ەل ىشىندە ءجۇرىپ ەلەۋلى ەڭبەك ەتەتىن قىزمەتكەرلەردىڭ ەڭبەگى كەيدە كوپتىڭ كوزىنە كورىنبەي, قالتارىستا قالىپ جاتاتىنى بار. باسقا-باسقا, ءدال وسى جقاج قىزمەتكەرلەرىنە دەگەن تالاپتىڭ جوعارى ەكەنى داۋسىز. ولاردىڭ بويىندا فيزيكالىق دايىندىق, سپورتقا بەيىمدىلىك مەنمۇندالاپ تۇرۋى كەرەك. ءبىر سوزبەن ايتقاندا, ارنايى جاساق قىزمەتكەرلەرى قاي كەزدە دە شاقىرتۋلارعا دايىن تۇرۋعا ءتيىس. جۇمىستارىنا قاي كەزدە دە كاسىبي كوزقاراسپەن قارايتىن سالا قىزمەتكەرلەرى مۇنى وتە جاقسى تۇسىنەدى. ولار جاۋاپكەرشىلىك جۇگىن مويىماي كوتەرىپ ءجۇر.
«2011 جىلدان باستاپ وسى سالادا ءتۇرلى قىزمەتتەردى اتقارىپ ءجۇرمىن. پاترۋلدىك پوليتسيا, يۋۆەنالدىق پوليتسيادا ەڭبەك ەتكەن جايىم بار. كوشى-قون قىزمەتىندە دە تەر توگىپ, تاجىريبەمدى تولىستىرعان بولاتىنمىن. قازىرگى تاڭدا جقاج-دا جۇمىس ىستەپ ءجۇرمىن. البەتتە, ءبىزدىڭ جۇمىس جەدەلدىكتى تالاپ ەتەتىنى داۋسىز.
بۇل جۇمىستى اتقارۋ وڭاي ەمەس. جۇمىسقا تۇرۋ ءۇشىن الدىمەن جوعارى بىلىممەن قاتار اسكەري بيلەتىڭ بولۋى شارت. ودان بولەك سپورت شەبەرى نەمەسە وسى اتاققا كانديدات بولۋعا ءتيىستىسىڭ. قىزمەتكە ورنالاسپاس بۇرىن ارنايى ەمتيحان تاپسىردىق. ءبىر سوزبەن ايتقاندا, ارنايى جاساقتا ەڭبەك ەتۋدەن ءۇمىتى بار ادام سپورتقا بەيىم بولعانى ابزال. ەڭ باستىسى, ادام ءوز ەلىنىڭ پاتريوتى ەكەنىن ۇمىتپاعانى دۇرىس. بارلىق سالادا جۇمىس ىستەيتىن ازاماتتار سول ۇستانىمدى ىلكى ساتكە دە ساناسىنان شىعارماۋى كەرەك», دەيدى شىمكەنت قالاسى پوليتسيا دەپارتامەنتىنىڭ جقاج قىزمەتكەرى مامەت مامەدوۆ.
ۆولەيبولعا اڭسارى اۋعان مامەت مامەدوۆ كوماندالىق سىنداعى دودالاردا 10 مارتە ەل چەمپيونى اتاعىن يەلەنگەن. بويى ەكى مەتر بولعاندىقتان ۆولەيبولدى ءبىر كىسىدەي مىقتى وينايتىنى داۋسىز. ول قاي كەزدە دە فيزيكالىق جانە فۋنكتسيونالدىق دايىندىققا ايرىقشا نازار اۋدارادى. ونسىز ءبارى بەكەر ەكەنىن جاقسى بىلەدى.
ءيا, قالاي الىپ قاراساق تا, جۇمىستىڭ جەڭىلى بولمايدى. ونى پوليتسيا قىزمەتكەرلەرى ءبىر كىسىدەي تۇسىنەدى.
«جۇمىس قاي كەزدە دە جاۋاپكەرشىلىكتى تالاپ ەتەتىنى ايتپاسا دا تۇسىنىكتى. مەن بۇل قىزمەتكە جۇرەك قالاۋىمەن كەلگەن اداممىن. ەلدىڭ تىنىشتىعىن كۇزەتەتىن سالادا تالماي تەر توگۋ, ايانباي ەڭبەكتەنۋ – مەن ءۇشىن ماقتانىش ءارى ابىروي. راسىندا دا, قوعامدىق قاۋىپسىزدىكتى قامتاماسىز ەتۋدىڭ جاۋاپكەرشىلىگى وراسان زور. ونى تۇسىنەمىن. بارلىق قيىندىقتى ەڭسەرە ءجۇرىپ, وتباسىما ايرىقشا كوڭىل بولەمىن. ارىپتەستەر تاۋلىكتىڭ كەز كەلگەن ۋاقىتىندا شاقىرتۋلارعا دايىن تۇرادى. ويتكەنى جۇمىسىمىز سونداي. شيراقتىق, جەدەلدىك, كاسىبيلىكتى تالاپ ەتەدى. البەتتە, بارلىق جۇمىستىڭ وزىنە ءتان قيىندىعى بولاتىنى داۋسىز. ادام بالاسى سول اۋىرتپاشىلىقتارعا توزگەندە عانا ەڭبەگىنىڭ ونبەگىن كورەدى. راسىندا دا, جاساق قىزمەتكەرلەرىنە قويىلاتىن تالاپتىڭ قاتاڭ ەكەنى راس. الايدا سول قاتاڭ تالاپ ءبىزدى شاربولاتتاي شيرىقتىراتىنىن دا ۇمىتپاعان ءجون», دەيدى اسحات ۇسىپبەكوۆ.
