كۋكۋشكين ىرىكتەۋ سايىستارىنىڭ جارتىلاي فينالىندا دۇنيەجۇزىلىك رەيتينگتە 230-ورىندا تۇرعان 38 جاستاعى گەرمانيالىق فيليپپ كولشرايبەرمەن كۇش سىناستى. ءبىرىنشى پارتيا تاي-برەيككە دەيىن سوزىلىپ, گەرمانيالىق سپورتشى جەڭىسكە جەتتى – 7:6 (7:4). ەسەسىنە ەكىنشى سەتتە قازاقستاندىق تەننيسشى ەسە قايتاردى – 6:3. ال ءۇشىنشى, شەشۋشى پارتيادا كۋكۋشكين 2:0 ەسەبىمەن العا كەتتى. ەسەپ 5:2 بولىپ, ماتچقا دوپ بەرگەندە, قازاقستاندىق تەننيسشى سول مۇمكىندىگىن پايدالانا المادى. دەگەنمەن كەيىننەن ءبارىبىر ماقساتىنا جەتتى – 6:4. كۋكۋشكين ىرىكتەۋ سايىستارىنىڭ فينالىندا الەمنىڭ 178-راكەتكاسى ماجارستاندىق جومبور پيروشپەن كەزدەسەدى. ونى جەڭسە «ۇلكەن دۋلىعا» جارىسىنىڭ نەگىزگى كەزەڭىنە جولداما الادى.
ۇلىبريتانيانىڭ يستبورن قالاسىنداعى ATP 250 تۋرنيرىنە قاتىسىپ جاتقان قازاقستاننىڭ ءبىرىنشى, الەمنىڭ 39-راكەتكاسى الەكساندر بۋبليك شيرەك فينالعا شىقتى. ەكىنشى اينالىمدا ول دۇنيەجۇزىلىك رەيتينگتە 86-ورىندا تۇرعان اۋستراليالىق دجون ميللمانمەن شەبەرلىك بايقاسىپ, ەكى سەتتە 6:4, 6:2 ەسەبىمەن جەڭىسكە جەتتى. الەكساندر جارتىلاي فينالعا شىعۋ ءۇشىن الەمنىڭ 14-راكەتكاسى امەريكالىق تەيلور فريتسپەن كەزدەسەدى.
