ءمينيستردىڭ ايتۋىنشا, ۇكىمەت ءتيىستى ۇيىمداستىرۋ ءىس-شارالارىنىڭ جوسپارىن – جول كارتاسىن قابىلداعان. ونىڭ نەگىزگى ءىس-شارالارى – جەرگىلىكتى جانە اۋماقتىق باسقارۋ قۇرىلىمدارىن قالىپتاستىرۋ, وبلىستار اراسىندا بيۋدجەت جانە كوممۋنالدىق مەنشىك بويىنشا ءبولۋ, بيۋدجەتتى بەكىتۋ, ادىلەت ورگاندارىندا تىركەۋ, سالىق كودتارىن بەرۋ, شوتتار اشۋ. جالپى جول كارتاسىندا 27 ءىس-شارا قاراستىرىلعان. ولار بىرتىندەپ ورىندالىپ جاتىر.
جاقىندا ءماسليحاتتاردىڭ سەسسياسىندا وبلىستاردى باسقارۋ سحەماسى بەكىتىلەدى. سودان كەيىن وڭىرلەردە وبلىستىق باسقارمالار قالىپتاستىرىلىپ, ءتيىستى كادرلىق تاعايىنداۋلار جۇرگىزىلەدى. ۇكىمەت قازىردىڭ وزىندە ءتيىستى قاۋلىنى قابىلدادى. وندا قوسىمشا بىرلىكتەر بولە وتىرىپ, قايتا قۇرىلعان جانە قۇرىلعان وبلىستار اۋماعىنداعى اكىمدىكتەردىڭ شتات سانىنىڭ ليميتتەرى بەلگىلەندى.
جەرگىلىكتى اتقارۋشى ورگاندار ءۇشىن قوسىمشا 438 ورىن بولىنەدى. ونىڭ ىشىندە جەتىسۋعا – 242 ورىن, ابايعا – 102 ورىن, ۇلىتاۋعا 94 ورىن تيمەك. ناتيجەسىندە, الماتى وبلىسى اكىمدىگى قىزمەتكەرلەرىنىڭ جالپى سانى 2 230 بىرلىكتى, جەتىسۋ وبلىسىندا – 1 735 بىرلىكتى, شىعىس قازاقستان وبلىسىندا – 1 917 بىرلىكتى, اباي وبلىسىندا – 1 868 بىرلىكتى, قاراعاندى وبلىسىندا – 2 545 بىرلىكتى, ۇلىتاۋ وبلىسىندا 752 بىرلىكتى قۇراماق. ءۇش وبلىس ءۇشىن ەڭبەكاقى تولەۋ قورىنا قاجەتتى قوسىمشا شىعىستاردىڭ جالپى سوماسى بيىل 1,6 ملرد تەڭگەنى, كەلەسى 3 جىلدا ورتا ەسەپپەن 3,2 ملرد تەڭگەنى قۇرايدى.
– سونىمەن قاتار قازىرگى ۋاقىتتا ورتالىق مەملەكەتتىك ورگاندار ءۇشىن شتات سانىن بەلگىلەۋ جۇمىسى جۇرگىزىلۋدە. جاڭا وبلىستاردا 24 مەملەكەتتىك ورگاننىڭ اۋماقتىق بولىمشەلەرى قۇرىلادى. ولاردىڭ شتاتتارىنداعى قوسىمشا قاجەتتىلىك 2 148 بىرلىككە تەڭ. ەڭبەكاقى تولەۋ قورىنا قاجەتتى قوسىمشا شىعىستار شامامەن 13 ملرد تەڭگەنى قۇرايدى. ونىڭ ىشىندە رەسۋبليكالىق بيۋدجەتتەن جىلىنا شامامەن 12,3 ملرد تەڭگە, جەرگىلىكتى بيۋدجەتتەن جىلىنا شامامەن 0,7 ملرد تەڭگە كەرەك. مەملەكەتتىك ورگاندار قۇرىلعاننان كەيىن وڭىرلەردە بيۋدجەت پەن كوممۋنالدىق مەنشىكتى وبلىستار اراسىندا ءبولۋ جۇمىستارى باستالادى, – دەپ ناقتىلادى ۇلتتىق ەكونوميكا ءمينيسترى.
ءا.قۋانتىروۆتىڭ ايتۋىنشا, جاڭا وبلىس ورتالىقتارىندا مەملەكەتتىك ورگاندار مەن قىزمەتكەرلەردىڭ جۇمىس ىستەۋىنە قاجەتتى اكىمشىلىك عيماراتتار بار. بۇگىنگى تاڭدا جەرگىلىكتى اتقارۋشى ورگاندار وبلىس ورتالىقتارىنداعى اكىمشىلىك عيماراتتاردى ساتىپ الۋ, جوندەۋ, جالعا بەرۋ ءۇشىن قاجەتتى بيۋدجەت قاراجاتىنىڭ الدىن الا كولەمىن انىقتادى. جالپى قاجەتتىلىك ازىرشە شامامەن 12 ملرد تەڭگەنى قۇراپ وتىر. ونىڭ ىشىندە نىسانداردى ساتىپ الۋعا – 7,5 ملرد تەڭگە, جوندەۋگە 3,6 ملرد تەڭگە, كەيبىر نىسانداردى ءبىر جىلعا جالعا الۋ ءۇشىن 854 ملن تەڭگە كەرەك. بيۋدجەت قاراجاتىن ءبولۋ ماسەلەسى ەلدىڭ بيۋدجەت زاڭناماسىندا ايقىندالعان تارتىپپەن قارالماق.
