ۇلى مۇمكىندىكتەر ۋاقىتى

اتالعان مىندەتتى كۇن تارتىبىنە شىعارا الۋدىڭ ءوزى ۇلكەن مۇمكىندىك. ەندەشە، وسى مۇم­كىندىكتى ءوز ورنىمەن پايدالانا ءبىلۋ – ەلدى­گى­مىزدىڭ بەلگىسى. اگاراكي، مۇنى ءوز دەڭ­گەيىن­دە پايدامىزعا اسىرا الماساق وسىنداي ءسات­تى كەزەڭ بۇدان كەيىن ماڭدايىمىزعا قايتا بۇيى­را ما، بۇيىرماي ما، ونى ءبىر ءتاڭىرى بىلەدى.

قازىرگى تاڭدا حالىقتىڭ باسىم بولىگى ءبىزدىڭ جاڭا قازاقستان قۇرا الاتىنىمىزعا بەك سەنىمدى. ال ەكىنشىلەرىنىڭ كۇدىگى باسىم. قازاقستاننىڭ جاڭا ءداۋىرى باستالعانىنا سەنەتىن ازاماتتار قازىرگى اتقارۋشى بيلىكتىڭ وڭ قادامدارىن ايتىپ، كوڭىلىڭدى كوتەرىپ تاس­تايدى. ال جاڭا قازاقستان قۇرۋ يدەياسىنىڭ ورىندالۋىنا سەنىمى تومەن قاۋىمنىڭ ءۋاجىن تىڭداساڭ، شىنىندا، ايتارعا ءسوز تاپ­پاي قالا­سىڭ. ولاردىڭ پىكىرلەرىنە باس شۇل­عىپ كەلىسۋ­دەن وزگە لاجىڭ دا قالمايدى. بۇل توپ­تاعى­لاردىڭ پىكىرلەرىنىڭ ىشىندەگى باسقاسىن ايتپا­عاندا، جەمقورلىققا قاتىستى ويلارى كىمدە دە بولسا ءارى-ءسارى كۇي كەشتىرمەي قويمايدى.

شىن مانىندە، بۇگىندە سىبايلاس جەمقور­لىققا قاتىستى دەرەكتەر، ساندار، اسىرەسە مەملەكەتتىك قىزمەت سالاسىنداعى جەمقورلىق قوعامداعى كوڭىل كۇيدىڭ ەڭسەسىن زىلدەي باسىپ تۇر. وسىنداي كەسەلدەن ەڭسەسى ەزىلگەن ەل قاشان قۇتىلادى؟ ەگەر ودان قۇتىلا الماسا جاڭا قازاقستان قۇرۋ يدەياسى «بوزا ۇستىندەگى بوس اڭگىمە» بولىپ قالاتىنى ءسوزسىز. تاعى دا ءسوزى مەن ءىسىنىڭ اراسى تىم الشاق قوعامدا ءومىر سۇرۋگە ءماجبۇر بولامىز.

ءبىزدىڭ قوعامدا بۇرىننان مەملەكەتتىك قىزمەت سالاسى سىبايلاس جەمقورلىقتىڭ مىزعىماس ورداسىنا اينالعان. بۇل وسى سالادا جاۋاپتى مەملەكەتتىك قىزمەتىن ءوزىنىڭ جەكە «پاتشالىعىنداي» كورىپ، ونى جەكە باسىنىڭ قىزىعىنا پايدالاناتىندار ءداۋىرىنىڭ ۇزاققا سوزىلعانىن، ءالى دە جالعاسىپ وتىرعانىن ايعاقتايدى. لاۋازىمدى تۇلعالارعا جاۋاپتى قىزمەتتى حالىق رەسمي تۇردە سەنىپ تاپسىرماعانى اتالعان ماسەلەنىڭ تۋىنداۋىنا جول اشىپ بەرۋدە. ويتكەنى الگى لاۋازىمدى مەمقىزمەتكەرگە ەل الدىنداعى جاۋاپكەرشىلىكتەن گورى ءوزىن تاعايىنداعان «قوجايىنىنىڭ» كوڭىلىنە قاراپ جالپاقتاۋ ماڭىزدى. جاڭا قازاقستان قۇرۋ جولىندا وسى ماسەلەنى ءادىل سايلاۋ تەتىگى ارقىلى شەشۋ كوزدەلگەنىمەن، ماقساتقا تولىق جەتە الامىز با؟ بۇل سۇراق ازىرگە باسى اشىق كۇيىندە قالۋدا. ەگەر وسى ساۋالعا ءوز دارەجەسىندە جاۋاپ تاۋىپ بەرە الماساق، مەملەكەتتىك قىزمەت سالاسىنداعى «بارماق باستى، كوز قىستى» ادەت، جاعىمپازدىق، جەڭ ۇشىنان بايلانىسۋ، تاعى باسقالار توقتامايدى.

