«دەگەنمەن نەسيە بەلسەندىلىگىنىڭ جالپى قۇلدىراۋى فونىندا بىرقاتار ەكىنشى دەڭگەيلى بانك بەلسەندى ءوسىم ديناميكاسىن ساقتادى. كرەديتور بانكتەردىڭ وندىعىندا Bank RBK سەنىمدى كوش باستاپ تۇر: قارجى ينستيتۋتىنىڭ قارىز پورتفەلى ءساۋىر ايىندا 11,5 پايىزعا ءوسىپ, 746,6 ملرد تەڭگەگە جەتكەن. جىلدىق ديناميكادا بانك نەسيە بەرۋ كورسەتكىشىن 43,6 پايىز دەڭگەيىندە وسىرگەن. بۇل – سەكتورداعى ەڭ مىقتى ديناميكا. ەكىنشى ورىندا – ءبىر ايدا قارىز پورتفەلىن 10,4 پايىزعا, 1,45 ترلن تەڭگەگە ۇلعايتقان «بانك تسەنتركرەديت». بانكتىڭ جىلدىق ديناميكاداعى كورسەتكىشى دە وپتيميستىك جاعدايدا (+31 پايىز). ۇشتىكتى ءبىر ايدا قارىز پورتفەلىن 8,8 پايىز نەمەسە 872,2 ملرد تەڭگەگە دەيىن كوبەيتكەن «ەۋرازيالىق بانك» تۇيىندەيدى. ءبىر جىلدا بانك زايمى 35,8 پايىزعا ءوسىم كورسەتتى», دەپ جازادى Ranking.
ايلىق ديناميكاداعى تومەندەۋگە قاراماستان بانك اتاۋلىنىڭ جيىنتىق قارىز پورتفەلى وڭ كورسەتكىشتە تۇر: 26,7 پايىزعا كوبەيگەن. پورتفەل ساپاسى دا ءتاپ-ءتاۋىر. تولەنبەگەنىنە 90 كۇننەن اسقان (NPL 90+) «ناشار كرەديتتەردىڭ» جالپى زايم كولەمىندەگى ۇلەسى 3,6 پايىزدى قۇرايدى. سالىستىرار بولساق, ءبىر جىل بۇرىن «ناشار نەسيەلەر» – 7,6, ون جىل بۇرىن – 32,3 پايىز بولعان.
جەكەلەي الىپ قاراستىرار بولساق, نەسيە بەرۋ ۇلەسى بويىنشا جەتەكشى بانكتەردىڭ دە زايم ساپاسىن جاقسارتۋداعى وڭ قادامدارى بايقالادى. NPL 90+ Bank RBK-دا 2,4 پايىزدى قۇرايدى. ءبىر جىل بۇرىن – 8,7, ءبىر اي بۇرىن 2,72 پايىز بولعانىن ەسكەرسەك, كادىمگىدەي ساپاعا جۇمىس ىستەگەندەرى كورىنەدى. زايم ساپاسىن دا ساقتاپ وتىر جانە كليەنتتەرگە نەسيە ۇسىنۋ ىقىلاسى دا جوعارى. قازىر قارجى ينستيتۋتى تۇتىنۋشىلارعا 10 ملن تەڭگەگە دەيىنگى كەپىلسىز زايمدار بەرۋگە دايار. كرەديت بويىنشا ستاۆكا 8 پايىزدان, جتسم 21,6 پايىزدان باستالادى. نەسيە مەرزىمى – 6-84 اي ارالىعىندا.
«بانك تسەنتركرەديت» تە 90 كۇننەن اسىپ تولەنبەگەن بەرەشەكتەر مولشەرىن ءبىرشاما ازايتقان – ناۋرىزداعى 5,06 پايىزدان ساۋىردەگى 4,48 پايىزعا دەيىن. بۇل قارجى ۇيىمىنداعى «ناشار كرەديت» مولشەرى ءبىر جىل بۇرىن عانا 6,91 پايىز بولعان. ءبىر ايلىق ديناميكادا «ەۋرازيالىق بانك» تە NPL 90+ كولەمىن ازايتقان, بىراق جالپى دەڭگەيى ءالى دە بولسا 6,67 پايىز دەڭگەيىندە تۇر. قايتا بۇل تومەندەگەنى, ءبىر اي بۇرىن جالپى نەسيە پورتفەلىندەگى قايتارىلماي جاتقان بەرەشەكتەر 7,43 پايىزدى قۇراسا, ءبىر جىل بۇرىن 8,7 پايىزدى ماڭايلاپتى.
قارجى ينستيتۋتتارىنداعى جەكە تۇلعالاردىڭ سالىمى ساۋىردە 280,5 ملرد تەڭگەگە ازايىپتى. 1 مامىرداعى جاعداي بويىنشا بانكتەردەگى جەكە تۇلعالار دەپوزيتىنىڭ كولەمى 12,83 ترلن تەڭگە بولىپ تۇر. قىزمەت ەتىپ تۇرعان 22 بانكتىڭ 9-ىندا سالىمدار اجەپتاۋىر ازايعان. حالىقتىڭ اقشاسىن جيناۋ جاعىنان ءابسوليۋتتى ليدەر اتاعىنا Kaspi يە. ساۋىردە بۇل بانكتىڭ قورىنا 120,1 ملرد تەڭگە كەلىپ قوسىلىپ, جالپى جيىنتىعى 2,6 ترلن تەڭگەگە جەتكەن. «بانك تسەنتركرەديت» ساۋىردە 886 ملرد تەڭگە سالىم جيعان. جالپى كورسەتكىش تۇرعىسىنان سەكتورداعى ۇزدىك وندىققا دا كىرمەيتىن «فريدوم فينانس قازاقستان» سالىم ءوسىمى بويىنشا ءۇشىنشى ورىندا تۇر. قارجى ينستيتۋتىنىڭ دەپوزيت پورتفەلى ءبىر ايدا 12,8 ملرد تەڭگەگە ءوسىپ, 62,5 ملرد تەڭگەنى قۇرادى.