ءمينيستردىڭ دەرەگىنشە, 2022 جىلدىڭ قورىتىندىسى بويىنشا اباي وبلىسىنىڭ جالپى وڭىرلىك ءونىم كولەمى 2 ترلن تەڭگەگە, جەتىسۋ وبلىسىندا – 1,1 ترلن تەڭگەگە, ۇلىتاۋ وبلىسىندا 1,3 ترلن تەڭگەگە وسەدى دەپ كۇتىلۋدە. الماتى وبلىسىنىڭ جالپى وڭىرلىك ءونىم كولەمى بيىل 3,2 ترلن تەڭگەنى, شىعىس قازاقستاندا – 3,5 ترلن تەڭگەنى, قاراعاندى وبلىسىندا 6,8 ترلن تەڭگەنى قۇرايدى دەگەن بولجام بار.
– جان باسىنا شاققانداعى جالپى وڭىرلىك ءونىم 2022 جىلى اباي وبلىسى بويىنشا 3,1 ملن تەڭگە, جەتىسۋ وبلىسى بويىنشا 1,6 ملن تەڭگە, ۇلىتاۋ وبلىسى بويىنشا 5,5 ملن تەڭگە دەڭگەيىندە بولجانىپ وتىر. الماتى وبلىسىندا بۇل كورسەتكىش 2,2 ملن تەڭگە, شىعىس قازاقستان وبلىسىندا 4,9 ملن تەڭگە, قاراعاندى وبلىسىندا 5,1 ملن تەڭگە بولادى دەگەن بولجام بار, – دەدى مينيستر.
بولجامعا سۇيەنسەك, بيىل اباي وبلىسىنىڭ جەكە كىرىسى 70 ملرد تەڭگەگە, جەتىسۋ وبلىسى بويىنشا 58 ملرد تەڭگەگە, ۇلىتاۋ وبلىسى بويىنشا 48 ملرد تەڭگەگە باعالانىپ وتىر. ال الماتى وبلىسىندا بۇل كورسەتكىش 343 ملرد تەڭگە, شىعىس قازاقستان وبلىسىندا 131 ملرد تەڭگە, قاراعاندى وبلىسىندا 200 ملرد تەڭگە بولادى دەپ كۇتىلۋدە.
– بۇل رەتتە جاڭادان قۇرىلعان الماتى وبلىسى بولاشاقتا رەسپۋبليكالىق بيۋدجەتتىڭ دونورى بولا الادى دەگەن سەنىم بار. سونداي-اق جاڭا وڭىرلەردە ونەركاسىپتىك ءوندىرىس كولەمى ارتادى دەگەن بولجام بار. ونىڭ ىشىندە اباي وبلىسىندا – 1 ترلن تەڭگەگە, جەتىسۋ وبلىسىندا – 275 ملرد تەڭگەگە, ۇلىتاۋ وبلىسىندا 855 ملرد تەڭگەگە جەتپەك. بۇل كورسەتكىش بيىل الماتى وبلىسىندا 1,4 ترلن تەڭگەنى, شىعىس قازاقستان وبلىسىندا 2,3 ترلن تەڭگەنى, قاراعاندىدا 3,4 ترلن تەڭگەنى قۇراماق, – دەدى ءا.قۋانتىروۆ.
ءمينيستردىڭ ايتۋىنشا, جاڭا وبلىس ورتالىقتارىن دامىتۋ ماقساتىندا قاجەت بولعان جاعدايدا سەمەي, جەزقازعان, جانە قوناەۆ قالالارىن الەۋمەتتىك-ەكونوميكالىق دامىتۋدىڭ كەشەندى جوسپارلارى ازىرلەنىپ, وزەكتەندىرىلەتىن بولادى.
– تۇتاستاي العاندا, وبلىستاردىڭ پايدا بولۋى تەك وسى وڭىرلەردىڭ عانا ەمەس, بۇكىل ەل ەكونوميكاسىنىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى. رەفورما جاڭا وندىرىستەر اشۋ, جاڭا جۇمىس ورىندارىن قۇرۋ, ينۆەستيتسيالار تارتۋ, ينفراقۇرىلىمدى جاقسارتۋ جولىمەن ءومىر سۇرۋگە جايلى ورتا قۇرۋ سياقتى وڭ ناتيجەلەرگە قول جەتكىزە وتىرىپ, حالىقتىڭ ءال-اۋقاتىن ارتتىرۋعا باعىتتالعان. وڭتايلى اكىمشىلىك-اۋماقتىق قۇرىلىم تۇرعىنداردىڭ وبلىس ورتالىعىنا دەيىن جانە كەرى قايتۋىن جەڭىلدەتەدى, ىشكى كوشى-قوندى تيىمدىرەك رەتتەۋگە ىقپال ەتەدى, – دەدى مينيستر.
