«بۇگىن قر پرەزيدەنتى ءىس باسقارماسى اكىمشىلىك عيماراتتار ديرەكتسياسىنىڭ ءۇش جاتاقحاناسىنا بارىپ, عيماراتتاردىڭ جاي-كۇيىمەن تانىستىم. ۇزىن-ىرعاسى 160 پاتەر. بۇل قىزمەتتىك باسپانالار قالانىڭ ءار تۇسىندا ورنالاسقان: قاجىمۇقان مۇڭايتپاسوۆ, ماعجان جۇماباەۆ كوشەلەرىندە جانە باۋىرجان مومىش ۇلى داڭعىلىندا. ارىپتەستەرىمىزبەن بىرگە عيماراتتاردىڭ ينجەنەرلىك كوممۋنيكاتسيالىق احۋالىن كورىپ, قانشالىقتى جوندەۋ قاجەت ەكەنىن شامالادىق. سونىمەن قاتار تۇرعىندارمەن دە جۇزدەسىپ, ۇسىنىس-پىكىرلەرىن تىڭدادىق. اسىرەسە 25 جىل بۇرىن پايدالانۋعا بەرىلگەن ەكى جاتاقحانانىڭ جاعدايىن ءجىتى تالقىلاۋعا تۋرا كەلدى. اتالعان عيماراتتارعا كەشەندى زەرتتەۋ جۇرگىزۋ, ونىڭ ناتيجەسى بويىنشا قاجەت بولعان جاعدايدا كۇردەلى جوندەۋگە جوبالىق-سمەتالىق قۇجاتتاما ازىرلەۋ تۋرالى شەشىم قابىلداندى. ال, وعان دەيىن جىلداعىداي جاماپ-جاسقالا تۇرادى», دەپ جازدى Telegram پاراقشاسىندا پرەزيدەنتتىڭ ءىس باسقارۋشىسى ايبەك دادەباەۆ.
بۇل جاتاقحاناداعى پاتەرلەر جەكەشەلەندىرىلمەيدى.
«قازىرگى ۋاقىتتا ءۇش جاتاقحانادا 538 تۇرعىن بار. بارلىعى دا - ءبىزدىڭ قىزمەتكەرلەرىمىز بەن ولاردىڭ وتباسى. جاقىندا بىرنەشە پاتەر بوسادى. سەبەپ-سالدارى ءارتۇرلى: كەيبىرى بىزبەن ەڭبەك كەلىسىمشارتىن توقتاتتى, كەيبىرى جەكە ءۇي ساتىپ الدى. ايتا كەتۋ كەرەك, ءۇيلى بولعان قىزمەتكەرلەردىڭ كوبىسى ءبىزدىڭ مەكەمەلەردىڭ ماتەريالدىق كومەگىن پايدالاندى. سونىمەن بىرگە اۋديت جۇرگىزىلىپ, ناتيجەسىندە كەيبىر تۇرعىندار پاتەرلەردە نەگىزسىز تۇرىپ جاتقاندىعى انىقتالدى. البەتتە, ولار باسپانانى بوساتتى. سونىڭ ارقاسىندا 2008 جىلدان بەرى كەزەكتە تۇرعان قىزمەتكەرلەر دە جاتاقحانادان ەندى ورىن الىپ وتىر. ءدال قازىرگى ۋاقىتتا جاڭا تۇرعىنداردى قونىستاندىرۋ قارەكەتى ءجۇرىپ جاتىر. وسىلايشا جاتاقحاناعا 24 وتباسى ورنالاسادى» دەپ جازدى ايبەك دادەباەۆ.