بۇگىندە ەلىمىزدە لاۋازىمدى تۇلعالاردىڭ، ءتۇرلى دەڭگەيدەگى شەنەۋنىكتەردىڭ جەمقور­لىق­پەن ايىپتالۋىنىڭ تىم جيىلەپ كەتۋى، را­سىندا، ءبىزدىڭ «جاڭا قازاقستان قۇرا الامىز با، جوق پا؟» دەگەن سىڭايلى كۇدىگىمىزدى كوكەيىمىزدە سەمىرتە تۇسۋدە. كۇمان ارالاسقان جەردە سەنىمگە ورىن جوق. ال حالىق سەنىمى جوق جەردە ەشقانداي ءىس ونبەيدى: ءجوندى نە ءجونسىز شەرۋ، ورىندى نە ورىنسىز پىكىرلەر ىشكى ەگەس ارناسىندا بۇلقىنا بەرەدى. بۇل بۇلقىنىس ەرنەۋدەن اسقاندا بارلىق يگى يدەيالار ۋتوپياعا اينالۋى بەك مۇمكىن.

حالىق ءوزىنىڭ قازىناسىنا زاڭسىز قول سۇققاندى نەمەسە سەنىپ تاپسىرىلعان قىز­مەتتىك وكىلەتتىگىن كولدەنەڭ تابىس كوزىنە اينالدىرعاندى كەشىرمەيدى. كىناسى ناقتى دالەلدەنسە، ونى قالاي جازالاسا دا قوي دەمەي­دى. ويتكەنى حالىق بۇل تاقىرىپ بۇگىن­نىڭ تاعدىرى مەن كەلەشەكتىڭ كەمەل بولۋى جونىندە ەكەنىن جاقسى تۇسىنەدى.

بۇگىندە لاۋازىمدى قىزمەتكە جايعاسسام، سودان تالايلارعا «كوكە» بولسام، ەڭبەكاقىدان بولەك كولدەنەڭ تابىسقا كەنەلسەم دەگەن نيەتتەگى جاس بۋىن وكىلى از ەمەس. بۇل ءوز كەزەگىندە مەملەكەتتىك قىزمەت سالاسىندا سىبايلاس جەمقورلىقتىڭ بۇگىن-ەرتەڭ جولى كەسىلە قالمايتىنىن ۇقتىرادى. راس، يسلام دىنىنەن حابارى مول، نەنىڭ ادال، نەنىڭ حارام ەكەنىن اجىراتا الاتىن، اقىرەتىن ويلايتىن ۇرپاق تا جەتىلىپ كەلەدى. ءبىر وكىنىشتىسى، ولار مەملەكەتتىك قىزمەت سالاسىن بىلىققا باتقان ورتا دەپ باعالاپ، وعان بارعىسى كەلمەيدى. تاۋەكەل دەپ بارعاندارىنىڭ ءبىر بولىگى نيەتى بۇزىقتارمەن ءماجبۇرلى تۇردە جەمتىكتەس بولىپ كەتە بارادى، ال ەكىنشى بولىگى ات-تونىن تاستاي سالا تۇرا قاشىپ، قۇتىلادى. وسى قاشىپ قۇتىلعانداردان ءجون سۇراساڭ، ايتاتىندارى: «بىلىققا باتىپ توق جۇرگەنشە، ارىمدى ادال ۇستاپ اش جۇرگەنىم ارتىق». دەمەك يماندى جاستارىمىزدىڭ مەملەكەتتىك قىزمەت سالاسىنا ازىرگە جاپپاي بارا قويۋى ەكىتالاي دۇنيە.

قورىتا ايتقاندا، ەلىمىزدىڭ جاڭا داۋىرىنە سىبايلاس جەمقورلىق دەگەن جەگى قۇرتتى ەنگىزبەيىك. قازاقستان – جاڭا داۋىرگە، بيىك بەلەسكە بەت تۇزەگەن نيەتى تازا ەل، ال سىبايلاس جەمقورلىق – باتىراشپيعىلدى قاسكويلەردىڭ قولىنداعى ايبالتا. ەلىمىزگە قۇلاگەردىڭ تاعدىرىن كەشتىرمەيىك.