زۇلمات جىلداردىڭ شەرلى شەجىرەسىنە اينالعان بۇل تۋىندىنىڭ تۇساۋكەسەرى ە.بوكەتوۆ اتىنداعى قاراعاندى ۋنيۆەرسيتەتى قابىرعاسىندا ۇيىمداستىرىلعان «ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە» ارنالعان «تاريحتان تاعىلىم – وتكەنگە تاعزىم» كونفەرەنتسياسى اياسىندا ءوتتى.
تۇساۋكەسەر راسىمىنەن ءسال بۇرىن سۋرەتتى تىسىمەن سالاتىن شەبەر, قوعام قايراتكەرى كارىپبەك كۇيىكوۆتىڭ «قارا ورامال» شىعارماسىنىڭ جەلىسىن قۋالاپ كەنەپكە بوياۋمەن بەدەرلەگەن كارتينالارىنىڭ كورمەسى ۇيىمداستىرىلدى. ونەر دەسە ىشكەن اسىن جەرگە قوياتىن قاۋىم نازارىنا ۇسىنىلعان تۋىندىلاردىڭ قاتارىندا «كارلاگ قاقپاسى», «ماموچكينا مولاسى», «قارا ورامال», «قىزجىلاعان», «گەنەرالدىڭ قىزى», «تاس پەن اس» جانە «سىرنايشى» سىندى بوياۋى قانىق, ايتار ويى انىق شىعارمالار بولدى.
وسى كورمە بارىسىندا كەلۋشىلەر ەسىمى ەۋروپا جۇرتىنا جاقسى تانىمال, تالانتتى سۋرەتشى الماگۇل مەڭلىباەۆانىڭ كوركەم كارتينالارىن دا تاماشالادى. سونداي-اق قاراعاندى ۋنيۆەرسيتەتىنىڭ عالىمدارى مەن وقىتۋشىلارى قۇراستىرعان تاعىلىمدى ەڭبەكتەر دە كورمە قاتىسۋشىلارىن بەيجاي قالدىرمادى. ساياسي قۋعىن-سۇرگىن جانە اشارشىلىق قۇرباندارىنا بايلانىستى تىڭ دەرەكتەردى قامتىعان بۇل تۋىندىلار «الاش ارداقتىلارى: سانكت-پەتەربۋرگ ىزدەرى» جانە «ۇلت ۇستازى – احمەت بايتۇرسىنوۆ» اتتى تاقىرىپتىق كىتاپ كورمەلەرى اياسىندا وقىرمانعا تانىستىرىلدى.
تۇساۋكەسەر راسىمىندە جيىلعان جۇرت ساياسي قۋعىن-سۇرگىن جانە اشارشىلىق قۇرباندارىن ءبىر مينۋت ۇنسىزدىكپەن ەسكە العان سوڭ, قاراعاندى ۋنيۆەرسيتەتىنىڭ ستۋدەنتتەرى «قارا ورامال» پوەما-رەكۆيەمىنەن جەتى تىلدە ءۇزىندى وقىدى. بۇل كورىنىستىڭ اسەرلى شىققانى سونداي, تىڭدارمان اراسىندا تەبىرەنىستىڭ تولقىنى جۇگىرىپ ءوتىپ, جانارلارعا جاس كەلدى...
اۋدارما دەمەكشى, مامانداردىڭ ايتۋىنشا, ويلى وقىرمان مەن ادەبيەتتىڭ سارابدال سىنشىلارىنان جوعارى باعا العان پوەما-رەكۆيەمنىڭ شەت تىلگە تارجىمالانعان نۇسقالارى دا ءساتتى شىققانعا ۇقسايدى. وعان دالەلدىڭ ءبىرى – شۆەتسيا استاناسى ستوكگولم قالاسىندا 2017 جىلى وتكەن VI Open Eurasian الەمدىك بايقاۋىندا قازىلار القاسىنىڭ تالعامىنان شىعىپ, III دارەجەلى سىيلىقتى يەمدەنگەن بولاتىن.
ايتا كەتەلىك, «قارا ورامال» كىتابىنىڭ بوكەتوۆ ۋنيۆەرسيتەتىندە باسىلىپ شىعۋىنا سول وقۋ ورنىنىڭ باسشىسى نۇرلان دۋلاتبەكوۆ تىكەلەي مۇرىندىق بولدى. رەكتوردىڭ «جارالى جىلدار جانايقايى» دەگەن تاقىرىپتا جازعان العىسوزىمەن باستالاتىن تۋىندى مىڭ دانا تيراجبەن جارىق كورىپ, قالىڭ وقىرمانعا جول تارتتى.
ساحنا تورىندە تۋىندى اۆتورى مەن رەكتور تۇساۋىن كەسكەن «قارا ورامال» پوەما-رەكۆيەمى وسى ءىس-شاراعا قاتىسقان جيىرما شاقتى ەلدىڭ رەسمي وكىلدەرىنە سىيعا تارتىلدى.
تۇساۋكەسەر راسىمىنە قاتىسقان وبلىس اكىمىنىڭ ورىنباسارى ەربول الىقۇلوۆ تاريحتان تاعىلىم الىپ, مۇنداي زوبالاڭنىڭ ەش ۋاقىتتا قايتالانباۋى ءۇشىن كۇرەسۋ – ءار ازاماتتىڭ قاسيەتتى پارىزى ەكەنىن اتاپ ءوتتى. سونداي-اق ول اقىن عالىم جايلىباي مەن حالىقارالىق «اتوم» جوباسىنىڭ مۇشەسى, قوعام قايراتكەرى, سۋرەتشى كارىپبەك كۇيىكوۆكە ەرەن ەڭبەكتەرى ءۇشىن العىس ايتتى.
ساحنا تورىنە كوتەرىلگەن اقىن عالىم جايلىباي جاڭا كىتاپتىڭ جارىق كورۋىنە جانە القالى جيىننىڭ جوعارى دەڭگەيدە وتۋىنە يگى ىقپالىن تيگىزگەن وبلىس اكىمدىگى مەن قاراعاندى ۋنيۆەرسيتەتىنىڭ رەكتورىنا ريزاشىلىعىن ءبىلدىردى.
– بۇل كىتاپ تاريحتا «قارلاگ» دەگەن اتپەن قالعان قاسىرەتتى جىلداردىڭ مۇڭ-زارىن ايتادى. زۇلمات جىلدار وتانداستارىمىزدىڭ جۇرەگىندە وشپەستەي داق قالدىردى, كوپتەگەن زيالى قاۋىم وكىلدەرىنىڭ عۇمىرىن جالمادى. ءبىز مۇنى وسكەلەڭ ۇرپاقتىڭ ساناسىنا قۇيا ءبىلۋىمىز كەرەك, – دەدى اقىن.
سونداي-اق اقىن جاڭا كىتاپتىڭ مايەكتى وزەگىنە اينالعان «ماموچكينا مولاسى» شىعارماسىن وقىپ بەردى.
قاراعاندى
