جاڭا ادىستەردى ءال-فارابي اتىنداعى قازاق ۇلتتىق ۋنيۆەرسيتەتىنىڭ قان تامىرلارى پاتولوگياسى ورتالىعىنىڭ قىزمەتكەرلەرى ازىرلەدى. بۇل ادىستەردىڭ جاڭاشىلدىعى قۇرىلعىلار مەن ادىستەردىڭ ارتەريالىق تامىر وتكىزگىشتىگىن قالپىنا كەلتىرە الاتىنىندا بولىپ وتىر. ال ماڭىزدىلىعىنا كەلسەك, تىڭ جاڭالىقتى پراكتيكادا قولدانۋ ميوكارد ينفارگىنەن, ينسۋلتتان, تروفيكالىق جارالاردان, اياق سۇيەگىنىڭ ىرىڭدەۋى جانە باسقا دا مۇشەلەردەن بولاتىن مەشەلدىك پەن ءولىمدى ازايتادى.
ءال-فارابي اتىنداعى قازۇۋ قان تامىرلارى پاتولوگياسى ورتالىعىنىڭ ديرەكتورى ورالباي دارمەنوۆ عىلىمي ونەرتابىستىڭ ارقايسىسىنا ەكى پاتەنتتەن الىنعانىن ايتادى.
«ارتەريالىق تامىرلاردىڭ وتكىزگىشتىگىن قالپىنا كەلتىرۋگە ارنالعان قۇرىلعىلار مەن ادىستەرگە قازاقستان رەسپۋبليكاسىنىڭ ەكى پاتەنتىن جانە ەۋرازيالىق پاتەنتتىك ۆەدومستۆونىڭ ەكى پاتەنتىن الدى. ءبىزدىڭ ونەرتابىستارىمىز «ارتەريالىق تامىرلاردىڭ وتكىزگىشتىگىن قالپىنا كەلتىرۋگە ارنالعان قۇرىلعى جانە ءادىس» جانە «اتەروسكلەروتيكالىق بلياشكالاردى سەلەكتيۆتى ۋلترادىبىستىق ديسسەكتسياعا ارنالعان قۇرىلعى جانە ارتەريالىق تامىرلاردىڭ وتكىزگىشتىگىن قالپىنا كەلتىرۋ ءادىسى» دەپ اتالادى. ەمدەۋ ءادىسى مىناداي: ءبىز ارتەريالاردا جابىق قۋىس جاساپ, ارتەريا ارقىلى قان اعىپ جاتقان كەزدە اتەروسكلەروتيكالىق بلياشكالاردى (بلياشا دەگەن قاراپايىم تىلمەن ايتقاندا ءتۇيىن, بۇرتىك, قان تامىرلارىندا كەزدەسەتىن تۇيىنشەكتەردى بىلدىرەدى – ا.ش.) پرەپاراتپەن ەرىتەمىز. بۇل ونەرتابىستار اتەروسكلەروتيكالىق بلياشكالاردى تۇبەگەيلى جويۋعا جانە بىردەن بىرنەشە ارتەريانى تازالاۋعا مۇمكىندىك بەرەدى», دەدى و.دارمەنوۆ.
بۇل قۇرىلعىلاردى قولدانۋ قان تامىرلارىن ستەنتتەۋ, سونداي-اق ومىرلىك ماڭىزدى ورگاندار, ياعني جۇرەك, مي, تومەنگى اياق ارتەريالارى جانە باسقا دا تامىرلارىنا اشىق شۋنتتاۋ وپەراتسيالارى سياقتى بەلگىلى جانە كۇردەلى ادىستەرگە قاراعاندا ەمدەۋدىڭ سالىستىرمالى تۇردە ءتيىمدى ءارى ساپالى ناتيجەسىن بەرۋى مۇمكىن.
«جىل سايىن الەمدە ستەنتتەر (وپەراتسياعا قاجەتتى قۇرىلعى – ا.ش.) 60 ملرد دوللارعا ساتىلادى, ءبىز ۇسىناتىن ەمدەۋ ءادىسى الدەقايدا ارزان بولماق. ءبىزدىڭ ءونىم تەحنيكالىق تا, قۇنى جاعىنان دا وسىعان ۇقساس انالوگتاردان بىرنەشە ەسە اسىپ تۇسەدى», دەدى اتالعان ورتالىقتىڭ باسشىسى.
قازىرگى ۋاقىتتا عالىمدار كلينيكالىق سىناقتار مەن كوممەرتسيالىق وندىرىسكە ارنالعان قۇرىلعىلاردىڭ زەرتحانالىق جانە وندىرىستىك ۇلگىلەرىن جاساۋمەن اينالىسىپ جاتىر.
