150 ماگيسترانت قازاقستاننىڭ قارۋلى كۇشتەرىنىڭ وفيتسەرلىك كورپۋسىنا قابىلداندى. ولاردىڭ 22-ءسى بولاشاقتا ۇلتتىق ۇلاندا قىزمەت اتقارادى.
سالتاناتتى شاراعا ەلىمىزدىڭ كۇش قۇرىلىمدارىنىڭ جانە جوو-نىڭ باسشىلىعى قاتىستى. قۇقىقتىق ءتارتىپ اسكەرلەرىنىڭ تۇلەكتەرىنە ديپلومداردى ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور ەركىن بوتاقانوۆ, ۇلتتىق ۇلان باس قولباسشىسىنىڭ ورىنباسارى گەنەرال-مايور البەرت ماتكاريموۆ, قورعانىس مينيسترلىگى ءبىلىم جانە عىلىم دەپارتامەنتىنىڭ باستىعى گەنەرال-مايور جۇمابەك احمەتوۆ جانە ۇلتتىق ۇلان فاكۋلتەتىنىڭ باستىعى پولكوۆنيك مارات باتىروۆ تابىس ەتتى.
– بۇگىن قارۋلى كۇشتەر قاتارى قازاقستاننىڭ ەڭ بەدەلدى اسكەري وقۋ ورنىندا وقىعان كاسىبي دايىندالعان وفيتسەرلەرمەن تولىقتى. وفيتسەرلەر ستاندارتتان تىس شەشىمدەر قابىلداۋعا دايىن جوعارى بىلىكتى ماماندار عانا ەمەس, سونداي - اق كۇردەلى جاۋىنگەرلىك مىندەتتەردى ورىنداۋعا, باعىنىستىلاردى ەرتىپ, ولاردىڭ ءومىرىن ساقتاپ قالۋعا قابىلەتتى, پاتريوتتار انتىنا ادال بولۋعا ءتيىس, - دەدى قورعانىس ءمينيسترى گەنەرال-پولكوۆنيك رۋسلان جاقسىلىقوۆ تۇلەكتەرگە ارناعان سوزىندە.
قۇقىقتىق ءتارتىپ اسكەرلەرىنىڭ 22 اسكەري قىزمەتشىسى «ۇلتتىق ۇلانداعى مەنەدجمەنت» ءبىلىم بەرۋ باعدارلاماسى بويىنشا ءتورت بىلىكتىلىك بويىنشا وقىتۋدان ءوتتى.
ايتا كەتسەك, ۇلتتىق ۇلان فاكۋلتەتىنىڭ تۇلەگى مايور ماقسات مۇقاەۆ وقۋ بارىسىندا ەڭ كوپ بالل جينادى.
