«ۇلتتىق قوعامدىق سەنىم كەڭەسى ءوز جۇمىسىن اياقتاعانىمەن ونىڭ نەگىزگى مۇشەلەرى ۇلتتىق قۇرىلتاي قۇرامىنا كىردى. مەملەكەت باسشىسى جاڭا قۇرىلىم جايىندا العاش رەت ناۋرىزداعى جولداۋىندا مالىمدەگەن بولاتىن. ۇلتتىق قۇرىلتاي نە ءۇشىن قۇرىلدى؟ ول قوعامنىڭ بىرىگۋىن نىعايتۋ جانە كەڭەيتۋگە يدەيالار مەن قادامدار ىزدەۋ ءارى ازىرلەۋ ءۇشىن ديالوگ پلاتفورماسىنا اينالۋدى ماقسات تۇتادى», دەپ جازدى ەرلان قارين ءوزىنىڭ Telegram ارناسىندا.
مەملەكەتتىك كەڭەسشى ۇلتتىق قۇرىلتايدىڭ ۇلتتىق قوعامدىق كەڭەستەن قانداي ايىرماشىلىعى بارىن ايتا كەتتى.
«ەگەر ۇلتتىق قوعامدىق سەنىم كەڭەسىندەگى پىكىرتالاس تاقىرىبى اعىمداعى الەۋمەتتىك-ەكونوميكالىق پروبلەمالار, ساياسي رەفورمالار ماسەلەسى بولسا, ال ۇلتتىق قۇرىلتايدا تالقىلاۋ تاقىرىبى جالپىۇلتتىق قۇندىلىقتار نەگىزىندە قوعام بىرىگۋىنىڭ ودان ارى دامي تۇسۋىنە قاتىستى ۇزاقمەرزىمدى سيپاتتاعى ماسەلەلەر بولادى», دەپ جازدى ەرلان قارين.
ول ۇلتتىق قۇرىلتاي قۇرامىنا ەنگەن بىرقاتار تانىمال تۇلعالاردى اتادى.
«بۇگىن قاسىم-جومارت توقاەۆ ۇلتتىق قۇرىلتاي قۇرۋ تۋرالى جارلىققا قول قويىپ, وندا ونىڭ ەرەجەسى مەن قۇرامى بەكىتىلدى. جاڭا قوعامدىق ينستيتۋتتىڭ مۇشەلەرى قاتارىندا مىناداي تانىمال تۇلعالار بار: تانىمال كومپوزيتور, جازۋشى, قازاقستاننىڭ ەڭبەك ەرى ءىليا جاقانوۆ; قازاقستاننىڭ حالىق جازۋشىسى, اقىن, قوعام قايراتكەرى مۇحتار شاحانوۆ; قازاقتىڭ تۇڭعىش عارىشكەرى, كەڭەس وداعىنىڭ باتىرى, حالىق قاھارمانى توقتار اۋباكىروۆ; تانىمال جۋرناليست ءارى قوعام قايراتكەرى سەيداحمەت قۇتتىقادام; كورنەكتى عالىم-ماتەماتيك, اكادەميك اسقار جۇمادىلداەۆ; ءىرى ەكونوميست جانە قوعام قايراتكەرى جاقسىبەك كۇلەكەەۆ; تانىمال مەملەكەت قايراتكەر, ساياساتكەر ءاليحان بايمەنوۆ; جۋرناليست, مەديا-مەنەدجەر, قوعام قايراتكەرى ەرمۇرات ءباپي; مەملەكەت جانە قوعام قايراتكەرى, پارلامەنتتىڭ بىرنەشە شاقىرىلىمىنىڭ دەپۋتاتى نۇرتاي سابيليانوۆ; الەم چەمپيونى, سەۋل وليمپياداسىنىڭ كۇمىس جۇلدەگەرى, قوعام قايراتكەرى داۋلەت تۇرلىحانوۆ; عالىم-بيوتەحنولوگ, «QazVac» ۆاكتسيناسىن ازىرلەۋشى كۇنسۇلۋ زاكاريا; قوعام قايراتكەرى, ءدىنتانۋشى قايرات جولدىباي; تانىمال ءتىلشى-عالىم انار فازىلجانوۆا; ەكولوگ, ازاماتتىق بەلسەندى ازامات امىرتاەۆ. سونىمەن قاتار قازاقستانعا تانىمال وزگە دە تۇلعالار كىردى. ۇلتتىق قۇرىلتايدىڭ قۇرامىندا جالپى 117 قاتىسۋشى بار», دەپ جازىلعان حابارلامادا.
