ءبىلىم • 23 ماۋسىم، 2022

ۇزدىك ۇستازدارعا ارنالعان ارنايى باعدارلاما

31 رەت كورسەتىلدى

پرەزيدەنت قاسىم-جومارت توقاەۆ مۇعالىم تاپشى وڭىرلەردىڭ ماسەلە­سىن شەشۋدى تاپسىرعان ەدى. وسىعان وراي جاۋاپتى ۆەدومستۆو ارنايى باعدارلاما ازىرلەگەن بولاتىن. جاقىندا وقۋ-اعارتۋ مينيسترلىگى اتالعان جوبانىڭ ىسكە قوسىلعانىن حابارلادى.

ارنايى باعدارلاما ەلىمىزدە مۇعالىمدەر تاپشىلىعى بار جانە ءبىلىم ساپاسى ناشار وڭىرلەرگە ۇزدىك پەداگوگتەردى تارتۋعا باعىتتالعان. بۇعان دەيىن مامان تاپشىلىعى  تۇركىستان، اتىراۋ، ماڭعىستاۋ جانە الماتى وبلىستارىندا بار ەكەنىن جازعانبىز. بۇل وڭىرلەرگە ماتەماتيكا، فيزيكا، حيميا، ورىس ءتىلى مەن ادە­بيەتى، شەت ءتىلى مۇعالىمدەرى قاجەت.

قازىرگى ۋاقىتتا بايقاۋعا قاتىسۋ ءۇشىن قۇجات قابىلداۋ ءجۇرىپ جاتىر. وقۋ-اعارتۋ مينيسترلىگىنىڭ اق­پاراتىنا سۇيەنسەك، قاجەتتى قۇجات­تار ءتىزىمى جەرگىلىكتى اتقارۋشى ورگان­داردىڭ جانە نزم اقپارات رەسۋرستارىندا ورنالاستىرىلعان. قۇجاتتار 2022 جىلعى 26 ماۋسىمعا دەيىن قابىلدانادى.

مەكتەپكە دەيىنگى جانە ورتا ءبىلىم كوميتەتىنىڭ توراعاسى گۇلميرا كارىموۆا: «حالىقارالىق PISA 2018 زەرتتەۋىنىڭ جانە ۇلتتىق بىرىڭ­عاي تەستىلەۋدىڭ ناتيجەلەرى باسقا وبلىستاردىڭ وقۋشىلارىمەن سالىستىرعاندا وسى وڭىرلەر وقۋشى­لارىنىڭ بىلىمىندە الشاقتىق بارىن كورسەتىپ وتىر. اتالعان وبلىستاردىڭ ءبىلىم ساپاسىن ارتتىرۋ جانە پەداگوگ تاپشىلىعى ماسەلەسىن شەشۋ ءۇشىن ۇزدىك مۇعالىمدەردى تارتۋ ما­ق­ساتىندا ارنايى باعدارلاما ازىرلەندى. پە­داگوگتەر كونكۋرس ارقىلى ىرىكتەلەدى. كونكۋرسقا تيiستi بەيiندەر بويىنشا جوعارى پەداگوگيكالىق، جوعارى كاسiپتiك بiلiمi بار، «پەداگوگ-ساراپشى»، «پەداگوگ-زەرتتەۋشى»، «پەداگوگ-ماگيستر» بiلiكتiلiك ساناتتارى بار مۇعالىمدەر، سونداي-اق وقۋ ۇلگەرiمi جاقسى جوعارى وقۋ ورىندارىنىڭ پەداگوگيكالىق مامان­دىقتارىنىڭ تۇلەكتەرi قاتىسا الادى. پەداگوگتەر كونكۋرسقا تۇرعىلىقتى جەرىنە قاراماستان قاتىسا الادى»، دەدى.

مينيسترلىكتىڭ مالىمدەۋىنشە، مۇعالىمدەردى بوس لاۋازىمدارعا تارتۋ ءۇشىن ءتيىستى وڭىرلەردىڭ وبلىستىق ءبىلىم باسقارمالارى جانىنان ۇي­لەس­تىرۋ كەڭەستەرى، سونداي-اق مي­نيسترلىك جانىنان كونكۋرس كوميسسياسى قۇرىلادى. بوس جۇمىس ورىندارىنا ورنالاسۋ ءۇشىن ۇمىتكەرلەر كومپيۋتەرلىك تەستىلەۋدى ءساتتى تاپسىرىپ، ەسسە جازىپ، اڭگىمەلەسۋدەن ءوتۋى كەرەك. ەمتيحاندار ۇمىتكەردىڭ تاڭداۋى بويىن­شا وڭىردەگى نازارباەۆ زياتكەرلىك مەكتەپتەرىندە قازاق، ورىس نەمەسە اعىلشىن تىلدەرىندە وتكىزى­لەدى. ال اڭگىمەلەسۋدى مينيسترلىك جانىن­داعى كونكۋرس كوميسسياسى وتكىزەدى. كوميسسيا قۇرامىنا «نزم» دببۇ، ى.التىنسارين اتىنداعى ۇبا، «ورلەۋ» باۇو» اق جانە وقۋ-اعارتۋ مينيسترلىگىنىڭ وكىلدەرى كى­رەدى.

«كونكۋرس ىرىكتەۋىنەن وتكەن مۇعالىمدەرگە 4 اپتالىق بىلىكتىلىكتى ارتتىرۋ كۋرستارى مەن كۋرستان كەيىنگى قولداۋ جۇمىستارى ۇيىم­داستىرىلادى. وندا ونلاين جانە وفلاين فورماتتاعى سەمينارلار، ۆەبينارلار مەن شەبەرلىك سىنىپتارى، زياتكەرلىك مەكتەپتەردىڭ زەرت­حانالارىندا جاراتىلىستانۋ پاندەرى مۇعالىمدەرىنە ارنالعان تاعىلىمدامالار بولادى. ۇزدىك پەدا­گوگتەردى تارتۋعا ارنالعان ارنايى باعدارلامادا مۇعالىمدەردى قولداۋعا باعىتتالعان شارالار كەشەنى بار. اتاپ ايتقاندا، لاۋازىمدىق جالاقىنىڭ 250% مولشەرىندە ىنتالاندىرۋ تولەمدەرى، ونىڭ ىشىندە جالاقىنى كوتەرۋ، تۇرعىن ءۇيدى جالداۋ اقىسىن جانە كوممۋنالدىق تولەمدەر شىعىنىن وتەۋ قاراستىرىلعان»، دەلىنگەن ۆەدومستۆونىڭ حابارلاماسىندا.

سوڭعى جاڭالىقتار

سال-سەرىنىڭ سوڭى

قازاقستان • كەشە

GGG – CANELO: ەر كەزەگى ۇشكە دەيىن...

كاسىپقوي بوكس • كەشە

الاش ارداقتىسىن تۇركى الەمى ۇلىقتادى

احمەت بايتۇرسىن ۇلى • كەشە

ءبىزدىڭ سايىن

ادەبيەت • كەشە

ماعجاننىڭ قاراسوزدەرى

ادەبيەت • كەشە

ساف اۋاداعى سەرۋەن

ەگەمەن قازاقستان • كەشە

ۇقساس جاڭالىقتار