اۋىل شارۋاشىلىعى مينيسترلىگى اقتوبەلىك اگرارشىلارعا يتالياندىق شەگىرتكەنىڭ باسىپ كىرۋ مۇمكىندىگى بارىن جەتكىزدى. اسىرەسە, ايتەكە بي اۋدانىنداعى ەگىستىكتەر زارداپ شەگۋى مۇمكىن. اۋماققا جاندىكتەر توندىرەتىن قاۋىپ پەن شىعىنداردى ازايتۋ ءۇشىن ماماندار جىبەرىلدى.
«ەڭ ۇلكەن قاۋىپ – اقتوبە وبلىسىندا. ءبىزدىڭ بارلىق نازارىمىز وسى ايماقتا. وندا شتاب جينالىسىن وتكىزدىك, تەحنيكانىڭ دايىندىعىن تەكسەردىك. رەسپۋبليكا بويىنشا ءبىز يتالياندىق شەگىرتكەدەن 760 مىڭ گەكتار القاپتى وڭدەيمىز. ال ءبىر عانا ايتەكە بي اۋدانىندا 211 مىڭ گەكتار جەردە ۇلكەن جۇمىس كۇتىپ تۇر», دەدى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ توراعاسى المابەك مارس.
شەگىرتكەلەردىڭ تارالۋ ايماعى ەكى ەسە ازايعانىنا قاراماستان, قاۋىپ بۇكىل ەل بويىنشا ساقتالادى.
قازىر اسا قاۋىپتى زيانكەستەر تىزىمىندە جاندىكتىڭ 12 ءتۇرى بار. ولاردىڭ اراسىندا كولورادو قوڭىزى, قىرىققابات كوبەلەگى جانە شالعىندى كوبەلەك بار.
زيانكەستەردى جويۋعا 2 ملرد تەڭگە باعىتتالادى. ۆەدومستۆو زياندى جاندىكتەردىڭ ۇشۋىن بولدىرماۋ ءۇشىن قىتاي, رەسەي جانە وزبەكستاننىڭ شەكارالاس ايماقتارىنىڭ ماماندارىمەن بىرلەسكەن ءىس-شارا وتكىزگەندەرىن مالىمدەدى.
