنشى سەسسيادا ۇكىمەتپەن بىرلەسە وتىرىپ, 78 زاڭ قابىلدادى.
«ولار پرەزيدەنتىمىزدىڭ تاپسىرمالارىن, ۇلتتىق جوبالار مەن مەملەكەتتىك باعدارلامالاردى ىسكە اسىرۋعا ارنالدى. زاڭ شىعارۋ ىسىندە ادام قۇقىعىن قورعاۋ, ازاماتتاردى الەۋمەتتىك جاعىنان قامتاماسىز ەتۋ ماسەلەسىنە باسا ءمان بەرىلدى. مەملەكەتتىك باسقارۋ جۇيەسىن جەتىلدىرۋدى, ەكونوميكامىزدى ودان ءارى دامىتۋدى جانە ەلىمىزدىڭ قاۋىپسىزدىگىن كۇشەيتۋدى كوزدەيتىن زاڭدار قابىلداندى. سەسسيا بارىسىندا ازاماتتاردىڭ ءال-اۋقاتىن ارتتىرۋعا ارنالعان كەشەندى ءىس-شارالار مەن قوعامدىق-ساياسي باستامالاردى زاڭنامالىق تۇرعىدان ۋاقتىلى قامتاماسىز ەتۋگە باسا ءمان بەرىلدى. قوعامداعى الەۋمەتتىك تەڭسىزدىكتى جويۋعا, ەرەكشە قاجەتتىلىگى بار ازاماتتاردى جان-جاقتى قولداۋعا ارنالعان نورمالار قابىلداندى. وسىعان قاراي سەناتورلار مەملەكەت باسشىسىنىڭ تاپسىرمالارىن ورىنداۋ ماقساتىمەن زاڭعا باستاماشىلدىق ەتۋ قۇقىعىن كەڭىنەن پايدالاندى. ءبىرىنشى سەسسيادا سەنات دەپۋتاتتارى 7 زاڭعا باستاماشى بولسا, بۇل سەسسيادا 18 زاڭ جوباسى بويىنشا باستاماشىلدىق جاسادى. الداعى ۋاقىتتا دا وسى قارقىندى ساقتايمىز دەپ سەنەمىن», دەدى ماۋلەن اشىمباەۆ.
سەسسيا بارىسىندا 2 پارلامەنتتىك تىڭداۋ جانە 4 ۇكىمەت ساعاتى وتكىزىلدى. وندا اۋىل شارۋاشىلىعىن دامىتۋ, جاستار ساياساتى, بيۋدجەتارالىق قاتىناستى جەتىلدىرۋ, سىرتقى جانە ىشكى ساۋدا, وندىرىستىك قاۋىپسىزدىك, وڭىرلەردى گازداندىرۋ سياقتى وزەكتى ماسەلەلەر كوتەرىلدى. سەناتتا 30-عا جۋىق دوڭگەلەك ۇستەل ءوتتى. تۇراقتى كوميتەتتەر ايماقتاردا 10-نان استام كوشپەلى وتىرىس ۇيىمداستىردى.
