ەگەمەن قازاقستان • 26 ماۋسىم، 2022

ساف اۋاداعى سەرۋەن

بۇقارالىق اقپارات قۇرالدارى قىزمەتكەرلەرى كۇنى قارساڭىندا رەسپۋبليكالىق Egemen Qazaqstan جانە «كازاحستانسكايا پراۆدا» گازەتتەرىنىڭ ۇجىمى تابيعات اياسىندا دەمالىپ، كاسىبي مەرەكەنى ءماندى دە مازمۇندى اتاپ ءوتتى. بۇل قوس ۇجىمنىڭ ءبىر شاڭىراق استىنا بىرىككەننەن كەيىنگى جانە ەكى جىلدىق پاندەميادان سوڭعى العاشقى باس قوسۋى.

فارحات قايرات ۇلى

ۇجىمدى اقپارات جانە قوعامدىق دامۋ ءمينيسترى اسقار وماروۆ ارنايى كەلىپ قۇتتىقتادى.

– ءۇش جىل بۇرىن مەملەكەت باسشىسى قاسىم-جومارت توقاەۆ بۇقارالىق اقپارات قۇرالدارى قىزمەتكەرلەرى كۇنىن ارنايى جارلىقپەن بەكىتكەن بولاتىن. سول ۋاقىتتان بەرى بۇل جۋرناليستەر قاۋىمى اسىعان كۇتەتىن مەرەكەگە اينالدى. ءۇش جىلدا كوپ وزگەرىس بولدى. وتاندىق مەديا جاقسى دامىپ كەلەدى. Egemen Qazaqstan جانە «كازاحستانسكايا پراۆدا» گازەتتەرى ءوز بيىگىنەن تۇسپەي، اتىنا زاتى ساي باسىلىمدار ەكەنىن دالەلدەپ وتىر، – دەدى اسقار وماروۆ.

ءمينيستردىڭ ايتۋىنشا، قوس گازەتتى دە ەل پرەزيدەنتى مۇقيات وقيدى. باسىلىمداردا شىققان وزەكتى ماتەريالدار بويىنشا ءتيىستى ورىندارعا تاپسىرما بەرەدى.

– ماسەلەن، مەملەكەت باسشىسىنىڭ Egemen Qazaqstan گازەتىندە جاريالانعان باتىس قازاقستان وبلىسىنداعى جول ماسەلەسىنە قاتىستى ماقالاعا نازار اۋدارىپ، سونىڭ ناتيجەسىندە ۇلكەن جۇمىستار قولعا الىنعانى كوپشىلىكتىڭ ەسىندە دەپ ويلايمىن. احمەت بايتۇرسىن ۇلى «گازەت – حالىقتىڭ كوزى، قۇلاعى ءھام ءتىلى» دەگەن بولاتىن. بۇدان اسىرىپ ايتا الماسپىز. Egemen Qazaqstan جانە «كازاحستانسكايا پراۆدا» گازەتتەرى احمەت بابامىز ايتقان ۇدەدەن شىعىپ وتىر. سەبەبى ەلىمىزدە كلاسسيكالىق تۇردە كونۆەرگەنتتىك فورماتتى پايدالانىپ جۇرگەن باسقا باسىلىم جوق. كاسىبي مەرەكە قارساڭىندا ءبىر شاڭىراق استىنا ۇيىسقان قوس ۇجىمعا تولاعاي تابىس تىلەيمىن. جۇمىستارىڭىز جەمىستى بولسىن! – دەدى مينيستر.

اسقار وماروۆ قوس گازەتتىڭ قىزمەتكەرلەرىنە پرەزيدەنت قاسىم-جومارت توقاەۆتىڭ العىس حاتىن جانە مينيسترلىكتىڭ ارنايى ماراپاتتارىن تابىس ەتتى. سونداي-اق Egemen Qazaqstan جانە «كازاحستانسكايا پراۆدا» گازەتتەرىنىڭ 100 جىلدىعىنا ارنالعان مەرەيتويلىق مەدالداردى تاپسىردى.

باسىلىمداردىڭ ۇجىمى تابيعات اياسىندا ۆولەيبول، ارقان تارتۋ، اسىق، بەس تاس، ساداق اتۋ سەكىلدى سپورت تۇرلەرىنەن سىنعا ءتۇستى. سونىمەن قاتار ەكسپرومت ءمۇشايرا ۇيىمداستىرىلدى. اسەم ءان دە شىرقالدى، بي دە بيلەندى. ۇزدىك شىققاندار ارنايى سىيلىقتارمەن ماراپاتتالدى.

شاتتىققا بولەپ، شالقار شابىت سىيلاعان ءىس-شارادان جۋرناليستەر قاۋىمى كوتەرىڭكى كوڭىل كۇيمەن تارقاستى.