جۋىردا عانا 31 جاسقا تولعان نۇرجان بەكزاتوۆ بىلعارى قولعاپ شەبەرى رەتىندە دە تالاي بيىكتەردى باعىندىرعان. جۇمىسىن تياناقتى اتقاراتىن ول سپورتتان مۇلدە الىستاعان ەمەس. ويتكەنى پوليتسيا قىزمەتكەرى قاي كەزدە دە بابىندا بولۋى كەرەكتىگىن سەزىنەدى.
«بىزدە جۇمىس ۋاقىتى تاڭعى ساپتىق جيىننان باستالادى. جۇمىس كەستەسىنە سايكەس سپورتتىق ءىس-شارالارعا قاتىسامىز. ياعني ۇزدىكسىز دەنە جاتتىعۋلارىن جاساپ تۇرامىز. كۇن سايىن تۇسكى ساعات 14:30-دان باستاپ دايارلىق ساباقتارىن وتكىزەمىز. ال 17:00-دەن 19:00-گە دەيىن كۇرەس تاسىلدەرىنەن ساباق وتەمىز. بويىم ەكى مەترگە جاقىن. بوكس ۇدايى سپورتتىق بابىمدا جۇرۋىمە تىكەلەي اسەر ەتەدى. باستاپقىداعى قىزىعۋشىلىعىم كەيىن كاسىبي كوزقاراسپەن ۇيلەسىم تاپتى. سودان دا بولسا كەرەك, اۋىز تولتىرىپ ايتارلىقتاي جەتىستىكتەرگە قول جەتكىزدىم.
2013-2016 جىلدار ارالىعىندا قازاقستان بىرىنشىلىگىنىڭ كۇمىس جۇلدەگەرى اتاندىم. 2017 جىلى 3-ورىن بۇيىردى. ودان سوڭ كۋبادا وتكەن «دوستىق» حالىقارالىق جارىسىنىڭ جەڭىمپازى بولدىم جانە پرەزيدەنت كۋبوگى دوداسىندا فينالعا دەيىن جەتتىم. قازاقستاندا ءىىو قىزمەتكەرلەرى اراسىندا وتكەن قويان-قولتىق ۇرىستان چەمپيون اتاندىم. ۇلتتىق ۇلان باس قولباسشىسىنىڭ كۋبوگىنا وتكىزىلگەن ءتۋرنيردىڭ فينالىنا دەيىن جەتتىم. قىزمەتىم, سپورتقا دەگەن ىنتام مەنى ءاردايىم العا جەتەلەيدى. قاي كەزدە دە وتان الدىنداعى انتقا ادال بولۋ كەرەكتىگىن قاپەرىمنەن شىعارمايمىن. ويتكەنى بايتاق دالانىڭ تىنىشتىعىن ساقتاۋ, وتاندى قورعاۋ – بارشامىزدىڭ قاسيەتتى بورىشىمىز», دەيدى ول.
راسىندا دا, جىلدام قيمىلدايتىن ارنايى جاساق جاۋىنگەرلەرىنىڭ قوعامداعى ورنى ەرەكشە ەكەنى تالاس تۋدىرماسا كەرەك. قوعامدىق تىنىشتىققا قاۋىپ تونگەن كەزدە الدىمەن ءدال وسى جۇمىستى اتقارىپ جۇرگەن ازاماتتار وقيعا ورنىنا جەدەل جەتەدى. كوپتىڭ الدىندا ءجۇرىپ ەڭبەك ەتكەندەرىنە قاراماستان, قوعام تاراپىنان ولاردىڭ جۇمىسى كوپ ەلەنە بەرمەيدى. بىراق سالا قىزمەتكەرلەرى وعان باس اۋىرتپايدى. ولار ءۇشىن ەڭ باستىسى – قوعامنىڭ تىنىشتىعى, ازاماتتاردىڭ قۇقىعىنىڭ قورعالۋى ماڭىزدى.
اقمارال ماحانبەتالى,
جۋرناليست
