سەنىم گراموتالارىن ۆەتنام ەلشىسى تحاي نىى ماي فام, پورتۋگاليا ەلشىسى ماريا دە فاتيما ۆەلەز دە اندرادە مەندەش, ارمەنيا ەلشىسى ارمەن گەۆونديان, چيلي ەلشىسى ەدۋاردو ەكسوبار مارين, جاڭا زەلانديا ەلشىسى سارا ماري ۋولش تاپسىردى.
مەملەكەت باسشىسى ەلشىلەردى قازاقستانداعى ديپلوماتيالىق ميسسيالارىنىڭ رەسمي باستالۋىمەن قۇتتىقتاپ, ەلىمىزدەگى يگى مىندەتتەرىن ورىنداۋ بارىسىندا ولارعا پرەزيدەنت اكىمشىلىگى مەن قازاقستان ۇكىمەتى تاراپى جان-جاقتى قولداۋ كورسەتەتىنىن جانە كومەكتەسەتىنىن ايتتى.
قازاقستان پرەزيدەنتى ۆەتناممەن اراداعى تىعىز ىنتىماقتاستىقتى دامىتۋ ازيا-تىنىق مۇحيتى كەڭىستىگىنە, سونىڭ ىشىندە وڭتۇستىك-شىعىس ازيا ەلدەرىنىڭ اسسوتسياتسياسىنا مۇشە مەملەكەتتەرگە (اسەان) قاتىستى قازاقستاننىڭ سىرتقى ساياساتىنىڭ اجىراماس بولشەگى ەكەنىن اتاپ ءوتتى.
«قازاقستان ۆەتناممەن اراداعى ساياسي ديالوگتى جانە ساۋدا-ينۆەستيتسيالىق بايلانىستى كەڭەيتۋگە مۇددەلى. ۆەتنام پرەزيدەنتىنىڭ قازاقستانعا مەملەكەتتىك ساپارى ەكىجاقتى سەرىكتەستىكتىڭ ۇزاقمەرزىمدى جان-جاقتى جول كارتاسىن ازىرلەۋگە مۇمكىندىك بەرەدى دەپ سانايمىن. ونىڭ ساپارى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ ەلوردادا وتەتىن الداعى سامميتىمەن تۇسپا-تۇس كەلەدى دەپ ۇمىتتەنەمىز», دەدى مەملەكەت باسشىسى.
قاسىم-جومارت توقاەۆ پورتۋگاليانى قازاقستاننىڭ ەۋروپا وداعىنداعى سەنىمدى سەرىكتەسى سانايتىنىن ايتتى.
«كولىك جانە لوگيستيكا, اۋىل شارۋاشىلىعى, ەنەرگەتيكا, جاڭارتىلاتىن قۋات كوزدەرى, جاڭا تەحنولوگيالار, مادەنيەت جانە تۋريزم سالالارىنداعى ىقپالداستىقتى نىعايتۋ ءۇشىن الەۋەت جەتكىلىكتى. بۇل باعىتتاعى ىنتىماقتاستىقتىڭ دامۋى پورتۋگاليا پرەزيدەنتىنىڭ قازاقستانعا رەسمي ساپارىن ۇيىمداستىرۋ ءۇشىن جاقسى نەگىز بولادى», دەدى مەملەكەت باسشىسى.
قازاقستان پرەزيدەنتى ەلىمىزدىڭ تمد كەڭىستىگىندەگى نەگىزگى سەرىكتەستەرىنىڭ ءبىرى – ارمەنيامەن اراداعى كوپجىلدىق ىنتىماقتاستىققا باسا ءمان بەرەتىنىن اتاپ ءوتتى.
ء«بىزدىڭ ەكىجاقتى قارىم-قاتىناسىمىز تەرەڭ تاريحي بايلانىستارعا نەگىزدەلگەن. وڭتۇستىك كاۆكازدىڭ ستراتەگيالىق ماڭىزدى وڭىرىندە بەيبىتشىلىكتىڭ تۇراقتى بولۋى جانە ونىڭ وركەندەۋى ءبىزدىڭ كوپجوسپارلى ەكىجاقتى جانە كوپجاقتى سەرىكتەستىگىمىزدى ودان ءارى نىعايتاتىنىنا سەنىمدىمىن», دەدى پرەزيدەنت.
مەملەكەت باسشىسى چيليمەن اراداعى ەكىجاقتى ىقپالداستىقتىڭ دامۋىنا كوڭىلى تولاتىنىن ءبىلدىرىپ, ونى جاڭا دەڭگەيگە كوتەرۋ پەرسپەكتيۆالارىنا نازار اۋداردى.
ء«بىز ءچيليدىڭ مىس الپاۋىتى CODELCO كورپوراتسياسىنىڭ قازاقستاندىق كومپانيالارمەن ستراتەگيالىق سەرىكتەستىك ورناتۋعا دەگەن ورنىقتى نيەتىن قۇپتايمىز», دەدى پرەزيدەنت.
قاسىم-جومارت توقاەۆ جاڭا زەلانديامەن اراداعى ەكىجاقتى قارىم-قاتىناسقا نازار اۋدارا وتىرىپ, ونىڭ ءوزارا سەنىم مەن مىزعىماس دوستىققا نەگىزدەلگەنىن اتاپ ءوتتى.
«قازاقستان جاڭا زەلانديا ۇكىمەتىمەن ىنتىماقتاستىق ورناتۋعا, جالپى تاسىمال جۇيەسى مەن ەكونوميكالىق ورنىقتىلىقتى نىعايتۋ ءۇشىن ءوزارا ساۋدا-ساتتىقتى جانە ينۆەستيتسيانى كەڭەيتۋگە مۇددەلى», دەدى پرەزيدەنت.
جيىن سوڭىندا مەملەكەت باسشىسى ديپلوماتتارعا تابىس تىلەپ, ولاردىڭ ەلدەرىنىڭ كوشباسشىلارىنا جۇرەكجاردى سالەمىن جولدادى.
