«جاڭا قازاقستانداعى مەملەكەتتىك قىزمەتشىنىڭ بولمىسى» اتتى اشىق فورماتتا وتكەن القالى باسقوسۋعا ءماجىلىس جانە سەنات دەپۋتاتتارى, بەلگىلى قوعام قايراتكەرلەرى مەن ەسىمى ەلگە تانىس ازاماتتار وي-پىكىرلەرىن ورتاعا سالدى.
جيىنعا قاتىسقان سەنات دەپۋتاتى نۇرتورە ءجۇسىپ, ءماجىلىس دەپۋتاتتارى امانجول ءالتاي, جاناربەك ءاشىمجان, نازيليا راززاك, بەرىك بەكجانوۆ, «حابار اگەنتتىگى» اق باسقارما توراعاسى بەرىك ءۋالي, ەۋروپالىق قۇقىقتار جانە ادام قۇقىقتارى ساراپتامالىق ينستيتۋتىنىڭ ديرەكتورى مارات ءباشىموۆ «جاڭا فورماتتاعى مەملەكەتتىك قىزمەتشىنىڭ بولمىسىن قالىپتاستىرۋدا اگەنتتىك تاراپىنان قانداي ءىس-قيمىلدار قابىلدانۋعا ءتيىس؟», «مەملەكەتتىك اقپاراتتى ترانسفورماتسيالاۋ پروتسەسىنە قوعام بەلسەندىلەرىن, اقپارات قۇرالدارىن قالاي تارتۋعا بولادى؟» دەگەن ساۋالدار توڭىرەگىندە ءوز ۇسىنىستارىن جەتكىزدى.
سونداي-اق مەملەكەتتىك قىزمەت ىستەرى اگەنتتىگى جانىنداعى قوعامدىق كەڭەس توراعاسى سەرىكجان قاناەۆ, قوعام قايراتكەرى سادىبەك تۇگەل, KAZGUU باسقارما توراعاسى تالعات نارىكباەۆ, Academy of Labour Relations جشس باس ديرەكتورى بيبىگۇل نۇراشەۆا, جۋرناليستەر دەنيس كريۆوشەەۆ, قانات اۋەسباي, ءادىل جاليلوۆ, «ادىلدىك جولى» قوعامدىق بىرلەستىگىنىڭ اتقارۋشى ديرەكتورى ديدار سماعۇلوۆ, «قوعامدىق پىكىر» زەرتتەۋ ينستيتۋتىنىڭ عىلىمي كونسۋلتانتى قالامقاس ەسىموۆا, KAZGUU بيزنەس مەكتەبىنىڭ ديرەكتورى الينا ابدراحمانوۆا, قازاقستاننىڭ ەڭبەك سىڭىرگەن قايراتكەرى قانات ايتباەۆ, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ديرەكتورى ايبولات جاۋدىر, جوعارى كولىك جانە كوممۋنيكاتسيا كوللەدجى ديرەكتورى زۋلفۋحار گايپوۆ مەملەكەتتىك قىزمەتشىلەرگە الەۋمەتتىك جاعدايلار جاساۋ, ولاردى رۋحاني تۇرعىدا ءوسىرۋدىڭ ماڭىزدىلىعى جونىندە ويلارىمەن ءبولىستى.
«ەگەمەن قازاقستان» رگ» جشس باس ديرەكتورى دارحان قىدىرالى مەملەكەتتىك قىزمەتشىنىڭ ەڭ الدىمەن مەملەكەتتىڭ, ۇلتتىڭ, حالىقتىڭ قىزمەتشىسى بولۋعا ءتيىس ەكەنىن ايتا كەلىپ: «قاراپايىم حالىق كەشەگى وزبەكالى جانىبەكوۆ, ءابىش كەكىلباەۆ, ءىلياس وماروۆ سىندى مەملەكەتتىك قىزمەتتە ءجۇرىپ حالىققا قالتقىسىز قىزمەت ەتكەن قارانارلاردى ىزدەيدى», دەدى.
جيىن تىزگىنىن ۇستاعان مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ كەزدەسۋدىڭ ماڭىزدىلىعىن اتاپ ءوتىپ, دوڭگەلەك ۇستەلدىڭ باستى ماقساتى – مەملەكەتتىك قىزمەتكەر قانداي بولۋى كەرەك دەگەن سۇراق نەگىزىندە ولاردىڭ بەت-بەينەسىن ايقىنداۋ ەكەنىن ايتتى.
«مەملەكەتتىك قىزمەت ول پايدا تابۋ مەن كۇن كورۋدىڭ قۇرالى دەپ قابىلداۋدان الدەقايدا بيىك تۇسىنىك. ول – پارىز, ادامشىلىق بورىش, حالىقتىڭ سەنىمى. ءار ازاماتتىڭ ەلدىڭ الدىنداعى ادامشىلىق ميسسياسى – ەلگە قىزمەت ەتۋ. بۇل زور مارتەبە. سانادا وسىنداي تۇسىنىكتەردى ورنىقتىرعان كەزدە عانا ادال نيەتتى, ءادىل, حالىققا قىزمەت ەتۋدى پارىز دەپ سانايتىن قىزمەتشىلەردىڭ تولقىنى قالىپتاسادى. كەرىسىنشە ەل ءۇشىن ەمەس, جەكە باس ءۇشىن قىزمەت ەتۋ باستى ماقساتقا اينالادى. سوندىقتان باستى ۇستانىم – ادال نيەتپەن ەلگە قىزمەت ەتۋ بولۋى كەرەك. وسى باعىتتا سانالى تۇردە جاڭعىرۋ قاجەت. مەملەكەتتىك قىزمەتشىگە ازاماتتىق سانا, ەلدىك سانا, مەملەكەتشىلدىك سانا باستى قۇندىلىق بولۋعا ءتيىس», دەدى اگەنتتىك باسشىسى.
ساراپشىلار مەملەكەتتىك قىزمەتشىنىڭ حالىققا ادال ءارى كاسىبي قىزمەت كورسەتۋى, ونىڭ الەۋمەتتىك جاعدايىن جاقسارتۋ, باق تاراپىنان قولداۋ ارقىلى مەملەكەتتىك قىزمەتتىڭ بەدەلىن كوتەرۋ, مەملەكەتتىك ءتىلدىڭ مارتەبەسى, وقىتۋ باعدارلامالارىنا تاريحي تۇلعالاردىڭ ونەگەسىن ەنگىزۋ تۋرالى ءسوز قوزعادى.
كەزدەسۋدە مەملەكەتتىك قىزمەتشىنىڭ حالىق الدىندا اشىق بولۋى, قىزمەتتىك مىندەتتەرىن ورىنداپ قانا قويماي قوعامدا سىبايلاس جەمقورلىققا قارسى مادەنيەتتى قالىپتاستىرۋدا وزگەلەرگە ۇلگى بولۋ كەرەكتىگى ايتىلدى.
باسقوسۋ بارىسىندا ساراپشىلار ءوز ۇسىنىستارىن ورتاعا سالىپ, مەملەكەتتىك قىزمەتشىنىڭ بولمىسىنا قاتىستى پىكىرلەرىمەن ءبولىستى.
